Yakɔ́bɔ anti Labháni
31
1 Cɔ, Yakɔ́bɔ dáɔɔki gea baniki-bǒko ndea Labháni dabáɔyɔnga gea : « Yakɔ́bɔ dábhɛdi kema bhubhui nnde dátu ndea abhasu, na ka nyɔngɔ á kema ndɔ unge aye n'ɛtɔi.» 2 Yakɔ́bɔ áoengekisa gea keongi á Labháni nna ye bíndɔ dátu mosa ka phɔ akɛ. 3 Mpɔ, *Mɔkɔta-Mokonga áongodea Yakɔ́bɔ: « Sikianaga ka nji nɛnu áɔbɔkɔtɛana, na mpɛphɛ ékombo nɛkɔ, nebande k'imoci n'obɛ.»4 Cɔ, Yakɔ́bɔ áǒteka bakpa ka ɔphana Lakɛ́li na Lɛ́a bii dábaoamba etuge nɛkɛ ka ciko. 5 Aǒngodea te: «Neengekisi gea keongi á abhanu nna ye ka phɔ ani bíndɔ dá mosa. Mokonga nde ba abhɛ a gǎkɛ k'imoci n'eme. 6 Buubha gea, dɛ́mbhɛdaneigi abhanu na bukpɛkpɛ nɛmɔ bhubhui. 7 Dámodhemi gǎkɛ ka anganisa ophendɔ nɛmɔ mɔngɔ nkama (10). Mokonga dánkansosi gǎkɛ ámogeɛ ajede. 8 Kabɛ abhanu na dáɔyɔnga: ‹ Banyama bɔbhu bunde bátɔndɔmanigi abhɔbhɔbhɔa bábande ophendɔ nɛkɔ ›, bakei bɔbhu dábatu tɔ ɔbɔkɔta baniki na bátɔndɔmanigi abhɔbhɔbhɔa. Kabɛ na dáɔyɔnga, ‹ Bunde bágɛɛmanigi bábande ophendɔ nɛkɔ ›, bakei bɔbhu dábatu tɔ ɔbɔkɔta baniki na bágɛɛmanigi. 9 Mokonga a ámbé dámuti abhanu etuge nɛkɛ áomopa.
10 Mbenɔ nde banyama dábaoseiana, dɛ́ɔni ka njeki be: Bǔku á banyama nde dábaoseia bakei, kabɛ na dábagɛɛmanigi, báɔtɔndɔmanaga na báoba na langi danga-danga. 11 Malaeka ndea Mokonga dámɔɔphani ka njeki ndɔ: ‹ Yakɔ́bɔ! › Néobeekea: ‹ Eme yɛ. › 12 Áomongodea: ‹ Ɔna phɔ, bǔku á banyama bɔbhu bunde báǒseia bakei na bágɛɛmanigi, báɔtɔndɔmanaga na langi danga-danga abɔ. Nga, dɛɔni bhui nndɔ Labháni dákogii. 13 Ne nde Mokonga mmbe dakokidianei na Bhɛtɛ́li, ɔma nde dócumi ɛtɛ, áoba ɛtɛ á bonjanja ka dukia i na gamba. Ɔma nde dónu esomba ka bhɛdaneaga ani. Kɛ̌kɛ nde toka ka nji nde, ɔ́mɛɛ ógɛ ka nji nɛkɔ a ɔbɔkɔtɛana. › »
14 Lakɛ́li na Lɛ́a báonsikisia Yakɔ́bɔ: « Beye na ka kema na botukɔ k'endu ndea abhasu? 15 Be keye tɔ bakɛni mɔtɛakɛ ka nyɔngɔ nde dásosombisi áoea bangɔa á ka phɔ asu? 16 Kabondɔ, ɛtɔi bhubhui nde Mokonga aphui mɔtɛa abhɛ, aye tɔ nɛsu na inde á baniki nɛsu. Cɔ, tɔtɔkisa tɔ kema bhui nde Mokonga dáososi. »
17 Mpɔ, Yakɔ́bɔ áɔ̌bɔngisaga ka tamba. Áɔ̌bhɛda baniki nɛkɛ na bake ndeakɛ, áǒkambisa gǔ á bangamia. 18 Áoboa etuge nɛkɛ bhui na nkumba nɛkɛ bhui nnde dátɔi na Padháni-Alámu, áoga mɔtɛa abhakɛ Isáka ka nji á ka Kanána. 19 Mbenɔ nde Labháni dáge ǒkangadua banyama nɛkɛ, Lakɛ́li áouba nkumba ésomba ndea abhakɛ. 20 Yakɔ́bɔ áondhema Labháni ntɔa ka Alámu, ka mɛɛa kanga ɔkɔa akɛ. 21 Áotea na nkumba nɛkɛ bhui, áokaia ibo Ɛphulati. Áoga nci á Gilɛ́adhi nji á mamba-mamba.
Labháni andhondi Yakɔ́bɔ
22 Mbusa á esa isaɔ, báongodea Labháni gea Yakɔ́bɔ ati. 23 Labháni aɔ̌bhɛda batɔa k'endu nɛkɛ, báom'bea Yakɔ́bɔ. Mbusa á esa ngia á njaga íbɛ (7) á tamba, baondhonda ka Gilɛ́adhi nji á mamba-mamba. 24 Cɔ, Mokonga â ndiu ondhonda Labháni ntɔa ka Alámu ka njeki kǐpha, áongodea be: « Óambǎmbɛ ka ngodea Yakɔ́bɔ nyɔngɔ tiititi.»
25 Mbenɔ nde Labháni andhondi Yakɔ́bɔ n'aphɛki ngbangba nɛkɛ ka Gilɛ́adhi nji á mamba-mamba, Labháni na bakpa nɛkɛ bâ phɔtɔ ɔphɛka oa. 26 Labháni áomúsia Yakɔ́bɔ: « Ogima bo? Omodhemi ka nyɔngɔ eke na dhunga á baseka nɛmɔ bea batɔa mosunge? 27 Ka nyɔngɔ eke ototima ka bɔsɔmɛa, ômodhema, kɔmɔɔkɔɛ? Netu ɔkɔɔkɔa na maseye, na embɔ na ende na ikembe. 28 Cɔ, kómodeketi tanda nékombeɛgɛ baseka nɛmɔ na basuko amɔ. Nndɔ ande kobhobho. 29 Nena kɔkɔta á gea akɔ ajede. Mokonga nde ba abhakɔ amongodima gǎkɛ kǐpha á nǎma gea: ‹ Óamba ka ngodea á Yakɔ́bɔ nyɔngɔ tiititi. › 30 Cɔ, kɛ̌kɛ nde, oge ka nyɔngɔ nde dósebéi phɛ̂ sikianaga mɔtɛa abhakɔ. Cɔ, ka nyɔngɔ eke uubima gǎkɛ nkumba esomba nɛmɔ? »
31 Yakɔ́bɔ áonsikisia Labháni : « Déna kɔbɔbɔkɔ, néokanisia te mbenɔ nɛngbo ǒphuia nde baseka nɛkɔ mɔtɛamɔ. 32 Cɔ, mmbe odhondande nkumba-esomba nɛkɔ mɔtɛakɛ, akuande. K'iso á bakpa nɛsu, cungudaga kema ndeakɔ mɔtɛamɔ,ɔ́bhɛdɛ.» Yakɔ́bɔ dákaubhi gǎkɛ gea Lakɛ́li daubi nkumba-esomba a k'ekombo nɛbɔ.
33 Labháni áongia subi á ngbangba ndea Yakɔ́bɔ, subi á ngbangba ndea Lɛ́a, subi á ngbangba ndea babhɛdanigi babɛ bake, kaɔnɛ gǎkɛ ka kema. Áojuana subi á ngbangba ndea Lɛ́a áongia subi índe á Lakɛ́li. 34 Lakɛ́li dábhɛdi nkumba-esomba dáokukumisa kusi a ɔma á buiki á bangamia na dáiki gǔ i. Labháni dácungudigi subi á ngbangba bhui, kaɔnɛ ka kema. 35 Lakɛ́li áongodea abhakɛ: « Abhɛ, kɔbɛɛmbɛ bii kɛ́ɔtɔka n'ěmesi mosa akɔ. Nga, nena kukua nɛsu bake.» Nanga nkábɔ ndɔ bhubhui, Labháni dákaɔni nkumba-esomba.
36 Yakɔ́bɔ áɔbɛa na phekeaga Labháni. Áongea: «Nemoema nkpa sina? Bojede sina nde negi, nnde otetemisi beani kǔngani ? 37 Mbenɔ nde ocungudigi nkumba nɛmɔ bhui, ɔtɔɔni ka nkumba á k'endu nɛkɔ? Ómophangia mosa á bakpa nɛmɔ na bakpa nɛkɔ. Bátenɛ nyɔngɔ sɔsɔbɛ ani n'obɛ. 38 Nga déiki mɔtɛakɔ basaga nkama íbɛ (20). Éme á bake á bamɔgɔgɔ na bake á mɛmɛ, kau dákanyenyi. Na dékeni tanda ka bǔku á bamɔgɔgɔ á k'etuge nɛkɔ. 39 Dékeobhikii na jue á nyama nde banyama akae á k'osaa dábaǒgoa. Eme ámbé nyɔngɔ ndɔ dátɔ ka mɔ̌ ani. Dɔ́ɔmɔmɛma ophendɔ á banyama nde dábaǒuba kǐpha na bunde dábaǒuba n'esa. 40 Mani dáɔmɔbɛta n'esa, phiɔ áɔmɔbɛta kǐpha, dékeoda kǐpha. 41 Déiki basaga nkama íbɛ (20) mɔtɛa akɔ. Dékɔbhɛdaneigi ka basaga nkama na ngia á njaga gena (14) ka nyɔngɔ éyamani á baseka nɛkɔ babɛ, basaga ngia á njaga (6) ka nyɔngɔ á etuge nɛkɔ. Cɔ, dóanganisi ophendɔ nɛmɔ mɔngɔ nkama (10). 42 Átuoba Mokonga ndea tatɛ Abhalaámu, Mokonga mmbe abhɛ Isáka dáom'banga na kámogami, ambe dómodeketi tɔ negɛ njaga jǎi. Mokonga â ndiu ɔɔna tambaga ani na ekuma akpɛ nnde dɛ́tɔtɔkisi, na ma kǐpha, áotena nyɔngɔ nɛmɔ.»
Labháni na Yakɔ́bɔ báɔngani
43 Mpɔ, Labháni áonsikisia Yakɔ́bɔ gea te: « Baseka nde bánde baseka nɛmɔ, baniki nɛbɔ bánde baniki nɛmɔ, etuge nde ande etuge nɛmɔ, kema bhui nde ɔɔna ande nɛmɔ. Cɔ, k'esa nde kékeni ye nɛ́tɔtɔkisɛ kema ka nyɔngɔ á baseka nɛmɔ na baniki nde bɛ̌bɔkɔti. 44 Cɔ, bɛ́ɔnganɛ eme n'obɛ, mphangiɔ moci ábɛ bea mamei sɔsɔbɛ ani n'obɛ. » 45 Yakɔ́bɔ â gǎkɛ ɔbhɛda ɛtɛ moci, áocuma.
46 Mpɔ, Yakɔ́bɔ áǒngodea batɔa k'ekombo nɛkɛ: « Kɔngɔani ɛtɛ. » Báɔkɔngɔa, báobimbikisa. Mbusa, bakpa bɔbhu báoeaga oa, gǔ ɛtɛ ndɔ bábimbikisi. 47 Labháni áɔɔphana ɔma ndɔ Yɛgáli-Saodhúta, Yakɔ́bɔ â gǎkɛ osua nɛkɛ Galɛ́dhi. 48 Labháni áɔyɔnga gea: « K'esa nde ntundukɔ á ɛtɛ nde ande mamei sɔsɔbɛ akɔ n'eme.» Kabondɔ unge dábasǔ Galɛ́dhia. 49 Dábasǔ phɔtɔ Misípab. Nga, Labháni dáyɔngi goto gea: « *Mɔkɔta-Mokonga ábɛ m'bondigi asu mbenɔ nde bebande danga-danga nkpa moci na dhakɛ. 50 Aoba n'ǒtambisaga baseka nɛmɔ n'aobá́ n'ǒbuu bake bunɛngbo bhǎ á baseka nɛmɔ, békebɛku na nyɔngɔ na nkpa, Mokonga ámbé ande mmamei sɔsɔbɛ ani n'obɛ. Cɔ, óamba bonjánja.» 51 Mpɔ, Labháni áongodea Yakɔ́bɔ: « Ɔna phɔ ɛtɛ nde nebimbikisi, n'ǐnde něcumi sɔsɔbɛ ani n'obɛ. 52 Ntundukɔ ɛtɛ nde n'ǐnde necumi ande mmamei sɔsɔbɛ asu. Eme kétingɛku nkɛkɛɔ nɛkɔ ka gea ajede. N'obɛ kótingɛku nkɛkɛɔ nɛmɔ ka gea ajede. 53 Cɔ, ambe Mokonga nde ba Abhalaámu na Mokonga nde ba Naɔ́li ábɛ nteni-nyɔngɔ sɔsɔbɛ asu.» Mpɔ Yakɔ́bɔ áonoa esomba ka ina á Mokonga, mmbe abhakɛ Isáka dáom'banga. 54 Mbusa, Yakɔ́bɔ áophuia phɛa gǔ á mamba na ɔphana á badhakɛ ka eaga. Dábai gǎkɛ ea ndɔ bâ tɔ oda gǔ á mamba.