Yakɔ́bɔ atoi ka Sɛkɛ́mu áoga na Bhɛtɛ́li
35
1 Esa moci, Mokonga áongodea Yakɔ́bɔ: «Ma, ótaiɛ na Bhɛtɛ́li, óikɛ oa. Oa, ɔmɔphɛkɛande ɛtɛ ɔ́phɛɔ. Nga, oa unge dékokidianei mbenɔ nde dónsodokani munamakɔ Ɛsáu ôntea. » 2 Mpɔ Yakɔ́bɔ áɔyɔnga k'ekombo nɛkɛ na bɔbhu bunde dátu nabɔ gea: « Makani danga esomba ndea bakɛni nnde a sɔsɔbɛ anu, ósokosani ka gea bóbɛ kanga nkiki mosa á Mokonga, bóanganisɛ bhɔngɔ. 3 Mbusa índɔ, betaiande na Bhɛtɛ́li, oa nɛmphɛkɛande Mokonga ɛtɛ ɔ́phɛɔ, mmbe dámoengi k'esa á tambaga nɛmɔ, áoba k'imoci n'eme k'ɔma bhubhui nde déoga. » 4 Dábamophi Yakɔ́bɔ nkumba ésomba á bakɛni bhui nnde dába ně na mandɛɔ nde dá phɔtɔ ka ketue abɔ. Mbusa, Yakɔ́bɔ aǔmba ka cina á me angbóngbo nde a bhíbhí á Sɛkɛ́mu. 5 Mbenɔ nde Yakɔ́bɔ na banakɛ bámɛi tamba, Mokonga áǒtumisa batɔa ka kenombe á bhíbhí na kɔbɔbɔkɔ phɛ̂, nkpa kěbeɛ ye.6 Mpɔ Yakɔ́bɔ na bakpa bɔbhu bunde dátu na bɔ báojua ka Lúsi, ande gea te Bhɛtɛ́li ka njia á Kanána. 7 Oa, áɔphɛka ɛtɛ-ɔ́phɛɔ, áɔɔphana ɔma ndɔ Ɛ́l-Bhɛtɛ́lia. Nga, ɔma ndɔ ungɔ Mokonga dánkidianei mbenɔ nde dásodokani ka tea munamakɛ. 8 Dhɛbhɔ́la, nɛi ndea Lɛbhɛ́ka, áokua, báomǔmba bhíbhí á Bhɛtɛ́li ka cina me nde báɔɔphana me á ngamɔ.
9 Mokonga dánkidianei goto Yakɔ́bɔ ka kidia akɛ na Padháni-Alámu, áobhisa njaga gǔ akɛ. 10 Mokonga áongodea: « Cɔ, inakɔ ande Yakɔ́bɔ. Bákakɔɔphanɛku ye k'ina ndɔ. Ina akɔ abande ndiu Isilaɛ́li. » Kabondɔ, áonsua Isilaɛ́li. 11 Mokonga â goto ongodea: «Nende Mokonga mɛna-Bukpɛkpɛ. Bɔkɔta, óbikɛ. Ekombo moci, phɔtɔ n'ɛbɔkɔti ásǐ ajuanande subi akɔ. K'ekombo nɛkɔ, bakɔta babaeka sɔsɔbɛ abɔ. 12 Nji nde démophi Abhalaámu, néomopha Isáka, nekophande. Neóphande phɔtɔ ekombo nɛkɔ nji ndɔ mbusa akɔ. »
13 Mpɔ Mokonga áotaia gǔ, áokatana na yɛ k'ɔma ndɔ dátu ɔyɔnga na Yakɔ́bɔ. 14 Oa, Yakɔ́bɔ áocuma ɛtɛ, áodukia gamba na makana anjɛ gǔ i ka gea te ábɛ ɛtɛ á bonjánja 15 Yakɔ́bɔ áosua ɔma nde Mokonga dáyɔngi na yɛ: Bhɛtɛ́lib.
Bɔkɔtɛana á Bɛnjamína na kukua á Lakɛ́li
16 Yakɔ́bɔ n'ekombo nɛkɛ báotoka na Bhɛtɛ́li. Na ba phɔtɔ ka ntanda, danga na Ɛphuláta, Lakɛ́li áokpanga boae, aoonja k'akpɛ. 17 Mbenɔ á bii boae dáonkaea Lakɛ́li, ngumba áongodea: « Kobangɛmbɛ, o goto na miki-mǒko. » 18 Mbenɔ á bii Lakɛ́li dáɔdɔɛaga, áonsua miki ina Bhɛni-Ɔnic ka dusukana akɛ. Abhakɛ â gǎkɛ onsua: Bhɛnjamínad. 19 Lakɛ́li aku ye, báomǔmba bhíbhí á aphe á Ɛphuláta. Ande gea Bhɛtɛlɛɛ́mu. 20 Yakɔ́bɔ áocuma ɛtɛ moci gǔ á bhota akɛ. Ɛtɛ ndɔ unge báɔɔphana na ka k'esa nde, ɛtɛ á bhota á Lakɛ́li.
21 Yakɔ́bɔe áoga ɔphɛka ɛ́ma nɛkɛ ka nyɛnya Migadhála-Ɛdhɛ́ɛ. 22 Mbenɔ nde Yakɔ́bɔ dáiki ka nji ndɔ, Lubhɛ́ni áoga on'daga Bhilía, mɔsɔngɔ á abhakɛ, Yakɔ́bɔ áɔɔka.
Ina á bana Yakɔ́bɔ
Yakɔ́bɔ dá na baniki-bǒko nkama na babɛ (12). 23 Baniki-bǒko ndea Lɛ́a dábatu: Lubhɛ́ni, ange ndea Yakɔ́bɔ, mbusa Simɛɔ́ni, Láoui, Yúdha, Isakái, na Jabhulɔ́ni. 24 Baniki-bǒko ndea Lakɛ́li dábatu, Yɔsɛ́phu na Bhɛnjamína. 25 Baniki-bǒko ndea Bhilía, mbhɛdanigi ndea Lakɛ́li dábatu, Dháni na Nɛphutáli. 26 Baniki-bǒko ndea Jíipa, mbhɛdanigi ndea Lɛ́a, dábatu Gádhi na Asɛ́li. Bundɔ ungɔ dábatu baniki-bǒko ndea Yakɔ́bɔ, bunde dɛ́bɔkɔti na Padháni-Alámu.
Kukua á Isáka
27 Yakɔ́bɔ dájue mɔtɛa abhakɛ Isáka na Mamúlɛ, bhíbhí á Kiliáti-Alábha nnde báye kɔɔphana Ɛbhulɔ́ni. Nji nde Abhalaámu na Isáka dábaiki kau bea bakɛni. 28 Isáka dáendi basaga mia moci nkama bɔku na ngia á njaga nkama isaɔ (180). 29 Mpɔ áokua. Dádhondani na batatakɛ ka kukua n'aphomi phɛ̂. Baniki-bǒko nɛkɛ Ɛsáu na Yakɔ́bɔ báomǔmba.