Bɔkɔtɛana á Isumaíli
16
1 Salai, nka Abhalamu dákamonjei miki. Dátu gǎkɛ na mbhɛdanigi nɛkɛ nke Agai, nseka á ka Mísii. 2 Salai áongodea munyakɛ: « Bii *Mɔkɔta-Mokonga dámoimisii onja á baniki, dani na mbhɛdanigi nɛmɔ nke, kǎsi omonjande kani miki-mǒko.» Abhalamu áobeekea ɛsɔ á Salai. 3 Mbusa á Abhalamu enda á basaga nkama (10) ka nji á Kanána, Salai nka Abhalamu dámbhɛdi mbhɛdanigi nɛkɛ nke Agai, nseka á ka Mísii, áomopha munyakɛ ábɛ nke nɛkɛ bangbó. 4 Abhalamu áoda na Agai. Agai áokumba éme. Bii Agai dáɔni gea ana éme, áɔm'bɛnjiaga mɔkɔta nɛkɛ Salai. 5 Mpɔ, Salai áongodea Abhalamu: «Mbhoma nde baomobhoma, ábɛ ka mɔ̌ akɔ. Ande eme ambé démbhisi mbhɛdanigi nɛmɔ nke ka njaga akɔ. Bii aɔni ye gea ana éme, kéyé kema k'iso akɛ. Ambe Mɔkɔta-Mokonga ábɛ nteni-nyɔngɔ sɔsɔbɛ ani n'obɛ.» 6 Abhalamu áonsikisia Salai: «Mbhɛdanigi nɛkɔ nke a kusi á kɔkɔta nɛkɔ. Ngeea bíndɔ okondi.»Mpɔ, Sala áokpanga tambisaga á Agai phɛ̂. Agai áontea, áoga ka nkanda. 7 *Malaeka ndea Mɔkɔta-Mokonga dándhondi Agai ka nkanda bhíbhí á ntogɔ nde a k'aphe á Súli. 8 Áomǔsia: « Agai, mbhɛdanigi-nke ndea Salai, otoki oani na ooga oani? » Agai áonsikisia: «Nenti Salai, mɔkɔta nɛmɔ nke.» 9 Malaeka ndea Mɔkɔta-Mokonga áongodea: « Ja mɔtɛa mɔkɔta nɛkɔ óbeekeɛ ika kusi á moangɔ nɛkɛ.» 10 Malaeka ndea Mɔkɔta-Mokonga áongodea: «Nebikisande ɛbɔkɔti nɛkɔ. Bakatɔkɛku na batangi. 11 Ona éme. Omonjande miki-mǒko. Onsuande ina á Isumaíli. Ka nyɔngɔ nde, Mɔkɔta-Mokonga aɔki nkogɔ á tambaga nɛkɔ. 12 Yɛ, abande bea mponda á k'osaa. Amanande na nkpa bhuakɛ, na nkpa bhuakɛ amanande nayɛ. Aendande sasakɛ, akatanande na bamunamakɛ. »
13 Agai áonsua Mɔkɔta-Mokonga mmbe dáyɔngi nayɛ ina á « Onde Ɛl-lɔ́i, Mokonga mmbe aɔmɔ̌na.» Nga, dáyɔngi gea: «Nɛmɔ̌ni phɔ doni mmbe aɔmɔ̌na? » 14 Kabondɔ unge báɔɔphana ntogɔ ndɔ: « Laai-Lɔ́i ». Ande gea: « Ntogɔ ndea mmbe aoenda na mmbe aɔmɔ̌na ». A sɔsɔbɛ á Kadhɛ́si na Bhɛlɛ́dhi. 15 Agai áomonjea Abhalamu miki-mǒko. Abhalamu áonsua Isumaíli. 16 Mbenɔ nde Agai amonjei Isumaíli, Abhalamu dátu na basaga nkama ngia á njaga isaɔ na ngia á njaga (86).