Mokonga a anganisi ina á Abhalamu, áoba Abhalaámu
17
1 Mbenɔ nde Abhalamu dátu na basaga nkama ngia á njaga gena na ngia á njaga gena (99), *Mɔkɔta-Mokonga áɔnsɛnɛkɛa, áongodea: «Nende Mokonga Mɛna-Bukpɛkpɛ. Tamba mosa ani kanga kisɛki. 2 Nebhisande ɛɔphi nɛmɔ sɔsɔbɛ akɔ n'eme. Nebikisande ɛbɔkɔti nɛkɔ ásǐ phɛ̂. »3 Abhalamu áokpungbumana, áogbondoa endondo akɛ na odo, Mokonga â goto ongodea: 4 « K'eme, ɔna ɛɔphi nɛmɔ n'obɛ. Obande abha-ɛbɔkɔti ásǐ. 5 Bakakɔɔphanɛku ye k'ina á Abhalamu, ina akɔ abande ndiu Abhalaámu. Nga, nekobhisi abha-ɛbɔkɔti ásǐ. 6 Nekophande ɛbɔkɔti ásǐ phɛ̂. Báconjande ɛbɔkɔti ásǐ, na baamɛ bajuanande subi akɔ. 7 Nebhisande ɛɔphi nɛmɔ sɔsɔbɛ ani n'obɛ, na basuko akɔ mbusa akɔ, n'ɛbɔkɔti nɛbɔ bhuibhui ka basaga na basaga. Nebande Mokonga nɛkɔ na Mokonga ndea basuko akɔ ka basaga na basaga. 8 Nekophande obɛ na basuko akɔ nji nde oiki kau bea mɔkɛni. Ande gea te nji bhubhui á Kanána, ábɛ ɛtɔi nɛnu ka basaga na basaga. N'eme nebande Mokonga nɛbɔ.»
9 Mokonga âgoto ongodea Abhalaámu: « Oambande ɛɔphi nɛmɔ, obɛ na basuko akɔ n'ɛbɔkɔti nɛbɔ bhui. 10 Cɔ, ɔna ɛɔphi nɛmɔ nnde boambande sɔsɔbɛ ani na benu, obɛ, n'ɛbɔkɔti á mbusa akɔ. Mǒko bhuakɛ ka benu, *aguande ganja. 11 Bǒgusande ganja ka ngobho anu, nndɔ abande mphangiɔ moci ɛɔphi nɛmɔ sɔsɔbɛ ani na benu. 12 Miki-mǒko bhuakɛ, k'ɛbɔkɔti nɛnu, aguande ganja k'esa á ko ngia á njaga isaɔ (8) mbusa á onjokana akɛ. Nanga muna-nkɔbɛ mmbe aonjokani k'endu nɛnu, nanga nkɔbɛ mɔkɛni mmbe onsombi na ka k'ekombo nɛkɔ, baguande ganja. 13 Cɔ, nkɔbɛ nde aonjokani k'endu ndeakɔ, na mmbe bansombi na bangɔa, bégusande ganja. Mpɔ, ɛɔphi nɛmɔ abande ka ngobho anu ɛɔphi á iphia. 14 Mǒko mmbe kaguɛku ganja, bamphapheande na bakpa ka nyɔngɔ nde kabeekei ɛɔphi ndeamɔ. »
15 Mokonga â goto ongodea Abhalaámu: « Kɔ́mɔphanɛku ye nkakɔ k'ina á Salai. Kpanga á kɛ̌kɛ nde, ɔmɔphanande ndiu k'ina á Sala. 16 Nebhisande njaga gǔ akɛ. Ka yɛ goto unge nekophande miki-mǒko. Nebhisande njaga gǔ á nkakɔ, abande ama-ɛbɔkɔti ásǐ. Na bakɔta á ketoto danga-danga báonjokanande ka yɛ. » 17 Abhalaámu áokpungbumana, áogbondoa endondo akɛ na odo, áɔtɛbha na áɔyɔngaga: «Mǒko n'ana basaga mia moci (100), amonjande miki-mǒko? Sala abande na miki, n'aye na basaga nkama ngia á njaga gena (90)? » 18 Abhalaámu â gǎkɛ ongodea Mokonga gea: « Ambe Isumaíli ambe áendɛ mosa akɔ.» 19 Mokonga â ndiu ɔyɔnga gea: «Nna bo. Nkakɔ Sala a ámbé amonjande kakɔ miki-mǒko. Ɔmɔphanande k'ina a Isákaa. Nebhisande ɛɔphi nɛmɔ na yɛ bea ɛɔphi nde nna na sungiaga k'ɛbɔkɔti nɛkɛ mbusa akɛ. 20 Ka nyɔngɔ á Isumaíli gǎkɛ, dɛ́kɔɔki. Nebhisande njaga ani gǔ akɛ. Nemophande ɛbɔkɔti, na nebikisande phɛ̂. Abɔkɔtande bakɔta nkama na íbɛ, na nemophande ekombo angbo. 21 Nebhisande ndiu ɛɔphi nɛmɔ na Isáka, mmbe Sala akoonjeande ka saga nde aobhika na ka mbenɔ nde tɔndɔ.»
22 Mbenɔ nde Mokonga dágɔbi yɔngaga na Abhalaámu, Mokonga áondeketa, áotaia. 23 Mpɔ, Abhalaámu áɔm'bhɛda Isumaíli miki-mǒko nɛkɛ, na bunde dábaonjokani k'endu nɛkɛ, na bunde désombi na bangɔa bɔbhu. Mǒko bhuakɛ sɔsɔbɛ á bakpa á k'endu ndea Abhalaámu, k'esa ndɔ tɔ, áǒgusa ganja ka ngobho abɔ bíndɔ Mokonga dángodi. 24 Abhalaámu dátu na basaga nkama ngia á njaga gena na ngia á njaga gena (99), mbenɔ nde dágu ganja. 25 Miki-mǒko nɛkɛ Isumaíli dátu na basaga nkama na isaɔ (13), mbenɔ nde dágu ganja. 26 K'esa ndɔ tɔ moci, Abhalaámu na Isumaíli miki-mǒko nɛkɛ, báogua ganja. 27 Bǒko bɔbhu á k'endu nɛkɛ, bunde baonjokani k'endu nɛkɛ, na bunde ěsombi na bangɔa mɔtɛa bakɛni, bâ phɔtɔ ogua ganja kimoci na yɛ.