Mokonga atɔ̌mi gea Sala amonjande miki-mǒko
18
1 *Mɔkɔta-Mokonga dánsɛnɛkɛi Abhalaámu kusi á bame angbongbo á Mamúlɛ, mbenɔ nde dáiki k'iso á mpume á ɛ́ma nɛkɛ somani, mani n'aobɛta akpɛ phɛ̂. 2 Abhalaámu áomesia iso akɛ, áɔ̌bɔna bǒko basaɔ na bamamege mosa akɛ. Bii dɛ́bɔni, dáge mbangɔ ka dhondana nabɔ, kpanga k'iso á mpume á ɛ́ma nɛkɛ, áǒgbuka sua odo. 3 Aongodea kabɔ moci: «Nekodengemisigi, keta mɔtɛamɔ. 4 Ómodeketani nébhikɛ kanu na ibo abhɔa, bósokosɛgɛ n'ecinji, mbusa bǔmbiande kusi á me nde. 5 Nenóphande ea á opha anu bukpɛkpɛ ka tutuisa tamba nɛnu. Nga, ka nyɔngɔ índɔ unge benu bɔnyɛnyi mɔtɛamɔ, eme mbhɛdanigi nɛnu. » Báonsikisia: « Eya, tɔtɔkisa tɔ bíndɔ ɔyɔngi.» 6 Mpɔ Abhalaámu áokamisaga ja subi á ɛ́ma ka ngodea Sala: « Kamisaga. Bhɛda ntuna isaɔ á mpusu á nkɛkɛ, bɔngisiaga ka mokati. » 7 Mbusa, Abhalaámu dáge mbangɔ k'ɔma étuge, dámbhɛdi mǔku á ngɔmbɛ anjánja n'anɔni, áomopha mbhɛdanigi nɛkɛ mǒko, mmbe dákamisigi ɔmba akɛ.8 Bii nyama dábhidi ye, Abhalaámu dábhɛdi ibo ɛbɛ n'ěkpatu, na nnde a ǎdhɛdhɛ, áobhisa mosa abɔ. Áomamaga ka mphɛphɛ abɔ, bɔ, na báoeaga kusi á me. 9 Cɔ, bakɛni báomusia Abhalaámu: «Nkakɔ, Sala a koni? » Áǒsikisia: « A subi á ɛ́ma.» 10 Ka bakɛni ndɔ moci áongea: « Ka saga nde aobhika, nebhikande goto mɔtɛakɔ, nkakɔ Sala abande na miki-mǒko. »
Sala dáɔki nyɔngɔ ndɔ, na mamege k'íso á mpume mbusa á Abhalaámu. 11 Abhalaámu na Sala dábaphomi. Sala dákaonjɛku ye. 12 Sala áɔtɛbha sasakɛ, áongea: « Ai! Eme nephomi ye, na mǒko nɛmɔ phɔtɔ. Kɛ̌kɛ nde ka kophomi, nɛtɔkande ba na maseye na onja á baniki? » 13 Kabondɔ Mɔkɔta-Mokonga áongodea Abhalaámu: « Ka nyɔngɔ sina nde Sala atɔ́tɛbhi? Áogea: ‹ Netɔkande ba na miki ka ko phomi? › » 14 Kema sina nde a gǎkɛ ontua Mɔkɔta-Mokonga tɔtɔkisa i? Saga nde aobhika, ka mbenɔ nde, nebhikande mɔtɛakɔ, Sala abande na miki-mǒko. 15 Sala áoba na kɔbɔbɔkɔ, áongana: «Nndakɛ, kɛtɛbhi.» Mɔkɔta-Mokonga áongodea: « Eya, ɔtɔ́tɛbhi.»
16 Mpɔ, bakpa báǒmesia ka ga, báoenga nkɛkɛɔ á Sɔdhɔ́ma. Abhalaámu áotamba na bɔ ka phangiaga abɔ. 17 Cɔ, Mɔkɔta-Mokonga áɔyɔnga: «Nɛnsɔmɛɛande Abhalaámu kema nde negeande? 18 Yɛ, abande abha-ɛbɔkɔti angbó na batɔa akpɛkpɛ. Ka nyɔngɔ akɛ unge, nebhisande njaga ani gǔ á ɛbɔkɔti bhui á ka mokonda bhui. 19 Nga, dɛ́nsɔmbu ka gea ésoseɛ baniki-bǒko nɛkɛ, na bakpa bɔbhu á k'endu nɛkɛ, baambɛ moangɔ nɛmɔ mbusa akɛ. Ka tambea ka doni na bea á ɛɔphi nɛmɔ a unge Mɔkɔta-Mokonga atɔtɔkisande mɔkɔ nɛkɛ gǔ á Abhalaámu bíndɔ dámɔku.» 20 Mɔkɔta-Mokonga áɔyɔnga gea: «Ntabo gǔ á batɔa ka Sɔdhɔ́ma na Gɔmɔ́la a akpɛ phɛ̂. 21 Ambe nédhidhɛ kó, ka ɔna nnde bátɔtɔkisi. Aoba ntabo nde amodhondi nande doni, kabɛ nande mbɛa, neubhande.»
22 Bakpa ndɔ báotoka oa, báoga na Sɔdhɔ́ma. Abhalaámu â gǎkɛ ojiga na Mɔkɔta-Mokonga. 23 Abhalaámu áɔsɛkɛda bhíbhí á Mɔkɔta-Mokonga, áomúsia gea: « Ande gea te, ǒma tɔ batɔa bojede na bunde baka batɔa bojede? 24 Kabɛ subi á Sɔdhɔ́ma, batɔa doni na ba nkama bɔku (50), ande gea te ǒma tɔ batɔa ka nji bɔbhu, kanga á ima á bojede nɛbɔ, ka nyɔngɔ á batɔa doni nkama bɔku (50) bunde ba subii? 25 Nna tanda bo, kógeɛku kema bíndɔ. Emoa á batɔa doni na batɔa kanga doni, ka gea oteni yɔngɔ á batɔa doni sumbii nnde á batɔa kanga doni. Nna ɔtɔtɔkɛana gea, nteni-nyɔngɔ ndea ka mokonda bhui átenɛ nyɔngɔ kanga kodoni.» 26 Mɔkɔta-Mokonga áonsikisia: « Aoba nenědhondi batɔa doni nkama bɔku (50) ka Sɔdhɔ́ma, ka nyɔngɔ abɔ unge neimande bojede á batɔa ka kenombe ndɔ bhui.»
27 Abhalaámu â goto onsikisia, áongodea: « Kadenge-denge, ómokuia ngomi ka yɔnga n'obɛ, Mɔkɔta, eme ímbe na mpusu á odo, n'ebhǔ. 28 Kabɛ ka batɔa doni nkama bɔku (50), na bauki bakpa bɔku (5), ka nyɔngɔ á bakpa bɔku ndɔ unge otukatukande nji bhui? » Mɔkɔta-Mokonga áonsikisia: « Kétukɛtukɛku kenombe ndɔ kabɛ na nědhondi batɔa doni nkama gena na bɔku (45). »
29 Abhalaámu â goto ɔyɔnga: « Kabɛ gǎkɛ batɔa doni na ba nkama gena (40)? » Mɔkɔta-Mokonga áonsikisia: « Ka nyɔngɔ á batɔa doni ndɔ, kégeɛku ka kema.»
30 Mpɔ, Abhalaámu áɔyɔnga: «Nekodengemisigi Mɔkɔta, kɔbɛɛmbɛ aobá́ na nɛyɔngi goto, kabɛ batɔa doni na ba nkama isaɔ (30) ». Mɔkɔta-Mokonga áonsikisia: « Kegeɛku ka kema aobá́ na neědhondi oa batɔa doni nkama isaɔ (30). »
31 Abhalaámu áɔyɔnga: « Mɔkɔta, ómokuia ngomi ka yɔnga nɛmɔ. Kabɛ nǒdhondi nkama íbɛ (20). » Mɔkɔta-Mokonga áonsikisia: « Ka nyɔngɔ á bakpa nkama íbɛ (20) ndɔ, kétukɛtukɛku kenombe ndɔ.»
32 Abhalaámu â goto ɔyɔnga: « Mɔkɔta, nekodengemisigi, kɔbɛɛmbɛ, kabɛ na nɛyɔngi nyɔngɔ ímoci. Kabɛ nǒdhondande batɔa doni nkama (10)? » Mɔkɔta-Mokonga áonsikisa: « Ka nyɔngɔ á batɔa doni nkama (10) ndɔ, kétukɛtukɛku kenombe ndɔ.» 33 Mbenɔ nde Mɔkɔta-Mokonga agɔbi ye yɔnga na Abhalaámu, Mɔkɔta-Mokonga áoga, Abhalaámu áosikianaga mɔtɛakɛ.