Bɔkɔtɛana á Isáka
21
1 *Mɔkɔta-Mokonga abhisa njaga akɛ gǔ á Sala, bíndɔ dáyɔngi. Áɔtɔtɔkisa nnde dámɔku. 2 Sala áokumba éme ka matu nde Mokonga dámbhisii, áomonjea Abhalaámu miki-mǒko moci nanga bii Abhalaámu dátu yetɔ phomi. 3 Abhalaámu áonsua miki nde Sala dámonjei ina á Isáka. 4 Áongusa ganja k'esa á ko ngia á njaga isaɔ (8) bíndɔ Mokonga dánsosi. 5 Abhalaámu dátu na basaga mia moci (100) ka bɔkɔtɛana á Isáka. 6 Mpɔ, Sala áoyɔnga gea: « Mokonga amɔtɛbhisia na maseye. Bakpa bɔbhu bunde baɔkande nyɔngɔ á Isáka, batɛbhande kimoci n'eme. 7 Animbe dángodeaeka Abhalaámu, esa moci Sala ěungisaeka baniki? Nanga éme demonjei miki-mǒko ka kophomi akɛ.»Abhalaámu am'bigi Agai na Isumaíli
8 Isáka áɔmɔta, Sala áonginisa ɛbɛ. Ka nyɔngɔ índɔ unge Abhalaámu dáɔmbisi ea ásǐ.
9 Abhalaámu dátu na miki nɛngbo, Isumaíli mmbe Agai nseka á ka Mísii dámonjei. Ɛsa moci Sala dámɔ̌ni Isimaɛ́li n'aonkinia Isáka. 10 Mpɔ, Sala áongodea Abhalaámu: « M'beaga mbhɛdanigi nke nde na anakɛ. Miki nde nnaɔtɔka n'atɔi botikɔ kimoci na miki-mǒko nɛmɔ Isáka.»
11 Nyɔngɔ ndɔ áonkangɛa Abhalaámu phɛ̂, ka nyɔngɔ nde Isimaɛ́li dátu phɔtɔ anakɛ. 12 Mpɔ Mokonga áongodea Abhalaámu: «Nyɔngɔ ndɔ kaokangeɛmbɛ ka phɔa miki nɛkɔ mǒko na mbhɛdanigi nɛkɔ nke. Beekea tɔtɔkisa kema bhui nde Sala atokongodi. Nga, ka nyɔngɔ á Isáka a unge obande n'ɛbɔkɔti ásǐ nnde dɛ̌kɔɔku. 13 Ka mmbe gǎkɛ miki-mǒko ndea mbhɛdanigi nɛkɔ nke, nemophande phɔtɔ ɛbɔkɔti nga ande anakɔ. »
14 Abhalaámu áojujuka mɔkɛsuɛ, áomopha m'pimbo na kema á dhogea n'ibo na baoki na mpokɔ na tumisi n'ibo, áomopha Agai. Áonkumbisa miki ka ngɔngɔ, áom'beaga. Agai áoga n'aǒtambeaga ka nkanda á Bhɛ́li-Sɛ́bha. 15 Mbenɔ nde ibɔ dási ka kema ndɔ, áon'deketa miki kusi á iimbiɔ á me. 16 Mpɔ, áoga oika danga n'abhɔa bea mɛtɛɛ mia moci. Áoianaga sasakɛ gea: « Kekondi nɛ́ɔnɛ bii miki nɛmɔ aokua.» Mpɔ, áotobokea ngamɔ. 17 Mokonga dáɔki ngamɔ á miki. Toka na kobha, Malaeka ndea Mokonga áomophana Agai: « Ekema? Kobɛmbɛ na kɔbɔbɔkɔ. Nga, Mokonga aɔki ngamɔ á miki ɔma nde a béi. 18 Ómesia, onkakamisɛ miki ka měma, nga nembhisa nde abha-ɛbɔkɔti ásǐ. Ka nyɔngɔ akɛ nebikisande ɛbɔkɔti. » 19 Mokonga áoukua iso á Agai, áɔɔna ntogɔ, áotumisa kema á ibɔ ndɔ n'ibo, áonusa miki nɛkɛ ibo.
20-21 Mokonga áonamba miki, na yɛ áɔmɔta. Áoika ka nkanda á Palani, áoba ngusa akpɛkpɛ phɛ̂. Amakɛ áom'busa nseka á ka Mísii, áoba nkakɛ.
Abhalaámu aɔngani na Abhimɛlɛ́ki
22 Ka matu ndɔ, Abhimɛlɛ́ki moamɛ á ka Gɛlali na Phikɔ́li mɔkɔta á batɔa émani ndeakɛ, áoga ongodea Abhalaámu gea: «Mokonga akimoci n'obɛ ka kema bhui nde oogea. 23 Cɔ, kɛ̌kɛ nde, ɔpha kani k'ina á Mokonga ka gea kɔmɔtɔngaeka, éme, baniki amɔ kabɛ basuko amɔ. Sumbia bii dékogi anja, ómogea phɔtɔ anja éme, na nji nde oiki kau bea mɔkɛni.» 24 Abhalaámu áongea: «Nɛɔphi. »
25 Abhalaámu dányenyi Abhimɛlɛ́ki ka nyɔngɔ á ntogɔ moci nde babhɛdanigi ndea Abhimɛlɛ́ki dábeengangeanigi ně. 26 Abhimɛlɛ́ki áonsikisia: « Keuubha animbe dági ndɔ. Na ka k'esande obɛ sasakɔ kómongodi tanda na dɛ́kɛɔki gǎkɛ kau.» 27 Kabondɔ, Abhalaámu áɔ̌bhɛda bamɔgɔgɔ, bamɛmɛ na bangɔmbɛ áomopha Abhimɛlɛ́ki. Mpɔ, bɔbhu babɛ báɔɔngana. 28 Abhalaámu áǒphaphɛa bake á bamɔgɔgɔ ngia á njaga íbɛ (7). 29 Abhimɛlɛ́ki áomúsia Abhalaámu: « Ǒphaphi bamɔgɔgɔ ngia á njaga íbɛ ka nyɔngɔ eke? » 30 Abhalaámu áonsikisia: « Ɔ́bhɛda bake á bamɔgɔgɔ ngia á njaga íbɛ abande kema á mǔbhisɔ ka gea, éme ambe détongi ntogɔ nde. » 31 Ka nyɔngɔ ndɔ unge, dábasǔ ɔma ndɔ Bhɛ́li-Sɛ́bhab ka gea bɔbhu babɛ dábaɔngani.
32 Abhalaámu na Abhimɛlɛ́ki dábaɔngani ka Bhɛ́li-Sɛ́bha. Mbusa i, Abhimɛlɛ́ki na Phikɔ́li mɔkɔta á batɔa emani, báosikianaga ka nji á baPhilistíni. 33 Abhalaámu dákoni ka Bhɛ́li-Sɛ́bha me nde báɔɔphana tamaisi. Áotobea ina á *Mɔkɔta-Mokonga, Mokonga á mɛyɔ. 34 Abhalaámu dáendi esa ásǐ phɛ̂ ka nji á baPhilistíni.