28
1 Isáka áɔmɔphana Yakɔ́bɔ, áobhisa njaga gǔ akɛ, áonsosea be: « Kom'boɛeka ka baseka á ka Kanána nde k'eyamani. 2 Cɔ, mɛɛa, ógɛ na Padháni-Alámu, mɔtɛa tatakɔ Bhɛtuɛ́li mmbe am'bɔkɔti amakɔ. Ko unge am'boande ka baseka ndea nɔkɔ akɔ Labháni, kabɔ moci áoba nkakɔ. 3 Cɔ, Mokonga Mɛna-Bukpɛkpɛ ábhisɛ njaga akɛ gǔ akɔ. Ɛbɔkɔti nɛkɔ ábɛ ásǐ, ábikɛ ka gea óbɛ na ketoto angbo á bakpa. 4 Mokonga ábhisɛ njaga akɛ gǔ akɔ, obɛ n'ɛbɔkɔti nɛkɔ, bíndɔ dábhisi gǔ á Abhalaámu ka gea ɔ́bhɛdɛ nji nde oiki kau bea mɔkɛni, nji nde Mokonga dámophi Abhalaámu. » 5 Mpɔ, Isáka áonteka Yakɔ́bɔ na Padháni-Alámu mɔtɛa nɔkɔakɛ Labháni muna Bhɛtuɛ́li ntɔa ka Alámu, munamakɛ na Lɛbhɛ́ka, ama Yakɔ́bɔ na Ɛsáu.6 Ɛsáu dáɔki gea Isáka dabhisi njaga akɛ gǔ á Yakɔ́bɔ, áonteka na Padháni-Alámu k'aphe á boa á nke. Âphɔtɔ ɔɔka gea mbenɔ nde dámbhisii njaga, dánsosi gea te kam'boɛeka ka baseka á ka Kanána k'eyamani. 7 Âphɔtɔ ɔɔka gea Yakɔ́bɔ dábeeki ɛsɔ ábhakɛ n'amakɛ, áoga na Padháni-Alámu. 8 Mpɔ, Ɛsáu auubha gea baseka á ka Kanána bakam'bɔngɛi abhakɛ Isáka. 9 Ɛsáu áoga mɔtɛa Isumaíli, muna Abhalaámu. Â goto om'boa Maalati nseka ndea Isumaíli k'eyamani. Maalati dátu gǎkɛ aɔakɛ na Nɛbhayɔ́ti.
Njeki ndea Yakɔ́bɔ
10 Cɔ, Yakɔ́bɔ áɔmɛa ka Bhɛ́li-Sɛ́bha, áoga na Alani. 11 Áokidia k'ɔma ímoci, áoda béi, nga, esa dáiphi. Áɔbhɛda ka b'ɛtɛ moci á k'ɔma ndɔ, áobhisa ka monga, áoda. 12 Oa, áoda na njeki á kema bea mogombagomba na bajuki na odo, sesei n'agbondu kobha. Bamalaeka ndea Mokonga dábaodapha na dhidha kau. 13 *Mɔkɔta-Mokonga áomama mosa akɛ, áongodea: «Nende Mɔkɔta-Mokonga, Mokonga nde ba tatakɔ Abhalaámu, na Mokonga nde ba Isáka. Nekophande obɛ na basuko akɔ odo nde ode kau. 14 Basuko akɔ babikande phɔtɔ bea mpusu á odo. Ogbaemisande odo nɛkɔ nkɛkɛɔ á n'okomo, n'oyonga, gǔ na kusi. Ka nyɔngɔ akɔ na basuko akɔ aunge nebhisande njaga ani gǔ á ɛbɔkɔti bhui á ka mokonda. 15 Eya, ně kimoci n'obɛ. Nekoambande ɔma bhui nde ogande na jisa akɔ ka odo nde. Nga, kéodoɛeka na ka bii nɛtɔtɔkisande mɔkɔ nɛmɔ k'obɛ. »
16 Mpɔ Yakɔ́bɔ áojujuka, áɔyɔnga gea: « Eya! Mɔkɔta-Mokonga a k'ɔma nde. Eme kétu kuubha. » 17 Áoba na kɔbɔbɔkɔ áɔyɔnga te: « Ɔma nde aobá́ngisa phɛ̂! Nna ɔma nɛngbo, tɔndɔ endu ndea Mokonga na kǐo á na kobha! » 18 Áojujuka mɔkɛsuɛ, áɔbhɛda ɛtɛ nde atu ka monga nɛkɛ, áocuma bea makɔɔ́u. Áodukia gamba ka mɔ̌ i gea te, ábɛ ɛtɛ á bonjánja 19 Aɔɔphana ɔma ndɔ Bhɛtɛ́lia. Ina á kenombe ndɔ dátu phɔ Lúsi 20 Mpɔ Yakɔ́bɔ *áɔɔpha be: « Aoba Mokonga n'aiki k'imoci n'eme, n'amoambi ka tamba nɛmɔ, aobá́ n'amopi kema sina nde neoea, n'inde nɛɔɔla, 21 aobá́ na neji na bɔjɛjɛ mɔtɛa abhɛ, cɔ, Mɔkɔta-Mokonga abande Mokonga nɛmɔ. 22 Ɛtɛ nde décumi na dukia na gamba, abande endu ndea Mokonga. Nemophande phɔtɔ gbutuka moci á nkama á nkumba bhui nde amopaeka. »