Tɔmɛa á Isáka nke
24
1 Abhalaámu dáphomi phɛ̂. *Mɔkɔta-Mokonga dámbhisii njaga ka kema bhui. 2 Esa moci, Abhalaámu áongodea mbhɛdanigi nɛkɛ ímbɔ akǎ phɛ̂, mmbe dáoanga nkumba á k'endu nɛkɛ bhui gea: « Kukumisa njaga akɔ kusi á kɛbhɛ ani. 3 Nekonusande gǎkɛ esomba k'ina á Mɔkɔta-Mokonga, Mokonga á na kobha na mokonda gea, kom'boɛeka ka baseka á ka Kanána nji nde béiki kau, ómopha moganda nɛmɔ k'eyamani. 4 Ogande ndiu ka nji nɛmɔ áɔbɔkotɛana, na k'ekombo nɛmɔ ka tɔmɛa miki nɛmɔ Isáka nke. »5 Mbhɛdanigi áongea: « Kabɛ gǎkɛ nke kayɛ na kakondi bea ani ka nji nde, nensikianagande na moganda nɛkɔ ka nji nde dótoki kau? » 6 Abhalaámu áoya. Áongea: « Ɔ́ɛnjiambɛ anja ka ja na moganda nɛmɔ ko. 7 Mɔkɔta-Mokonga, Mokonga á na kobha mmbe dámotoisi ka nji nɛmɔ ábɔkɔtɛana, phɔtɔ k'endu ndea abhɛ, dámɔɔphani áɔmɔɔphisa gea, amopande nji nde ka basuko amɔ. Yɛ sasa akɛ a ámbé antekande malaeka nɛkɛ mosa akɔ. Ko unge ɔntɔ́mɛande gǎkɛ moganda nɛmɔ nke. 8 Kabɛ nke na kakondi bea akɔ, esomba nde nekonusi, kaɔbhɛdɛku. Cɔ, konjɛ mɔnɔ na moganda nɛmɔ ko. » 9 Mpɔ mbhɛdanigi áokukumisa njaga akɛ kusi á kɛbhɛ á mɔkɔta nɛkɛ Abhalaámu, áonoa esomba ka nyɔngɔ ndɔ. 10 Mbhɛdanigi áɔ̌bhɛda ka bangamia ndea mɔkɔta nɛkɛ nkama. Â phɔtɔ ɔbhɛda kema ndea mɔkɔta nɛkɛ nnde a ánjánja bhui ka kɔkɔta akɛ. Áɔmɛa, áoga na Mɛsɔpɔtamía, nji ndea Naɔ́li.
11 Bii aju ka ngba nji, áɔ̌gbutisa bangamia bhíbhí á ntogɔ. Datu ɔgɔgɔ, mbenɔ nde bake báobhika odhogaga ibo. 12 Oa, áɔmɛma be: « Mɔkɔta-Mokonga mmbe ba a mɔkɔta nɛmɔ Abhalaámu. Nekodengemisigi, ɔ́mɔbɛtisa phɔ n'ephiphi anja k'esa nde. Ɔ́tɔtɔkisɛ phɔtɔ bonjánja nɛkɔ ka mɔkɔta nɛmɔ Abhalaámu. 13 Ɔ́mɔ̌na phɔ bhíbhí á ntogɔ, ɔma nde baseka á batɔa ka nji nde báobhika odhogaga ibo. 14 Cɔ, miki á nseka nde nengodeande: ‹ Kadengedenge, yɛgɛtisa phɔ mbik'íbo nɛkɔ ka gea nénoɛ ibo ›, n'amosikisiande: ‹ Noa. Neophande phɔtɔ bangamia nɛkɔ ibo ›, mmbɔ ambɔ ɔnsɔmbu ka mbhɛdanigi nɛkɔ Isáka. Kabondɔ unge neubhande gea ɔtɔtɔkisi bonjánja nɛkɔ ka mɔkɔta nɛmɔ. » 15 Na kagɔbɛimbɛ yɔnga, miki á nseka moci áɔsɛnɛka, ina akɛ Lɛbhɛ́ka muna Bhɛtuɛ́li, mosuko á Míika, na munyakɛ Naɔ́li, munamakɛ na Abhalaámu. 16 Dátu ngɔji á miki á nseka, mmbe dákadhondanimbɛ na mǒko. Aodhidha na ntogɔ, áotumisa mbik'íbo nɛkɛ, â goto otaia.
17 Mbhɛdanigi ndea Abhalaámu áokamisaga ga á dhondana nayɛ, áongea: « Kadengedenge, omopa phɔ k'ibo ndɔ a ka mbik'íbo nɛkɔ, nenoɛ. » 18 Lɛbhɛ́ka áonsikisia gea: «Mɔkɔta, noa ibo. » Áokamisaga yɛgɛtisa á mbik'íbo, áomopha ibo. Yɛ, áonoa. 19 Agɔbi ye opha akɛ ibo, áongea: «Nedhogande phɔtɔ nnde á bangamia nɛkɔ na ka bii ɛnɔta ěsiande. » 20 Áokamisaga dukia á ibo bhui á ka mbik'íbo subi á kema á nusa na banyama ibo. Â goto okamisaga ga a dhoga a ibo na ntogɔ ka nusa a bangamia bhɔbhu. 21 Mbhɛdanigi áontumia nseka ndɔ n'iso ka gea te, kabɛ n'ande mbɛa, kabɛ n'ande doni gea Mɔkɔta-Mokonga angami ka tamba nɛkɛ.
22 Bii bangamia bagɔbi ye noa a ibo, mbhɛdanigi áomopha nseka ndɔ nsobe íbɛ á ɔ́lɔ angbongbo, n'ana bodoko bea gaama mía moci, na nsobe nɛngbo moci abhɔbhɔa á bhisa akɛ k'ɛɔ, n'ana bodoko bea gaama ngia á njaga. 23 Aongea: «Nekodengemisigi, omongodea, onde nseka nde ba ani? Bebande n'ɔ̌ma á tɔ̌ mɔtɛa abhakɔ? » 24 Aonsikisia: «Nende muna Bhɛtuɛ́li, mosuko á Naɔ́li na Míika. » 25 Â goto ongea: « Bena ɔma á tǒ ásǐ. Be phɔtɔ na kasa ka isa a banyama na nnde a desa abɔ kau. »
26 Mpɔ mbhɛdanigi áogbuka muanku akɛ mosa á Mɔkɔta-Mokonga, áombhebha. 27 Aogea: « Obhebhɔ ka Mɔkɔta-Mokonga, Mokonga ndea mɔkɔta nɛmɔ Abhalaámu. Nga, nnaodeketa tɔtɔkisa á bonjanja nɛkɛ mɔtɛa mɔkɔta nɛmɔ. Amɔsɔndɔi tɔ, ecinji ani áoga ongia k'endu ndea munamakɛ na mɔkɔta nɛmɔ. »
28 Mpɔ nseka áoga mbangɔ, áɔntɔmiaga amakɛ nyɔngɔ ndɔ bhui. 29-30 Lɛbhɛ́ka dátu na phomia akɛ ina akɛ Labháni. Dáɔni nsobe bhui: nnde a abhɔa k'ɛɔ á munamakɛ, nnde angbóngbo ka m'bɔmbɔ akɛ. Dáɔki phɔtɔ nyɔngɔ nde mbhɛdanigi dángodi nseka. Áoga mbangɔ ka dhondana na nkpa ndɔ. Áondhonda na bangamia nɛkɛ bhíbhí á ntogɔ. 31 Áongea: « Bhika mɔ̌tɛsu, obɛ ímbɔ Mɔkɔta-Mokonga akobhisii njaga. Ekende omamei ka ngba? Eme sasani, ne ye ɔyi ɔma á tɔ̌ na bɔngisia á ɔma ka bangamia nɛkɔ. »
32 Mpɔ mbhɛdanigi ndea Abhalaámu áongia k'endu. Labháni áokisisa nkumba gǔ á bangamia, baǒisisa kasa, na ɔyia kasa nde báoda kau. Â phɔtɔ omopha mbhɛdanigi, na bakpa nde dábabhiki na yɛ, ibo ka sokosa ecinji. 33 Báomopha ea, â ndiu ogea: « Kéɛgɛku na kɛtɔ̌mimbɛ nyɔngɔ nde ne ně. » Mpɔ Labháni áongea: «Cɔ, tɔ̌mia. » 34 Nkpa ndɔ áongea: «Nende mbhɛdanigi nde ba Abhalaámu. 35 Mɔkɔta-Mokonga, ambhisii mɔkɔta nɛmɔ njaga phɛ̂, áoba na boombia. Áomopha ɛtɔi ásǐ: bamɔgɔgɔ, bamɛmɛ, bangɔmbɛ, bangɔa na ɔ́lɔ, bangamia na bamponda. Â phɔtɔ omopha, babhɛdanigi, bake na bǒko. 36 Nkakɛ Sala, dám'bɔkɔtɛi miki ka kophomi, mmbe mɔkɔta nɛmɔ dámophi nkumba nɛkɛ bhubhui. 37 Dámonusi esomba áongea: ‹ Kom'boɛeka moganda nɛmɔ nke, nseka á ka batɔa ka Kanána, nji nde béiki kau. › 38 Kabondɔ, dámogi: ‹ Ɔ́mɔnɔɛa esomba ka ga k'ekombo nɛmɔ, k'endu ndea abhɛ, k'aphe á bɔɛa moganda nɛmɔ nke. › 39 Déngodi gǎkɛ mɔkɔta nɛmɔ gea: ‹ Cɔ, a gǎkɛ oba nke kayɛ na kakondi bea ani koni! › 40 Áomosikisia: ‹ Mɔkɔta-Mokonga mmbe aomotambisa ka enda ani, antekande malaeka nɛkɛ k'imoci n'obɛ, atɔtɔkisande tamba nɛkɔ anja. Ɔm'bɔɛande moganda nɛmɔ nke k'ekombo nɛmɔ, k'endu ndea abhɛ. 41 Mbenɔ nde ogaeka k'ekombo nɛmɔ, nanga kɔtɔi kema. Cɔ, iɔnga nɛmɔ kaɔbhɛdɛku. › 42 K'esande, neju ye gǎkɛ bhíbhí á ntogɔ, nɛ́ɔmɛma be: ‹ Mɔkɔta-Mokonga, Mokonga nde ba a mɔkɔta nɛmɔ Abhalaámu, tɔtɔkisa phɔ anja tamba nde dékpangi. 43 Ɔ́mɔ̌na phɔ, ne bhíbhí á ntogɔ. Cɔ, miki á nseka nde akidianande k'aphe á dhoga á ibo, mmbe nengodeande: “Ómopa k'ibo á ka mbik'íbo nɛkɔ.” 44 Â gǎkɛ omosikisia: “Noa pɛ sasakɔ. Nedhogande phɔtɔ ka bangamia nɛkɔ.” Mpɔ neubhande ye tɔ nke sina mmbe Mɔkɔta-Mokonga ambhisii moganda ndea mɔkɔta nɛmɔ. › 45 Nɛ kɛ́gɔbɛimbɛ ɛmɛmi ka měmani, Lɛbhɛ́ka áɔsɛnɛka, n'akumbi mbik'íbo k'ɛkɔta. Aodhidha na ntogɔ k'aphe á dhoga á ibo. Néongea: ‹ Kadengedenge, ómopa ibo á onoa. › 46 Áokamisaga kisa mbik'íbo nɛkɛ k'ɛkɔta, áomogea: ‹ Noa ibo, něnusande phɔtɔ bangamia nɛkɔ. › Mpɔ néonoa, â phɔtɔ ǒpha bangamia nɛmɔ ibo. 47 Mbenɔ nde nemǔsi gea onde nseka ndea ani? Áomosikisia: ‹ Nende nseka nde ba Bhɛtuɛ́li, muna Naɔ́li, munya Míika. › Mpɔ néongisa nsobe abhɔbhɔa k'ɛɔ, nnde a gǎkɛ angbongbo, áongisa ka m'bɔmbɔ. 48 Mpɔ néogbuka muanku ani mosa á Mɔkɔta-Mokonga, néombhebha. Néondokomisa Mɔkɔta-Mokonga, Mokonga ndea mɔkɔta nɛmɔ Abhalaámu. Mmbe amɔsɔndɔi, nê tɔ oga dhɛ! Ka ga á tɔmɛa moganda ndea mɔkɔta nɛmɔ nseka k'ekombo nɛkɛ. 49 Cɔ, ómongodeani pɛ, aobá́ n'obobeeki doni na phangia á bonjánja ka mɔkɔta nɛmɔ. Kabɛ n'ǎna bo, ómongodeani pɛ. Negɛ, kabɛ njaga á nkei, kabɛ njaga á mǔku. »
50 Mbusa á ɔka nyɔngɔ ndɔ, Labháni na Bhɛtuɛ́li báonsikisia gea: «Nyɔngɔ nde atoki ka Mɔkɔta-Mokonga, besu béketenɛku kau. 51 Cɔ, Lɛbhɛ́ka a ambɔ a mosa akɔ. Nga ně, abɛ nka moganda ndea mɔkɔta nɛkɔ, bíndɔ Mɔkɔta-Mokonga ayɔngi. » 52 Mbhɛdanigi ndea Abhalaámu aɔki ye nyɔngɔ ndɔ, áogbuka muanku akɛ mosa á Mɔkɔta-Mokonga, áombhebha. 53 Mbusa, áophuia subi á nkumba nɛkɛ, nsanga á ngɔa na nnde á ɔ́lɔ, na bhɔngɔ, áomopha Lɛbhɛ́ka. Â phɔtɔ ǒpha aɔakɛ n'amakɛ, nsanga ésombi akpɛ. 54 Mbhɛdanigi ndea Abhalaámu na bakpa nde dábhiki na bɔ, báoeaga, báonoa, mpɔ báoga oda.
Bajujuki ye, mbhɛdanigi ndea Abhalaámu áǒngodea: «Cɔ, ómososeani pɛ néjɛ mɔtɛa mɔkɔta nɛmɔ. » 55 Aɔakɛ na Lɛbhɛ́ka n'amakɛ, báongea: «Nseka agande mbusa, n'deketa phɔ béikɛ naye abhɔa, k'esa bea nkama.» 56 Mbhɛdanigi áǒgea: « Bókomoiphisɛgɛmbɛ, Mɔkɔta Mokonga amogami ka tamba nɛmɔ. Nekondi bómososeɛ néjɛ mɔtɛa mɔkɔta nɛmɔ. » 57 Mpɔ báongea: «Cɔ, bɛ́mɔphanɛ nseka sasakɛ, bémǔsiɛ. »
58 Báɔmɔphana Lɛbhɛ́ka, báomǔsia: « Okondi ógɛ na nkpa nde? » Áǒsikisia gea: « Eya, negande. » 59 Báondeketa munamabɔ Lɛbhɛ́ka, áoga na mbhɛdanigi ndea Abhalaámu na bakpa nɛkɛ. 60 Báonsuiaga munamabɔ, báongea:
« Lɛbhɛ́ka, obɛ ambe ogě,
ɔ́bɔkɔtambɛ baniki m'bimbika-m'bimbika. nɛkɔ
énganganeɛgɛ na kenombe á babibia akɔ! » 61 Mbusa, Lɛbhɛ́ka áoma na bunde bage onenga, báokambea gǔ á bangamia, báom'bea nkpa ndɔ. Mbhɛdanigi áɔmbhɛda, baoga.
62 Ɔgɔgɔ, Isáka dáoja na ntogɔ nnde báɔɔphana Laai-Lɔ́i. Dáiki ka kenombe á Nɛgɛ́bhu. 63 Esa ímoci ɔgɔgɔ, Isáka dáge otambaga ka ciko. Amaki tɔ iso, áɔ̌bɔna bangamia na basɛnɛki. 64 Bii Lɛbhɛ́ka amɔ̌ni Isáka, áǒcicima ka odo, 65 áongodea mbhɛdanigi: «Nkpa sina mbe abhiki osobondeaga ka ciko? » Áonsikisia: « Ande mɔkɔta nɛmɔ. » Mbenɔ ndɔ tɔ, Lɛbhɛ́ka áɔbhɛda phaeka á bhɔngɔ nɛkɛ, áǒgbukumia ně ka keongi. 66 Mpɔ mbhɛdanigi ndɔ áɔntɔmiaga Isáka nyɔngɔ bhubhui nde dátɔtɔkisi. 67 Mbusa, Isáka áongisa Lɛbhɛ́ka k'endu nde amakɛ Sala dáiki kau. Yɛ, áoba nkakɛ, áonkonda. Nga, dámphui bɔmbɛ á kukua á amakɛ.