32
1 Mamai mɔkɛsuɛ, Labháni áojujuka áǒkotoa baseka ndeakɛ na basuko, áobhisa njaga gǔ abɔ ka ɔkoa abɔ na ja á mɔtɛa akɛ.Yakɔ́bɔ áɔ̌bɔngisiaga ka dhondana na Ɛsáu
2 Yakɔ́bɔ áotutuisa tamba nɛkɛ, bamalaeka ndea Mokonga báobhika otakana nayɛ. 3 Mbenɔ nde ɛ̌bɔni, Yakɔ́bɔ áokoga: « Oani ande bha á batɔa emani ndea Mokonga! » na áosua ɔma ndɔ Maanaímua. 4 Yakɔ́bɔ áǒteka bakpa mosa mɔtɛa munamakɛ Ɛsáu ka nji Sɛíi ka kenombe Ɛdhɔ́mu 5 Aôsosea be: « Bongodeande gǎkɛ mɔkɔta nɛmɔ Ɛsáu gea: ‹ Mbhɛdanigi ndeakɔ Yakɔ́bɔ agi be: " Déiki mɔtɛa Labháni, néoiphia phɛ̂ na ka k'esa nde. 6 Nena bangɔmbɛ, bamponda, bamɔgɔgɔ, bamɛmɛ, babhɛdanigi bake na bǒko. Něteki bakpa mosa, ka tɔmia akɔ gea te, mɔkɔta nɛmɔ ómoseseɛ anja." › »
7 Bateki báoja, báongodea Yakɔ́bɔ báongea: « Betoge mɔtɛa munamakɔ Ɛsáu. Yɛ, a phɔtɔ obhika ka dhondanisa akɔ. Ana bakpa mia gena (400). » 8 Mpɔ, Yakɔ́bɔ áoba na kɔbobɔkɔ phɛ̂, n'ěngongonisa. Kabondɔ, áǒgabha bakpa nde ba k'imoci nayɛ k'ɔma boiki íbɛ, â phɔtɔ ǒgabha bamɔgɔgɔ, bamɛmɛ, bangɔmbɛ na bamponda. 9 Yakɔ́bɔ áoianaga: « Áoba Ɛsáu n'ěmanisi batɔa k'ɔma boiki ímoci, bunde bájigande báotea. » 10 Mbusa, Yakɔ́bɔ áɔmɛma Mokonga: « O Mokonga nde ba tatɛ Abhalaámu, ba abhɛ Isáka, *Mɔkɔta-Mokonga. Obɛ dómogǐ: ‹ Ja na nji ndeakɔ, k'ekombo ndeakɔ, nekogeande bonjánja › 11 Mɔkɔta, kékeni na bonjánja bhui nnde dókodeketi tɔtɔkisa i ka phoani, éme mbhɛdanigi nɛkɔ. Nga, mbenɔ nde déjabhi Yɔɔdháni, déketu na kema, tɔ gbutuka me. Cɔ, kɛ̌kɛ nde neji na mɔɔmba íbɛ á bakpa. 12 Ka dengedenge, ómoamisa ka njaga munama Ɛsáu. Nga, nena kɔbɔbɔkɔ akɛ. Neobanga kabhikɛmbɛ omomoa, eme, bake na baniki. 13 Cɔ obɛ, kanisia bíndɔ dɔ́mɔɔku gea: ‹ Nekogeande anja. Nebikisande ekombo ndeakɔ bea mbume á k'obenge, nnde nkpa nnaɔtɔka na tangi. › »
14 Oa unge Yakɔ́bɔ dáde kǐpha. Áoboa ka kema nɛkɛ nnde dábhiki ně, áoba nkɛbɛa ka opha á munamakɛ Ɛsáu. 15 Bakei á bamɛmɛ mia íbɛ (200), bǔkui nkama íbɛ (20), bakei á bamɔgɔgɔ mia íbɛ (200) na bǔkui nkama íbɛ (20), 16 bakei á bangamia nkama isaɔ (30) na baoungisa baniki, bangɔmbɛ bakei nkama gena (40) na bǔkui nkama (10), bamponda bakei nkama íbɛ (20) na bǔkui nkama (10). 17 Aǒgabheaga babhɛdanigi ndeakɛ moci-moci nsamba á banyama danga-danga, áǒngodea gea: «Nyɛnyani mosa ani na bódeketɛ ɔma sɔsɔbɛ á nsamba moci-moci. »
18 Áonsosea mbhɛdanigi ndeakɛ mmbɔ ba mosa, áongea: «Mbenɔ nde bodhondanande na munama Ɛsáu na usia akɔ: ‹ Mɔkɔta ndeakɔ ande ani? Ooga oa? Ani nsamba á banyama bhui nde a mosa akɔ? › 19 Onsikisiande gea: ‹ Ande á mbhɛdanigi ndeakɔ Yakɔ́bɔ ande nkɛbɛa nde aotekisii mɔkɔta nɛmɔ Ɛsáu na yɛ sasakɛ aobhika mbusa asu. › » 20 Áonsosea phɔtɔ mmbɔ ba ko babɛ, ba ko basaɔ na buangbó bɔbhu bunde báobhika mbusa á nsamba. « Bondɔ unge bɔyɔngande mbenɔ nde botakanande na mɔkɔta nɛmɔ Ɛsáu. 21 Bɔ́yɔnga gea: ‹ Mbhɛdanigi nɛkɔ Yakɔ́bɔ aphɔtɔ obhika mbusa asu. › » Nga, Yakɔ́bɔ dáɔyɔngaga sasakɛ gea: «Nɛnphɔngisande na nkɛbɛa nde negesande mosa, mbusa, néokidiana mosa akɛ. Nesebéi gea amoseseande anja. » 22 Nkɛbɛa áoga mosa, yɛ áodhiga oa kǐpha ndɔ.
Emani ndea Yakɔ́bɔ ka Pɛnuɛli
23-24 Yakɔ́bɔ áǒmesia kǐpha ndɔ, áɔ̌bhɛda bake nɛkɛ babɛ, babhɛdanigi nɛkɛ bake babɛ, na baniki nɛkɛ nkama na moci (11), áǒkaisa ka ikɔ á Yabhɔ́ki na nkumba nɛbɔ bhubhui. 25 Yakɔ́bɔ áodhiga sasakɛ. Mpɔ, nkpa moci áomana na yɛ na kabii esa dáse. 26 Bii nkpa ndɔ dáɔni gea kankindɛku Yakɔ́bɔ k'emani ndɔ, áɔm'bɛta ka jukana á nkua á cina á kuju. Nkua á cina á kuju akɛ áophengetana, mbenɔ nde dábaomana nayɛ. 27 Mpɔ, áongodea Yakɔ́bɔ: « Ómodeketa negɛ, nga, esa asǒsa. » Yakɔ́bɔ áonsikisia te: « Kéodeketɛ ku ógɛ aobá́ n'okobhisi njaga akɔ gǔ ani. » 28 Nkpa ndɔ áomúsia: « Ina akɔ ande eke? » Áonsikisia: « Yakɔ́bɔ. » 29 Áonsikisia gea: « Bákakɔɔphanɛku ye Yakɔ́bɔ, bákɔɔphana nde ndiu Isilaɛ́li. Nga, omǎni na Mokonga, ômana na bakpa, ôba muuka. » 30 Yakɔ́bɔ áomúsia: «Neodengemisigi, ómongodea ina akɔ. » Áonsikisia te: « Uuusia ina ani ka bo? » Oa, áobhisa njaga gǔ á Yakɔ́bɔ. 31 Yakɔ́bɔ áosua ina á ɔma ndɔ Pɛnuɛ́lib. Nga, dági te: «Nanga dɛ́ɔni keongi á Mokonga bhíbhí, ne phɔtɔ na enda. »