Nkpangeɔ 25

Ekombo ndea Abhalaámu

1 Abhalaámu áom'boa nke bangbó, ina akɛ Kɛtúla. 2 Áɔm'bɔkɔtɛa baniki: Jimuláni, Yɔkisáni, Mɛdháni, Midhiáni, Isibháki na Súa. 3 Yɔkisáni dám'bɔkɔti Sɛ́bha na Dhɛdháni Basuko á Dhɛdháni dábatu batɔa na Asúu, baLɛtúsi na baLɛúmi. 4 Bana Midhiáni dábatu: Ɛ́pha, Ɛphɛ́li, Anɔ́ki, Abhídha na Ɛ́ldha. Bunde bɔbhu dábatu basuko á Kɛtúla.

5 Abhalaámu dámophi Isáka nkumba nɛkɛ bhubhui. 6 Â gǎkɛ kǒpha bana bake nɛkɛ bangbó kebu. Mbenɔ nde dá phɔ́tɔ koenda, áǒteka bɔ gea te báikɛ ka nji moci á n'okomo, danga na miki nɛkɛ Isáka. 7 Abhalaámu dáendi basaga mia moci nkama ngia á njaga íbɛ̌ na bɔku (175). 8 Mbusa á enda esa ásǐ, na phoma ka bonjánja, mpɔ, áodhondana na batatakɛ ka kukua. 9 Isáka na Isumaíli bana Abhalaámu, báomǔmba abhabɔ ka kubhu á okanga á ka Makipɛ́la njenjene na Mamúlɛ. Kubhu á okanga ndɔ dátu ka ciko ndea Ɛphulɔ́ni, muna Sɔáli ntɔa k'ekuna á Íti. 10 Abhalaámu dásombi ciko ndɔ mɔtɛa baÍti. Oa unge, dábamǔmbi Abhalaámu, na nkakɛ Sála. 11 Mbusa á kukua á Abhalaámu, Mokonga áobhisa njaga gǔ á anakɛ Isáka. Isáka áoika bhíbhí á ntogɔ á ka Laái-Lɔ́i.

12 Cɔ, ɔnani ɛbɔkɔti ndea Isumaíli, muna Abhalaámu. Isumaíli, amakɛ Agai dátu nseka á ka Mísii, nkɔbɛ ndea Sala. 13 Ka beana n'ɛbɔkɔti nɛbɔ, ina á baniki-bǒko ndea Isumaíli aunge: Nɛbhayɔ́ti a ámbé ande ange, Kɛdhali, Adhibhɛ́li, Mibhusamu, 14 Misíma, Dhúma, Masa, 15 Ádhadhi, Tɛ́ma, Yetúli, Naphísi na Kedhɛ́ma. 16 Bundɔ baunge bande baniki-bǒko ndea Isumaíli. Dábatu cina á batɔa k'ekuna nkama na íbɛ (12). Boiki abɔ na nji nɛbɔ dáǔbhikana ka ina abɔ. 17 Isumaíli dáendi basaga mia moci nkama isaɔ na ngia á njaga íbɛ (137) mpɔ, áodhondana na batatakɛ ka kukua. 18 Basuko á Isumaíli dábaiki ka kakɔɔ á Aphíla na Súli. Súli ndɔ a bhíbhí á Mísii, ka ga na Asulía. Dábakatanigi gǎkɛ k'ɔma á buiki nɛbɔ na basuko á Abhalaámu bunɛngbo.

Bɔkɔtɛana á Ɛsáu na Yakɔ́bɔ

19 Cɔ, ɔkani nyɔngɔ á Isáka:

Isáka dátu muna Abhalaámu. 20 Mbenɔ nde Isáka dána basaga nkama gena (40) áom'boa nkakɛ Lɛbhɛ́ka, munamakɛ na Labháni ntɔa ka Alámu. Lɛbhɛ́ka dátu nseka ndea Bhɛtuɛ́li, ntɔa ka Alámu á ka Padháni-Alámu. 21 Lɛbhɛ́ka dátu ngomba, kabondɔ unge Isáka dan'dengemisigi *Mɔkɔta-Mokonga ka nyɔngɔ á nkakɛ. Mɔkɔta-Mokonga áobeekea ɛmɛmi nɛkɛ, Lɛbhɛ́ka áokumba éme á baphase. 22 Baniki ndɔ, dábaogbondoanaga subi á sɔphɔ á amabɔ. Amabɔ áɔyɔnga te: «Cɔ, nnde a subi á sɔphɔ ani, ande eke? » Áoga omúsia Mɔkɔta-Mokonga. 23 Mɔkɔta-Mokonga áongodea te:

« Ɛbɔkɔti á bakpa babɛ ba subi á sɔphɔ akɔ.

Bɔbhu babɛ, bákatanagande ka bɔkɔtɛana abɔ.

Imoci abande akpɛkpɛ kɔnyɛnya dhakɛ,

ange ambhɛdaneagande mɔtɔakɛ. »

24 Aju ka mbenɔ á onja akɛ, Lɛbhɛ́ka âtɔ ônja baphase. 25 Ange dátu anjɛnjɛ, nkeke akɛ bhui n'asɛmbi, báɔmɔphana Ɛsáu. 26 Mbusa akɛ, mɔtɔakɛ áɔbɔkɔtɛana n'andhungi ka cina á ecinji. Báonsua ina á Yakɔ́bɔ. Dábabɔkɔteani, Isáka n'aye na basaga nkama ngia á njaga (60).

27 Baniki-bǒko ndɔ báɔmɔta. Ɛsáu dákondi nyɔngɔ á osaa, áoba ngusa a kpɛkpɛ phɛ̂. Yakɔ́bɔ â ndiu oba ntɔa phɔngɔ, áokonda nɛkɛ ika mɔtɛakɛ. 28 Cɔ, Isáka dánkondi Ɛsáu nga, dáobhebha nyama. Lɛbhɛ́ka â gǎkɛ onkonda nɛkɛ Yakɔ́bɔ.

29 Esa moci, Yakɔ́bɔ dáɔ̌mba ibo-eambi á mbuka bea maalaki, Ɛsáu áotoka k'osaa n'aɛi phɛ̂. 30 Ɛsáu áongodea Yakɔ́bɔ: « Keyeɔ̂tɔkɛa, neodengemisigi, nénoɛ phɔ k'ibo-eambi anjɛ nde cɛɛ! » Ka nyɔngɔ índɔ aunge dábansu magombo Ɛdhɔ́mu. 31 Yakɔ́bɔ áongodea: « Ómosombisia phɔ kɔkɔta nɛkɔ á ko ange. » 32 Ɛsáu â goto ongodea: « Eya, nesoo odusukana na nja. Kɔkɔta nɛmɔ á ko ange amoengande k'eke? » 33 Yakɔ́bɔ áongodea: «  Noa phɔ kani mosa esomba. » Mpɔ, Ɛsáu áonoa esomba áonsombisia kɔkɔta akɛ á ko ange. 34 Oa, Yakɔ́bɔ áomopha Ɛsáu mokati na ibo-eambi. Ɛsáu aigi na noa, mpɔ áoga. Kabhisɛ ye kantiti ka kɔkɔta nɛkɛ á ko ange.