Mokonga agi iɔnga na Abhalamu
15
1 Mbusa índɔ, nyɔngɔ á *Mɔkɔta-Mokonga dánkidii Abhalamu ka njeki, áongodea be: « Abhalamu, kobɛmbɛ na kɔbɔbɔkɔ. Eme nende nguba nɛkɔ. Nekophande kebu angbó phɛ̂. » 2 Abhalamu áonsikisia: « O! Mɔkɔta-Mokonga, Mɔkɔta nɛmɔ, ekende oomopa? Eme kɛm'bɔkɔti miki. Ɛ́liɛjɛ́i mmbe a ka Dhamasíki, a ámbé abande miki á botikɔ a k'endu nemɔ.» 3 Abhalamu â goto ɔyɔnga gea: « Komopi ɛbɔkɔti, mmbe dábɔkɔtɛani k'endu nɛmɔ tɔndɔ aambé abande miki a botikɔ nɛmɔ. » 4 Mpɔ, nyɔngɔ á Mɔkɔta-Mokonga áonkidia gea: «Nna mmbe ambe abande miki a botikɔ nɛkɔ. Abande ndiu mmbe obɛ ɔm'bɔkɔtande. » 5 Mpɔ, Mɔkɔta-Mokonga áonjuanisa Abhalamu na nsɛngɛ, áongodea gea: «Cɔ, ɔnjia phɔ na kobha, ótangɛ basɛɛngɔa kabɛ n'ɔtɔkande tanga i.» Aongodea gea: « Bende unge ɛbɔkɔti nɛkɔ abikande.» 6 Abhalamu dábeeki nyɔngɔ ndea Mɔkɔta-Mokonga. Mɔkɔta-Mokonga áontanga bea ntɔa-doni.7 Mɔkɔta-Mokonga áongodea gea: «Nende Mɔkɔta-Mokonga, eme a ámbé dékophui na Úli á batɔa ka Kaadhɛ́a ka gea te, nekophɛ nji nde, ábɛ akɔ.» 8 Abhalamu áonsikisia: « Mɔkɔta-Mokonga, Mɔkɔta nɛmɔ, ekende neengekisande ně, gea abande nji nɛmɔ? » 9 Mɔkɔta-Mokonga áongodea gea: « Ɔ́m'bhɛda kani nka ngɔmbɛ moci, nka mɛmɛ moci, mǔku á mɔgɔgɔ, bɔbhu na bana basaga basaɔ-basaɔ, na etítí na miki á mboe.» 10 Abhalamu áǒbhika na banyama ndɔ bɔbhu, áǒbhomaga. Áobhisa phaeka phaeka abɔ na kɔɔnjianaga. Dákaebhomigi gǎkɛ bambǔ. 11 Bandia dábaokambea gǔ á mǒnda, Abhalamu áǒbeaga.
12 Cɔ, ka gɔgɔmana á esa, tɔ̌ áɔmbhɛda Abhalamu phɛ̂. Kindi na kɔbɔbɔkɔ angbó áɔm'bhɛda. 13 Mɔkɔta-Mokonga áongodea Abhalamu gea: « Ubha gea ɛbɔkɔti nɛkɔ baikande ka nji nde nna abɔ. Babande bakɔbɛ. Bétambisagande ka basaga mia gena (400). 14 Netenande ndiu akpɛ nyɔngɔ á bakpa nde babande ka kɔkɔbɛ nɛbɔ. Mbusa, bajuanande ko n'ɛtɔi ásǐ. 15 Cɔ, obɛ, ophomande ka bonjánja Okuande ka bɔjɛjɛ, mbusa báokuumba. 16 Ɛbɔkɔti nɛkɔ asikianagande oani k'ɛbɔkɔti á ko gena. Nga, bojede ndea batɔa ka Amɔ́li kasungiigimbɛ ka gea nébeɛgɛ.»
17 Mbenɔ nde mani dandǐ, kaiphiɔ angbó áobhika. Mpɔ, maki na ɛɛmbɛ á nsa áɔnyɛ́nya sɔsɔbɛ á phaeka-phaeka á ba nyama. 18 K'esandɔ, Mɔkɔta-Mokonga áobhisa ɛɔphi na Abhalamu, áongodea be: «Nji nde neǒphi ɛbɔkɔti nɛkɔ kpanga obenge á ka Mísii ka ga sungiaga k'obenge angbóngbo Ɛphulati. 19 Ande gea te, nji ndea batɔa ka Kɛni, na nnde á baKɛniji, na nnde á baKadhimɔni, 20 na nnde á baÍti, na nnde á baPɛliji, na nnde á baLɛphai, 21 na nnde á baAmɔ́li, na nnde á baKanána, na nnde á baGiigasi, na nnde á baYɛbhusi.»