<<    <     Nkpangeɔ     33     >    >> 
Yakɔ́bɔ adhondani na Ɛsáu
33
1 Cɔ, Yakɔ́bɔ áɔmɔ̌na Ɛsáu n'abhiki na bǒko mia gena (400). Áǒkatanisa sɔsɔbɛ á Lɛ́a, Lakɛ́li na babhɛdanigi babɛ bundɔ bake. 2 Áǒmesa mosa bake íbundɔ babhɛdanigi na baniki nɛbɔ, mbusa abɔ, Lɛ́a na baniki nɛkɛ, mpɔ áogɔbɛa na Lakɛ́li na Yɔsɛ́phu. 3 Yakɔ́bɔ yɛ sasakɛ áoma mosa. Áogbukaga muanku akɛ ka odo mɔngɔ ngia á njaga íbɛ (7) mosa á sɛkɛda bhíbhí á munamakɛ. 4 Ɛsáu áoga mbangɔ ka dhondana nayɛ, áonkombea ka kingo. Bɔbhu babɛ báoikia ngamɔ. 5 Bii Ɛsáu ɛ̌bɔni bake na baniki, áousia: « Ba ani bunde oma na bɔ? » Yakɔ́bɔ áonsikisia te: « Bánde baniki nde Mokonga amopi, eme mbhɛdanigi nɛkɔ ka bonjánja ékondi nɛkɛ. » 6 Bake ndɔ babhɛdanigi na baniki nɛbɔ báombhiimisia Ɛsáu báogbuka muanku abɔ mosa akɛ. 7 Lɛ́a na baniki nɛkɛ báombhiimisia Ɛsáu báogbuka muanku abɔ mosa akɛ. Yɔsɛ́phu na Lakɛ́li bâ phɔtɔ ogea bo.
8 Ɛsáu áomúsia: « Oto sebeima gea kema sina na mɔɔmba á banyama bhui nde neto dhondani na bɔ? » Yakɔ́bɔ áonsikisia: «Netósebei ba na bɔjɛjɛ mosa akɔ, ɔbɛ mɔkɔta nɛmɔ.» 9 Ɛsáu áogea: «Munama, nena nkumba ásǐ phɛ̂. Ika tɔ na nkumba ndeakɔ. » 10 Yakɔ́bɔ áongea: « Bɛ̌ndɔ, neodengemisigi. Aoba nena bɔjɛjɛ mosa akɔ, beekea nkɛbɛa nde nekophi. Nga, omosesi na bɔjɛjɛ phɛ̂ sumbia bii nɛsɛnɛki mosa á Mokonga. 11 Cɔ, neodengemisigi, beekea nkɛbɛa nde nekophi. Nga, Mokonga amopi bonjánja ékondi néoba na nkumba nde amokeni. » Yakɔ́bɔ áotetemisa yɔnga nde na kabii Ɛsáu dábeeki.
12 Ɛsáu áongea: « Bétutuisɛ tamba, nɛɔmɛ̌ande mosa. » 13 Mpɔ Yakɔ́bɔ áongodea: «Mɔkɔta nɛmɔ, uubha gea baniki bákaɔtɔka tamba, néoba na bakei á bamɔgɔgɔ na bakei á bamɛmɛ na bangɔmbɛ nde baoungisa. Aoba na bětambisi akpɛ k'esa ímoci, banyama ndɔ bɔbhu bakuande. 14 Cɔ, neodengemisigi mɔkɔta nɛmɔ, ga mosa ani. Eme, nebhikande mbusa bokɛbokɛ na neobea tamba ndea banyama nde ba mosa ani, na inde á baniki, na kabii nekidiande mɔ̌tɛakɔ ka Sɛíi. » 15 Ɛsáu áɔyɔnga gea: «Nekodeketeande ka bakpa nɛmɔ.» Yakɔ́bɔ áonsikisia: « Ka nyɔngɔ éké? Amokeni tɔ k'obɛ mɔkɔta nɛmɔ seseani anja.» 16 Esa ndɔ tɔ, Ɛsáu áosikianaga k'aphe á Sɛkɛ́mu.
Yakɔ́bɔ aphɛki bhíbhí á Sɛkɛ́mu
17 Cɔ, Yakɔ́bɔ áoga nɛkɛ na Sukɔ́ti. Áɔphɛka endu nɛkɛ na mǒkomba á banyama nɛkɛ. Kabondɔ unge, baɔɔphana ɔma ndɔ Sukɔ́tia.
18 Ka ja akɛ ka Padháni-Alámu, Yakɔ́bɔ áokidia ka bɔjɛjɛ ka kenombe á Sɛkɛ́mu nnde a ka Kanána. Áɔphɛkaga Ɛ́ma bhíbhí á kenombe. 19 Áosomba ɔma ndɔ dáphɛkigi ɛ́ma na bangɔa mia moci (100), mɔtɛa bana-Amɔ́li abhakɛ na Sɛkɛ́mu. 20 Áɔphɛka ɛtɛ-ɔphɛɔ oa, áɔɔphana Ɛl-Ɛlɔ́ɛ-Isilaɛ́lib.