Abhalaámu ambhisi Isáka ka phɛa
22
1 Mbusa índɔ, Mokonga áombhisa Abhalaámu mosa á tombaga, áɔmɔphana: « Abhalaámu. » Áonsikisia: « Eme yɛ. » 2 Mokonga â goto ongodea gea: «Mbhɛda kakɔ miki-mǒko nɛkɔ ngɔmu, Isáka mmbe onkondi. Ógɛ ka nji á Mɔlia, nga, oa, nekophangiande ka bamamba ndɔ moci nde ontoboande Isáka ka nyama á phɛa gǔ i.»3 Mama i, Abhalaámu dájujuki mɔkɛsuɛ. Áobhomaga sake á toboa phɛa, áobhisa ka ngɔngɔ á mponda nɛkɛ. Mpɔ, áɔmɛa k'imoci na miki-mǒko nɛkɛ Isáka na babhɛdanigi bǒko babɛ, báoga ɔma nde Mokonga dámphangi. 4 K'esa á ko isaɔ, Abhalaámu áomesia mɔ̌ akɛ, áɔ̌na ɔma ndɔ danga. 5 Déngodi babhɛdanigi nɛkɛ bǒko gea: « Benu, ikani oani kimoci na mponda. Eme na Isáka betaiande gǔ ka bhebha á Mokonga. Mbusa béonojiia. » 6 Abhalaámu dábhɛdi sake á toboa phɛa, áonkumbisa miki-mǒko nɛkɛ Isáka. Yɛ sasakɛ áɔbhɛda nsa na mbakɔ. Mpɔ, báotutuisa tamba bhɔbhu babɛ.
7 Isáka áomúsia abhakɛ Abhalaámu gea: « Abhɛ. » Abhakɛ áonsikisia: « Moko, nemaɔkɔɔka.» Isáka âgoto ongodea: «Cɔ, bena sake, béoba na nsa. Cɔ, miki á mɔgɔgɔ á toboa ka phɛa ama koni? » 8 Áonsikisia: «Moko, Mokonga yɛ sasakɛ ěkabeande mɔgɔgɔ á toboa akɛ ka phɛa.» Mpɔ, báotutuisa tamba bhɔbhu babɛ.
9 Mbenɔ nde dábakidi k'ɔma nde Mokonga dámphangi, Abhalaámu áophɛka ɛtɛ ɔ́phɛɔ béi, áobhisa sake gǔ i. Áom'boaga miki-mǒko nɛkɛ Isáka, áon'desa gǔ á sake ɛtɛ ɔ́phɛɔ. 10 Mɔngɔ ímoci Abhalaámu, áoboa mbakɔ ka gea ántenɛ miki-mǒko nɛkɛ ka kingo. 11 Mpɔ, malaeka ndea *Mɔkɔta-Mokonga ka toka na kobha áɔmɔphana: « Abhalaámu! Abhalaámu! » Yɛ áobeekea: « Eme yɛ. » 12 Malaeka áongodea: « Konanoembɛ njaga gǔ á miki-mǒko nɛkɔ ngɔmu, konkambɛmbɛ na kema. Kɛ̌kɛ nde neubhi gea oom'banga Mokonga, nga kɔnkpɛmi na miki-mǒko nɛkɔ ngɔmu.»
13 Mɔngɔ ímoci Abhalaámu áɔmɔ̌na mǔku á mɔgɔgɔ na ndeka akɛ n'ɛ̌gɔi ka me. Mpɔ, áoga ɔmbhɛda, áontena, áontoboa k'ɔphɛɔ k'ɔma á miki-mǒko nɛkɛ. 14 Abhalaámu áosua ɔma ndɔ: «Mokonga ěkabeande. » Kabondɔ unge báɔyɔnga k'esande: « Ka mamba á Mɔkɔta-Mokonga ěkabeande. »
15 Na kobha, malaeka ndea Mɔkɔta-Mokonga â goto ɔmɔphana Abhalaámu. 16 Áongodea gea: « Mɔkɔta-Mokonga anyɔngi be: ‹ Nɛɔphi k'eme sasani ka nyɔngɔ nde ɔtɔtɔkisi kema ndɔ. Nga k'ɔmɔkpɛmɛi na miki-mǒko nɛkɔ ngɔmu, 17 eya, nebhisande njaga ani gǔ akɔ. Nebikisande ɛbɔkɔti nɛkɔ bea basɛɛngɔa á na kobha, na bɛa mbume á k'ɔbɛɛ á k'obenge. Ɛbɔkɔti nɛkɔ báenganganeagande na nji ndea á babibia nɛbɔ. 18 Ka nyɔngɔ abɔ aunge nebhisande njaga ani gǔ á ɛbɔkɔti á ka mokonda bhui nga, dóbeeki ɛsɔ ani. › » 19 Mpɔ, Abhalaámu áǒjia babhɛdanigi nɛkɛ bǒko, báoga kimoci nci a na Bhɛ́li-Sɛ́bha nga, Abhalaámu dáoikaga na Bhɛ́li-Sɛ́bha.
Baniki ndea Naɔ́li
20 Mbusa á kema ndɔ, dábangodi Abhalaámu gea: Míika ěonji phɔtɔ ka munamakɔ Naɔ́li baniki-bǒko. 21 Miki-mǒko ange dátu Úsi, bamɔtɔakɛ dábatu Bhúji, Kɛmuɛ́li mmbe dám'bɔkɔti Alámu, 22 Kɛsɛ́dhi, Ájɔ, Piidhasi, Idhilaphu, na Bhɛtuɛ́li. 23 Bhɛtuɛ́li dám'bɔkɔti Lɛbhɛ́ka, baniki-bǒko ngia á njaga isaɔ (8) ndɔ, baunge Míika déonji ka Naɔ́li munamakɛ na Abhalaámu. 24 Lɛúma, nke bangbó á Naɔ́li dɛ́bɔkɔti phɔtɔ kakɛ baniki: Tɛ́bha, Gaamu, Taasi na Maaka.