Isáka ambhisii ndiu Yakɔ́bɔ njaga
27
1 Cɔ, Isáka áophoma. Iso akɛ áodakekanaga, kabɛ ye kɔ̌napha. Áɔmɔphana miki nɛkɛ ímbɔ ange : « Ɛsáu » Áobeekea: « Eme yɛ. » 2 Isáka â goto ongodea te : « Ɔka phɔ, nephomí ye, kéuubha esa á kukua ani. 3 Cɔ, bhɛda bǔku á nsɔa na mange, ógɛ k'aphe á kongusa. Óbhikǎmbɛ k'ani na nyama. 4 Ɔmba kani ea nde aotena soki, nnde nekondi, óbhikɛ k'ani ně. Neye oeaga, nekobhisiande njaga mosa á kukua ani. »5 Kǎi Lɛbhɛ́ka dátu ɔ̌ka bii Isáka dáɔyɔnga na Ɛsáu. Ɛsáu áoga k'osaa k'aphe á kongusa. 6 Lɛbhɛ́ka áongodea anakɛ Yakɔ́bɔ gea te: «Nɛtɔ́ɔki abhakɔ n'aongodea phomi akɔ Ɛsáu: 7 ‹ Bhika kani na nyama, ɔɔmbɛ kani ea nde aotena soki kagea te neeɛ. Nebhisande njaga ani gǔ akɔ mosa á *Mɔkɔta-Mokonga, mosa á kukua ani. › 8 Cɔ, mukuamɔ, ɔ́mɔɔka anja na tɔtɔkisa kema nde neokososea. 9 Ga k'ekombo á bamɛmɛ, óbhikɛ kani na bakeemba á bamɛmɛ bánjánja babɛ. Nɛmɔ̌mbɛande abhakɔ ea á tena soki bíndɔ akondi. 10 Onkumbiande abhakɔ kagea á eɛ, na ákobhisiɛ njaga mosa á kukua akɛ. »
11 Yakɔ́bɔ áonsikisia amakɛ te: « Ɛsáu asɛmbi. Cɔ, éme gǎkɛ kɛsɛmbi. 12 Kabɛ abhɛ n'amobabi, n'akanisi gea te nɛntɛbhigi, kebɛku ye ka bhisia ani njaga. Nebande ndiu ka sɛmɛaga ani. » 13 Amakɛ áongodea: « Sɛmɛaga nɛkɔ ábɛ gǔ ani mukuamɔ. Kabondɔ, ɔ́mɔɔka, ógoboɛ kani bakeemba á bamɛmɛ ndɔ. » 14 Mpɔ, Yakɔ́bɔ áoga ɔ̌bhɛda, áǒbhika ně k'amakɛ. Amakɛ áɔɔmba ea á tena soki bíndɔ Isáka dáokonda. 15 Lɛbhɛ́ka dátu k'endu na bhɔngɔ anja ndea Ɛsáu miki nɛkɛ mmbɔ ange. Áɔmɔ̌lisa Yakɔ́bɔ mmbɔ miki nɛkɛ juɛbɛ, 16 áokombea m'bɔmbɔ na kingo akɛ na nkeke á bakeemba á bamɛmɛ ndɔ. Nga, dákatu na saa. 17 Mbusa, áobhisa ka njaga miki nɛkɛ Yakɔ́bɔ ea á tena soki na mokati nde dáɔmbi. 18 Áoga ondhonda abhakɛ, áongea : « Abhɛ.» Abhakɛ áongea : «Miki nɛmɔ éme yɛ. Cɔ, ómongodea, onde ani? » 19 Yakɔ́bɔ áonsikisia te: « Eme Ɛsáu ambé, miki nɛkɔ ange. Nɛtɔtɔkisi kema nde otómososi. Cɔ, bhika óikɛ ka gea óeɛ ka nyama nɛmɔ. Mbusa, óbhisɛ njaga akɔ gǔ ani.» 20 Isáka áomúsia: «Miki nɛmɔ, ɔtɔi tɔ nyama kɛ̌kɛ nde? » Áonsikisia te: « Mɔkɔta-Mokonga, Mokonga nɛkɔ amobhisiima k'aphe. »
21 Isáka áongodea Yakɔ́bɔ: «Cɔ, sɛkɛda bhíbhí ani, néobabɛ ka gea nedigimisɛ gea onde miki nɛmɔ Ɛsáu. » 22 Yakɔ́bɔ áɔnsɛkɛdɛa abhakɛ, Isáka áom'babaga, áongea: « K'ɛsɔ, ande ɛsɔ á Yakɔ́bɔ. Ka, ngobho, ande ngobho á Ɛsáu. » 23 Dákamǔbhi Yakɔ́bɔ. Nga, ngobho akɛ dana na saa bea ngobho á Ɛsáu. Mosa á bhisia akɛ njaga, 24 â goto omúsia: « Onde miki nɛmo Ɛsáu doni? » Yakɔ́bɔ áobeekea: « Eya. »
25 Mpɔ, Isáka â goto ongodea: «Cɔ, ómopa nyama á kongusa nɛkɔ ka gea te neeɛ na bhisa njaga ani gǔ akɔ miki nɛmɔ. » Yakɔ́bɔ áomopha abhakɛ ea, áoeaga. Áomopha makana anjɛ, áonoa. 26 Isáka áongodea: «Miki nɛmɔ sɛkɛda koni, ómokombeɛ na umbia ani. » 27 Yakɔ́bɔ áɔsekɛda, áomumbia. Isáka áɔ̌ka su á bhɔngɔ nɛkɛ, áobhisa njaga akɛ gǔ á Yakɔ́bɔ, áongodea be: « Eya, su á miki nɛmɔ á bea su á ciko nde Mɔkɔta-Mokonga abhisii njaga.
28 ‹ Cɔ, Mokonga ákophɛ makaka á na kobha,
na odo nde aophondisa mbo.
Nganɔ na makana anjɛ ábikɛ.
29 Bakpa báobhɛdaneɛgɛ,
batɔa ka mokonda bágbukɛ muanku mosa akɔ,
óbɛ mɔkɔta ndea badhakɔ,
bágbukɛ muanku mosa akɔ.
Bánsɛmɛɛgɛ mmbe aɔkɔsɛmɛaga,
bábhisɛ njaga gǔ á mmbe abhisi njaga gǔ akɔ. › »
30 Bii Isáka agɔbi bhisa á njaga akɛ gǔ á Yakɔ́bɔ, Yakɔ́bɔ áotoka bhíbhí akɛ. Ka mbenɔ ndɔ tɔ unge phomi akɛ Ɛsáu dáji k'aphe á kongusa. 31 Yɛ â phɔtɔ ɔɔmba ea á tena soki, áombhikia n'abhakɛ. Áongodea: « Cɔ, abhɛ, ómesia, óeɛ nyama á kongusa nɛmɔ nnde nekobhikii ně. Mpɔ, óbhisɛ njaga akɔ gǔ ani. » 32 Abhakɛ Isáka áomúsia gea : « Onde ani? » Áonsikisia: «Nende Ɛsáu miki nɛkɔ ange.»
33 Měma á Isáka áokpanga kpɔkpɔma phɛ̂, áomúsia: « Ani mbe aɔmbima nyama á kongusa, áomoisa bhui mosa á kidia akɔ mmbɔ ambe nebhisi njaga ani gǔ akɛ, néonsuiaga.»
34 Bii Ɛsáu aɔki nyɔngɔ nde abhakɛ ayɔngi, nyɔngɔ ndɔ áonkaea ka měma phɛ̂. Áokoga, áongea abhakɛ: « Bhisa phɔ njaga akɔ gǔ ani. » 35 Isáka áonsikisia: « Mɔtɔakɔ abhikima omodhema, nebhisi njaga ani gǔ akɛ k'ɔma nɛkɔ. » 36 Ɛsáu áongea: « Ina ndɔ Yakɔ́bɔa angɔni. Nga, amodhemi mɔngɔ íbɛ. Dábhɛdi phɔ kɔkɔta nɛmɔ á ko ange. Cɔ, babhisi njaga gǔ akɛ k'ɔma nɛmɔ.» Â goto omǔsia: « Kaojiganei tanda bhisa á njaga akɔ mɔngɔ ímoci gǔ ani? » 37 Isáka áonsikisia Ɛsáu: «Nemophi Yakɔ́bɔ ábɛ mɔkɔta nɛkɔ, nemophi bamunamakɛ bɔbhu bábɛ babhɛdanigi nɛkɛ. Nemophi phɔtɔ nganɔ na makana anjɛ. Keye ɔtɔka na negi kema k'obɛ. »
38 Ɛsáu áongodea abhakɛ: « Abhɛ, ande gea te ɔtɔ na kɔkɔta á bhisia nkpa njaga mɔngɔ ímoci? Bhisa phɔtɔ njaga akɔ gǔ ani abhɛ nɛmɔ. » Ɛsáu áogama n'ěsɔ akpɛ. 39 Mpɔ abhakɛ Isáka áonsikisia:
« Oikande danga na odo nde ana nsɛphɔ,
oika goto danga na makaka nde a na kobha.
40 Oendande ka nkósó nɛkɔ.
Ɔmbhɛdaneagande mɔtɔ akɔ.
O ye ndiu ɔkɔba,
ambe ophui kɔkɔta nɛkɛ
ka kingo akɔ. »
Yakɔ́bɔ ati, áoga mɔtɛa nɔkɔ akɛ Labháni
41 Cɔ, Ɛsáu áonkangea Yakɔ́bɔ ka nyɔngɔ nde abhakɛ dámbhisii njaga. Ɛsáu áongea: « Abhɛ aye bhíbhí á kukua, mpɔ nemoa yetɔ mɔtɔ̌ Yakɔ́bɔ. » 42 Bii Lɛbhɛ́ka dáubhi mosenda á miki nɛkɛ ange, áɔmɔphana miki nɛkɛ ímbɔ juɛbɛ áongodea be: « Phomi akɔ Ɛsáu aogea ákomoɛ ka nyɔngɔ á gisia. » 43 Kabondɔ miki nɛmɔ, ɔka nyɔngɔ nde neokongodea. Toka oani, ógɛ ɔ́sɔmɛanɛ mɔtɛa phomi ani Labháni ka Alani. 44 Óikɛ na yɛ ko na ka bii esuia ndea phomi akɔ asiande. 45 Esuia nɛkɛ aye osia gǔ akɔ, na bosea á nyɔngɔ nde dóngii, mpɔ nentekande nkpa ko ka kabaga akɔ. Ka boni nemaokusana benu babɛ?
46 Lɛbhɛ́ka áongodea Isáka: « Kena maseye á enda ka nyɔngɔ á bake á baniki amɔ Ɛsáu bunde baseka baÍti. Aoba Yakɔ́bɔ n'ambǔ ka baseka baÍti k'eyamani, enda ani ana kantiti sina? »