Kukua na úmba á Sala
23
1 Cɔ, mbenɔ nde Sala dátu na basaga mia moci nkama íbɛ na ngia á njaga íbɛ (127), 2 dáku na Kiliati-Alabha ande gea te Ɛbhulɔ́ni ka nji á Kanána. Abhalaámu áobhisa kekusa á nkakɛ Sala, áongameaga. 3 Mpɔ, áǒmesia bhíbhí á mǒnda á nkakɛ, áoga ɔyɔngaga na baÍti. 4 Áǒngodea gea: «Nende mɔkɛni mɔtɛanu, neiki oani ka mbenɔ ábhɔa. Ómosombisiani ɔma néumbɛ mǒnda á nkani.» 5 BaÍti báonsikisia Abhalaámu gea: 6 « Mɔkɔta, ɔ́sɔɔka phɔ. Mokonga akobhisi moamɛ sɔsɔbɛ asu. Sɔmbɔa ka ɔma nɛsu nnde a ánja ka umba nkakɔ, nga, nna na ka besu nde akɔkpɛmɛande na ɔma á umba nkakɔ.»7 Ka matu ndɔ, baÍti baunge dábatu bakô á nji. Mpɔ, Abhalaámu áǒmesia, áoga ogbuka muanku mosa abɔ, 8 áǒngodea be: « Áoba n'obobeeki doni néumbɛ mǒnda á nkani, ɔ́mɔɔkani phɔ. Bóngodeɛ kani Ɛphulɔ́ni muna Sɔali 9 ámosombisiɛ kubhu ókanga nɛkɛ á Makipɛ́la nnde a ka ta ciko nɛkɛ. Átenɛ kani esombi i mosa anu ka gea te kubhu ókanga ndɔ abɛ nɛmɔ. »
10 Ɛphulɔ́ni moÍti dáiki gǎkɛ ka nkindi k'ekombo nɛkɛ. Áonsikisia Abhalaámu k'ɛsɔ akpɛ ka gea te, baÍti bɔbhu bunde dábatu ka ntua báɔkɛ. 11 Áongodea gea: «Mɔkɔta, nna bo. Ɔ́mɔɔka phɔ. Nekophi ciko, néokopha kubhu ókanga nde a kau. Nekophi mosa á batɔa k'ekombo nɛmɔ, umba mǒnda a nkakɔ.»
12 Abhalaámu â goto ogbuka muanku akɛ mosa á batɔa ka nji. 13 Mpɔ, áongodea Ɛphulɔ́ni mosa á batɔa ka nji bɔbhu gea: « Kadengedenge, nékophɛ bangɔa k'esombi á ciko. Beekea kani u, mpɔ neumbande mǒnda á nkani.» 14 Ɛphulɔ́ni â gǎkɛ onsikisia Abhalaámu gea: 15 « Mɔkɔta, ɔ́mɔɔka phɔ. Odo á esombi á gbutu-gbutu á bangɔa mia gena (400) aphɔ kema sina sɔsɔbɛ ani n'obɛ? Umba mǒnda á nkakɔ.» 16 Abhalaámu báɔɔkana na Ɛphulɔ́ni. Áomopha gbutu-gbutu á bangɔa mia gena nnde dáyɔngi mosa á baÍti. Bangɔa ndɔ basombisigi-nkumba dábaɔbhɛdanaga ně ka matu ndɔ.
17 Kabondɔ, ciko ndea Ɛphulɔ́ni nnde á ka Makipɛ́la n'okomo á Mamúlɛ: ciko, kubhu ókanga nde a kau, na bame nnde a ka moɔ á ka ciko áoba ndea 18 Abhalaámu, mosa á baÍti bunde dábatu ka ntua.