30
1 Bii Lakɛ́li dáɔni gea nnaɔm'bɔkɔtɛa Yakɔ́bɔ baniki, dáɔni nsengo á dhakɛ. Lakɛ́li áongodea Yakɔ́bɔ: « Ómopa baniki-bǒko. Kai bondɔ, mmbe nekuande. » 2 Yakɔ́bɔ áɔm'bɛɛa Lakɛ́li, áongodea: « Eme nende mpɛnɛ á Mokonga mmbe akuumi ɛbɔkɔti? » 3 Lakɛ́li áonsikisia: «Cɔ, mbhɛdanigi ndeamɔ Bhilía a ámbé. Dani na yɛ, ɛ́bɔkɔtɛ baniki-bǒko. Nebande nɛi ndeabɔ. Kabondɔ, eme phɔtɔ nebande na baniki-bǒko ka nyɔngɔ akɛ. » 4 Mpɔ Lakɛ́li áomopha Yakɔ́bɔ mbhɛdanigi ndeakɛ nke Bhilía ábɛ mɔsɔngɔ akɛ, áoda na yɛ. 5 Bhilía áokumba éme, áɔm'bɔkɔtɛa Yakɔ́bɔ miki-mǒko. 6 Lakɛ́li áɔyɔnga: «Mokonga ateni nyɔngɔ nɛmɔ anja, aɔki phɔtɔ ɛsɔ ani, áomopa miki-mǒko. » Kabondɔ unge dansǔ ina á Dhánia.7 Bhilía mbhɛdanigi nke ndea Lakɛ́li â goto okumba éme, áɔm'bɔkɔtɛa Yakɔ́bɔ miki-mǒko ba ko babɛ. 8 Lakɛ́li áɔyɔnga: « Démanisi tebani na bukpɛkpɛ á Mokonga na dénɛntɔki. » Áonsua Nɛphutalib.
9 Bii Lɛ́a aɔni gea ɛbɔkɔti nɛkɛ amamege, kabondɔ unge áɔmbhɛda mbhɛdanigi ndeakɛ nke Jíipa, áomopha Yakɔ́bɔ ka gea ábɛ mɔsɔngɔ akɛ. 10 Jíipa mbhɛdanigi nke nde ba Lɛ́a, áɔm'bɔkɔtɛa Yakɔ́bɔ miki-mǒko. 11 Lɛ́a áɔyɔnga: «Ngɔa sina! » Áonsua ina á Gadhic.
12 Jíipa mbhɛdanigi nke nde ba Lɛ́a, áɔm'bɔkɔtɛa Yakɔ́bɔ miki-mǒko ba ko babɛ 13 Lɛ́a áɔyɔnga: « Oo maseye sina! Kɛ̌kɛ nde mpɔ bake báyɔnga yetɔ nena bosegi. » Áonsua ina á Asɛ́lid.
14 Esa moci, ka matu á tena á mponga, Lubhɛ́ni dáge na ciko, áodhonda kema bea ianga ísɛngɛ. Áobhika ně k'amakɛ Lɛ́a. Mpɔ Lakɛ́li áongodea Lɛ́a: « Kadengedenge, ómopa k'ianga ékondi ndea moganda ndeakɔ. » 15 Lɛ́a áonsikisia: « Ande kema abhɔa k'obɛ, bii om'bǔ mɔnɔ munyani, ka gea óboɛ phɔtɔ ianga ísɛngɛ ndea moganda nɛmɔ? » Mpɔ Lakɛ́li áɔyɔnga: «Cɔ, ka anganisa ianga ísɛngɛ ndea moganda nɛkɔ, bii abo, bodande na Yakɔ́bɔ k'esande kǐpha. »
16 Bii Yakɔ́bɔ dáotoka na ciko ɔgɔgɔ, Lɛ́a áoga ondhondanisa k'aphe, áongodea: « Odande n'eme k'esande kǐpha. Nga, nephendi ye nyɔngɔ akɔ na ianga ísɛngɛ ndea moganda ndeamɔ.» Yakɔ́bɔ â gǎkɛ oda nayɛ kǐpha ndɔ. 17 Mokonga áɔɔka ɛmɛmi ndea Lɛ́a, áokumba éme. Aɔm'bɔkɔtɛa Yakɔ́bɔ miki-mǒko á ko bɔku. 18 Lɛ́a áɔyɔnga: «Mokonga amophendi. Nga, eme nemophi mbhɛdanigi nɛmɔ nke munyani.» Kabondɔ, áonsua Isákaie. 19 Lɛ́a â goto okumba éme, aɔm'bɔkɔtɛa Yakɔ́bɔ miki-mǒko á ko ngia á njaga. 20 Lɛ́a áongea: «Mokonga amɔkɔmi anja. Mpɔ, munyani amodokomisande ye tɔ. Nga, nɛm'bɔkɔtɛi baniki-bǒko ngia á njaga (7). » Aonsua, Jabhulɔ́nif. 21 Mbusa, aɔm'bɔkɔta miki-nke, áonsua Dhína.
22 Mpɔ Mokonga áonkanisia Lakɛ́li, áɔɔka ɛmɛmi ndeakɛ, áomopha ɛbɔkɔti. 23 Aokumba éme, áom'bɔkɔta miki-mǒko. Áɔyɔnga: «Mɔkɔta akpɔi soni nɛmɔ. » 24 Lakɛ́li áonsua Yɔsɛ́phug. Áogea, ambe Mɔkɔta ámoyameɛ miki-mǒko bangbó.
Yakɔ́bɔ ɛ̌tɔisi
25 Mbusa á Lakɛ́li bɔkɔta á Yɔsɛ́phu, Yakɔ́bɔ áongodea Labháni: « Ómososea néjɛ mɔtɛamɔ, ka nji ndɛamɔ. 26 Ómopa bake nɛamɔ na baniki nɛamɔ bunde dɛ́ɔbhɛdaneigi ka nyɔngɔ abɔ, na negǎnde. Nga, ɔbɛ sasakɔ uubha ekuma sina nde dɛ́ɔbhɛdaneigi. » 27 Labháni áongea: « Aoba n'omokui ngomi, bampa ésomba ndea batatɛ bamophani gea *Mɔkɔta-Mokonga dábhisi njaga akɛ gǔ ani ka nyɔngɔ akɔ. 28 Ómongodea ophendɔ ndeakɔ, na nekophendande.» 29 Yakɔ́bɔ áongodea: « Obɛ sasakɔ uubha bíndɔ dánɛkɔbhɛdaneigi. Na bíndɔ nsamba nɛkɔ aye kau ka nyɔngɔ ani. 30 Nga, n'ǐndɔ dótu ně mosa á kidia ani, abiki phɛ̂. Mɔkɔta-Mokonga abhisi njaga akɛ gǔ akɔ kpanga á bii dánetu mɔtɛakɔ. Cɔ, kɛ̌kɛ nde, nɛbhɛdaneagande phɔtɔ ekombo nɛmɔ mbenɔ sina? » 31 Labháni áomǔsia: «Nekophande kema sina? » Yakɔ́bɔ áonsikisia: « Komopɛku ka kema. Aoba n'ogi kema nde nekongodeande, něisande na amba goto nsamba ndeakɔ. 32 Ómososea k'esande, nɛ́nyɛnyɛ sɔsɔbɛ á nsamba nɛkɔ. Nébhisɛ kampɛphɛ sɔsɔbɛ á bamɔgɔgɔ bunde batɔndɔ́manigi na bunde batɔndɔ́manigi abhɔbhɔbhɔa, bunde baindi, phɔtɔ sɔsɔbɛ á bamɛmɛ bɔbhu bunde batɔndɔ́manigi na bunde batɔndɔ́manigi abhɔbhɔbhɔa. Bundɔ bɔbhu, babande ophendɔ ndeamɔ. 33 Odigimisande kodoni ani esa nengbo. Mbenɔ nde obhikande ɔ̌na ophendɔ neamɔ. Etuge nde obhikande odhonda mɔtɛamɔ na ka tɔndɔ́manigi angbóngbo na abhɔbhɔbhɔa sɔsɔbɛ á bamɛmɛ, na bamɔgɔgɔ bɔbhu bunde baindigi, abande mɔtɛamɔ kuba. » 34 Labháni áonsikisia gea: « Eya! Abɛ bíndɔ ɔyɔngi. »
35 Cɔ, esa ndɔ tɔ, Labháni áǒbhisa ka mpɛphɛ buku á mɛmɛ bɔbhu bunde bagɛɛmanigi na bunde batɔndɔ́manigi na bunde dábatu ábhubhu. Bakei á bamɛmɛ, bunde batɔndɔ́manigi abhɔbhɔbhɔa na bunde batɔndɔ́manigi angbôngbongbo, na bamɔgɔgɔ bɔbhu bunde dábaindi. Banyama bɔbhu bunde děphaphi, debophi banakɛ ibundɔ baniki-bǒko. 36 Mpɔ, Labháni áokatana na Yakɔ́bɔ ka ntanda á bodanga á esa isaɔ. Yakɔ́bɔ áoamba banyama ndea Labháni bunde bajigi.
37 Yakɔ́bɔ áɔbhɛda ntabhi-ntabhi á dhɛka á bame danga-danga isaɔ, áɔgɛɛmisaga ka cucua nkekě i. 38 Áobhisa ntabhi-ntabhi á bame nde agɛɛmisigi subi á ɔma á nusa banyama ibo, mosa á keongi á banyama. Nga, dábaoseiana mbenɔ á bhika noa ibo. 39 Banyama dábaoseiana bhíbhí á ntabhi-ntabhi á bame ndɔ. Báɔ̌bɔkɔta baniki na bagɛɛmanigi, na batɔndɔ́manigi abhɔbhɔbhɔa na angbôngbongbo. 40 Yakɔ́bɔ áǒkatisana baniki á bamɔgɔgɔ. Aoengisa banyama ndɔ nkɛkɛɔ á banyama ndea Labháni bunde dábagɛɛmanigi, na bunde dábaindigi. Kabondɔ, â ye tɔ oba na mɔɔmba á banyama inɛkɛ nganga, kaedhadoɛ ye na banyama ndea Labháni. 41 Mbenɔ bhui nde banyama bunde baɛngigi dábaoseiana, Yakɔ́bɔ aobhisa ntabhi-ntabhi á bame ndɔ mosa á keongi abɔ subi á ɔma á nusa á banyama ibɔ, ka gea baseianɛ mosa á ntabhi-ntabhi á bame ndɔ. 42 Dákaobhisa ntabhi-ntabhi á ba me ndɔ mosa á banyama na baɔndigi. Ka gea te, banyama nde báɔndigi dábatu bunde á Labháni na bunde dábaɛngigi, dábatu bunde á Yakɔ́bɔ. 43 Yakɔ́bɔ áoba ntɔi phɛ̂, áoba n'etuge ásǐ á bamɔgɔgɔ na bamɛmɛ, babhɛdanigi bake na bǒko, bangamia na bamponda.