Isáka na Abhimɛlɛ́ki
26
1 Cɔ, nja dágu ka nji n'atingani n'índɔ dágu ka matu ndea Abhalaámu. Isáka áoga mɔtɛa Abhimɛlɛ́ki moamɛ á baPhilistíni ka Gɛlali. 2 *Mɔkɔta-Mokonga áɔnsɛ́nɛkɛa na ngodea akɛ be: « Kogɛmbɛ ka Mísii, ika ndiu ka nji nde nekophangiande. 3 Ika ka nji kau. Nebande k'imoci n'obɛ, nebhisande njaga ani gǔ akɔ nga, nɛtɔtɔkisande mɔkɔ nde demɔku abhakɔ Abhalaámu, ka nyɔngɔ nde nekophande obɛ na basuko akɔ nji ndɔ bhui. 4 Nebikisande ɛbɔkɔti nɛkɔ bea basɛɛngɔa á na kobha. Neophande nji nde bhui. Ka nyɔngɔ abɔ aunge nebhisande njaga ani gǔ á ɛbɔkɔti bhui á ka mokonda, 5 nga, Abhalaámu dámɔɔki, áoamba nyɔngɔ nɛmɔ, ɛɔphi nɛmɔ, moangɔ nɛmɔ na kema bhui nde déonsosea. »6 Kabondɔ, Isáka áoika ka Gɛlali. 7 Batɔa ka nji ndɔ dábaomúsiaga Isáka ka nyɔngɔ á nkakɛ. Áosikisa gea te: « Muna mma a ámbɔ. » Dáobanga yɔnga te Lɛbhɛ́ka ande nkakɛ ka gea batɔa ka nji ndɔ bámoande nga, Lɛbhɛ́ka dátu anjánja phɛ̂.
8 Isáka dáiki oa esa ásǐ. Esa moci, Abhimɛlɛ́ki moamɛ ndea baPhilistíni dáɔɔnjia ka boenga, áɔmɔ̌na Isáka n'aogea masɛnga na nkakɛ Lɛbhɛ́ka. 9 Abhimɛlɛ́ki, áɔmɔphana Isáka áongea: « Ande nkakɔ doni! Ɔtɔ yɔngima gea te ande munamakɔ ka bo? » Isáka áosikisa te : « Nɛ́yɔngima bo kagea kekuɛmbɛ ka nyɔngɔ akɛ. » 10 Abhimɛlɛ́ki â goto ɔyɔnga : « Otosogima bo kabo? Cɔ, atúoba ka bakpa nɛmɔ n'atombu nkakɔ, ámbe békengi ka bojede? »
11 Mpɔ, Abhimɛlɛ́ki áôsosea bakpa bɔbhu gea: « Ɔkani: nkpa bhuakɛ mmbe aɔmbhɛda ka nkpa nde na nkakɛ bamoande. »
12 Ka saga ndɔ Isáka áokona mbo ka ciko, áodungua mɔngɔ mia moci (100), á mbo nde atókoni. Nga, Mɔkɔta-Mokonga dámbhisii njaga ka nji ndɔ. 13 Ɛtɔi nɛkɛ áobika, na kabii dátu ntɔi phɛ̂. 14 Dátu n'ekombo á bamɔgɔgɔ, bamɛmɛ, bangɔmbɛ na babhɛdanigi básǐ.
Isáka aɔngani na Abhimɛlɛ́ki
BaPhilistíni báonkangea Isáka, 15 báotumisa ntogɔ bhui na odo. Ntogɔ ndɔ, ande nnde babhɛdanigi ndea abhakɛ Abhalaámu dábatongi ka enda akɛ. 16 Mpɔ, Abhimɛlɛ́ki áongodea Isáka: « Ǒsopímbii phɛ̂, cɔ, toka oa. »
17 Isáka áotoa oa, áoga ka mpenga á Gɛlali, áoika ko. 18 Bantogɔ nde dabatongigi mbenɔ nde abhakɛ Abhalaámu dáoenda, baPhilistíni dábadaki mbusa á kukua á abhakɛ. Isáka â goto otongeaga ntogɔ ndɔ, â tɔɔphana ka ina nde abhakɛ dasǔgu.
19 Esa ímoci, babhɛdanigi ndea Isáka dábatongi ntogɔ ka mpenga ndɔ, báodhonda ntoɔ á ibo. 20 Babondigi banyama á na Gɛlali, báǒsanisa babondigi banyama ndea Isáka; báǒgea: « Ibo ndeasu aunge. » Isáka aɔɔphana ntogɔ ndɔ Ɛsɛ́ka, nga dábansanisi. 21 Babhɛdanigi ndea Isáka báotongea ntogɔ nɛngbo, bâ goto tɔ osanea. Isáka aɔɔphana nndɔ Sitínab. 22 Báotoa oa, báoga otongea ntogɔ á ko isaɔ nnde dábakasanei. Isáka aɔɔphana nndɔ Lɛɔbhɔ́tic. Â yetɔ oyɔnga gea: « *Mɔkɔta-Mokonga asogbaemisi, ka gea bébɛ na bokambia ka nji nde. »
23 Isáka áɔmɛa oa, áoga ojua na Bhɛ́li-Sɛ́bha. 24 Kǐpha ndɔ, Mɔkɔta-Mokonga áɔnsɛnɛkɛa áongea: « Kobangɛmbɛ. Nga, nende Mokonga nde ba abhakɔ Abhalaámu. Ne kimoci n'obɛ, nebhisande njaga ani gǔ akɔ. Nebikisande ɛbɔkɔti nɛkɔ ka nyɔngɔ á mbhɛdanigi nɛmɔ Abhalaámu. » 25 Isáka aɔphɛka ɛtɛ-ɔphɛɔ oa, aɔmɛma Mɔkɔta-Mokonga. Áɔphɛkisa ngbangba nɛbɔ, babhɛdanigi nɛkɛ báotongea ntogɔ.
26 Abhimɛlɛ́ki áɔmɛa ka Gɛlali k'imoci na dhakɛ Ausati na Phikɔ́li mɔkɔta á batɔa emani ndeakɛ, báɔngɛndɛa Isáka. 27 Isáka áǒbuisia: «Dóbomokangei na beaga ani mɔtɛanu, ekende bobhikii mɔtɛamɔ? » 28 Báonsikisia te: «Bɛɔni bhase gea, Mɔkɔta-Mokonga a kimoci n'obɛ. Kabondɔ unge, beodengemisigi gea, ambe bɛ́ɔnganɛni, 29 ka gea, kǒsogeɛ éka ajede, bíndɔ dabekekogi ajede. Gea, débekogii tɔ bonjanja na beokodeketa ogɛ ka bɔjɛjɛ. Cɔ, kɛ̌kɛ nde Mɔkɔta-Mokonga akobhisii njaga akɛ. » 30 Isáka áɔbɔngisaga kabɔ jaí, baoega na noa. 31 Mama i, báojujuka kamimba phɛ̂, báonusanaga esomba moci ka dhakɛ. Mpɔ, Isáka áɔ̌ɔkɔa, báokatana ka bɔjɛjɛ.
32 Esa ndɔ tɔ, babhɛdanigi ndea Isáka báobhika ɔntɔmia mbino á ntogɔ nde dábatongi gea: « Bedhondi ibo. » 33 Isáka aɔɔphana ina á ntogɔ ndɔ Sɛ́bhad. Kabondɔ unge, ina á kenombe ndɔ baɔɔphana Bhɛ́li-Sɛ́bhae na ka k'esa nde.
Eyamani ndea Ɛsáu