Simɛɔ́ni na Láui bágisi nyɔngɔ á aɔabɔ Dhína
34
1 Esa moci, Dhína nseka nde Yakɔ́bɔ dám'bɔkɔti na Lɛ́a, áoga metambe ka baseka á ka nji ndɔ. 2 Sɛkɛ́mu, muna Amɔ́li ntɔa ka iphi, moamɛ á ka nji, damɔɔni. Áondhunga ka bukpɛkpɛ, áon'daga ně, áontukatuka. 3 Cɔ, áonkonda, áophapheana kayɛ, áɔphɔngisa měma akɛ phioo! 4 Sɛkɛ́mu áoga ongodea abhakɛ Amɔ́li gea: «Mbhɛda kani nseka nde nem'boɛ k'eyamani. »5 Yakɔ́bɔ dáɔki gea Sɛkɛ́mu antukatuki nseka ndeakɛ Dhína. Cɔ, bii baganda nɛkɛ kimoci na banyama dábana ciko, Yakɔ́bɔ áodhakana na kabii baganda nɛkɛ dábaji.
6 Amɔ́li, abhakɛ na Sɛkɛ́mu, áoga mɔtɛa Yakɔ́bɔ ka yɔngaga nayɛ. 7 Mbenɔ nde baganda ndea Yakɔ́bɔ dábaji na ciko, dábaɔki nyɔngɔ nde dányɛnyi. Nyɔngɔ ndɔ áǒkaea ka měma, báɔbɛa phɛ̂. Nga, Sɛkɛ́mu dági kema á soni ka baIsilaɛ́li, ka daga na nseka ndea Yakɔ́bɔ na kátokeni bo. 8 Mpɔ Amɔ́li áǒngodea gea: «Moganda nɛmɔ Sɛkɛ́mu ankondi nseka nɛnu phɛ̂. Nenódengemisigi ka gea mophani nseka ndɔ am'boɛ k'eyamani. 9 Béboanɛgɛni: bosophande baseka nɛnu, na beonopha bunɛsu. 10 Kabondɔ, boikande na besu. Nji nde abande bhase ka phɔ anu, ikani kau, bɔbhɛdanɛgɛ ekuma á bangɔa, bobande na odo. »
11 Sɛkɛ́mu áǒngodea bamunamakɛ na Dhína na abhabɔ gea: « Ómokuiani ngomi, nenóphande kema nde bɔmɛmande. 12 Bómososeambi gea néphuiɛ nkumba ásǐ éyamani, na nkumba nɛngbo danga-danga, nephuia tɔ nnde bɔmɔmɛmande. Cɔ, ómopani ndiu miki á nseka nde ábɛ nkani. » 13 Baganda ndea Yakɔ́bɔ báonsikisia Sɛkɛ́mu na abhakɛ Amɔ́li ka maibhe ka nyɔngɔ nde Sɛkɛ́mu dántukituki aɔabɔ Dhína. 14 Baganda ndea Yakɔ́bɔ báongodea gea: « Béke tanda ɔtɔka na bemophi mouo aɔasu, abande soni ka besu. 15 Bébeekea tɔ nyɔngɔ nɛkɔ, aobá́ n'obeeki gea óbɛ bea besu. Ande gea, bǒko nɛnu bɔbhu bábɛ ogua ganja. 16 Mpɔ, benóphande baseka nɛsu k'eyamani, na béǒboa buanu. Beikande na benu na bebande ekombo moci. 17 Aoba na bókokondi ɔka asu, a gǎkɛ oba na bókokondi gua á ganja, bem'boande nseka nɛsu, besu béoga.» 18 Nyɔngɔ nɛbɔ dám'bɔngɛi Amɔ́li na anakɛ Sɛkɛ́mu. 19 Sɛkɛ́mu kaiphisɛ tɔtɔkisa i. Nga, nseka ndea Yakɔ́bɔ dám'bɔngɛi phɛ̂. Batɔa k'ekombo ndea Sɛkɛ́mu bɔbhu dábambhisii měma.
20 Amɔ́li na anakɛ Sɛkɛ́mu, dábage ka ngba á kenombe na báǒngodea batɔa ka kenombe nɛbɔ. 21 « Bakpa nde bana měma anja ka besu, báikɛ ka nji nde. Babhɛdanɛgɛ ekuma nɛbɔ á bangɔa. Nga, nji ǎgbae ka bɔ. Běbukande baseka nɛbɔ, bê phɔtɔ ǒpha buasu k'eyamani. 22 Bɔ, babeekeande ndiu ika na besu, ka ba na besu tɔ ekombo moci, aobá́ bǒko nɛsu na bagu ganja bea bɔ. 23 Cɔ, nsamba nɛbɔ, nkumba na banyama nɛbɔ bɔbhu, kábaeka nɛsu? Bébeekeɛ tɔ nyɔngɔ nɛbɔ ka gea béikɛ na bɔ. » 24 Bunde bɔbhu dábatu ojuana ka ngba á kenombe nɛkɛ, dábamɔki Amɔ́li na anakɛ Sɛkɛ́mu. Bǒko bɔbhu á ka kenombe ndeakɛ dábagu ganja.
25 K'esa á koisaɔ, na nyama abɔ na phɔ́tɔ okakamaga, ka baniki-bǒko ndea Yakɔ́bɔ babɛ: Simɛɔ́ni na Láoui ba aɔakɛ na Dhína bɔbhu dábabhɛdi pindi, báokia ka kenombe kanga ɔna abɔ, baǒma bǒko bɔbhu. 26 Bâ phɔtɔ ómoa Amɔ́li na anakɛ Sɛkɛ́mu na ngɔa, báɔmbhɛda Dhína k'endu ndea Sɛkɛ́mu, báonga ně. 27 Bana Yakɔ́bɔ buangbó báɔbhɛda nkumba á bakpa bunde basí, báuuta nkumba á batɔa ka kenombe. Nga, dábantukatuki aɔabɔ. 28 Dábabhɛdi nsamba nɛbɔ á banyama ángbongbo na banyama abhɔbhɔa, bamponda bunde dábatu ka kenombe na bunde dábatu ka nji abhɔbhɔa. 29 Dábaphɛi ɛtɔi nɛbɔ bhubhui na dhunga bake nɛbɔ, n'ekombo nɛbɔ na kema bhubhui nde dába ně subi éndu.
30 Mpɔ Yakɔ́bɔ áongodea Simɛɔ́ni na Láoui gea: «Bomokabei bojede ka kangisia ani na batɔa ka nji. Ande gea baKanána na baPɛlɛ́si. Eme k'ena bakpa básǐ. Bádhondanagande ka manisa ani, bámotindisande eme n'ekombo nɛmɔ. » 31 Simɛɔ́ni na Láui báonsikisia gea: « Kátokeni Sɛkɛ́mu ádɛ na aɔasu bea nke á mambɔ. »