Abhalamu na Mɛɛkisɛdhɛ́ki
14
1 Ka matu ndɔ, Amulaphɛ́li moamɛ á ka Mɛsɔpɔtamía, Aliɔ́ki moamɛ á ka Elasa, Kɛdhɔ́li-Laɔmɛ́li moamɛ á ka Ɛlamu, Tidhali moamɛ á ka Gɔímu, 2 dábamani na Bhɛ́la moamɛ á ka Sɔdhɔ́ma, Bhísa moamɛ á ka Gɔmɔ́la, Sinabhɔ moamɛ á ka Adhíma, Sɛmɛbhɛ́li moamɛ á ka Jɛbhuímu na moamɛ á ka Bhɛ́la, ande gea te Sɔali. 3 Baamɛ bɔku nde bɔbhu báogamana, báodhondanaga k'eembe á ka Sidhímu, ande gea te obenge á Mɔnɛi.4 Ka matu á basaga nkama na íbɛ (12), dábabeeki ika kusi á kɔkɔta ndea Kɛdhɔ́li-Laɔmɛ́li. Ka saga á ko nkama moci na isaɔ (13), dábaye gǎkɛ ika kusi á kɔkɔta nɛkɛ. 5 Ka saga á ko nkama na gena (14), Kɛdhɔ́li-Laɔmɛ́li, k'imoci na baamɛ bunde dágamani nabɔ, dáběkindi batɔa ka Lɛphaímu ka Asitɛlɔ́ti. Dábamani na batɔa ka Júji ka Amu, dábaekindi. Dábamani na batɔa ka Ɛmi ka ntanga á Kiliataímu dábaekindi. 6 Dábamani na batɔa ka Ɔli ka mamba nɛbɔ Sɛíi, dáběbiigi, dábage osungiaga na Ɛ́li-Palani nnde a bhíbhí á nkanda. 7 Mpɔ, báosikianaga, báojua ka Ɛini-Misɛpati, ande gea te Kadhɛ́si. Báomana na batɔa ka Amalɛki ka nji nɛbɔ bhui, báǒkinda. Bâ phɔtɔ omana na batɔa ka Amɔ́li bunde baiki ka Asasɔ́ni-Tamáli. 8 Cɔ, moamɛ á ka Sɔdhɔ́ma, moamɛ á ka Gɔmɔ́la, moamɛ á ka Adhíma, moamɛ á ka Jɛbhuímu na moamɛ á ka Bhɛ́la, ande gea te Sɔali, dábědhondanisigi batɔa-emani nɛbɔ k'eembe á Sidhímu ka manisa á 9 Kɛdhɔ́li-Laɔmɛ́li moamɛ á ka Ɛlamu, Tidhali moamɛ á ka Gɔímu, Amulaphɛ́li moamɛ á ka Mɛsɔpɔtamía, Aliɔ́ki moamɛ á ka Elasa. Baamɛ bɔku ndɔ, báomana na baamɛ gena. 10 Eembe á ka Sidhímu dátumi n'ejimba ásǐ nnde dátu na kabolembo subi. Bii moamɛ á ka Sɔdhɔ́ma na mmbe á ka Gɔmɔ́la dábati, báoguia kau, bunɛngbo báotea nci á mamba. 11 Bauka báǒnganganeaga n'ɛtɔi bhui á ka Sɔdhɔ́ma na Gɔmɔ́la na jue ea bhubhui. Mpɔ, báoga nɛbɔ. 12 Bâ phɔtɔ ɔm'bhɛda Lɔ́ti mɔyɛna á Abhalamu, mmbe dáiki na Sɔdhɔ́ma, báonga ně n'ɛtɔi nɛkɛ bhui.
13 Ka bunde dáti, moci áoga ongodea Abhalamu muƐbhulanía mbino ndɔ, mmbe dáiki bhíbhí á bame angbôngbongbo ndea Mamúlɛ. Mamúlɛ, ntɔa ka Amɔ́li munamakɛ na Ɛsikɔ́li na Anɛ́li bunde dábangami Abhalamu. 14 Bii Abhalamu dáɔki gea bandhungi mɔyɛna akɛ, áǒpha bakpa mia isaɔ nkama na ngia á njaga isaɔ (318) nkumba-émani. Bakpa ndɔ dábatu batɔa-okuu bunde á k'endu nɛkɛ. Báǒbea babibia, báogaojua na Dháni. 15 Abhalamu áǒkatanisaga batɔa-émani nɛkɛ ka gea te bébondokeɛ kǐpha. Yɛ na babhɛdanigi nɛkɛ báǒbeaga ka ga sungiaga na Ɔbha, nnde á gǔ á Dhamasíki. 16 Kabondɔ, áosikianaga n'ɛtɔi nɛkɛ bhui, â phɔtɔ onsikianaga na mɔyɛnakɛ Lɔ́ti n'ɛtɔi nɛkɛ, bake na batɔa-mekakɔ bunɛngbo.
17 Bii Abhalamu ankindi ye moamɛ Kɛdhɔ́li-Laɔmɛ́li na baamɛ nde dábagamani na yɛ, áosikianaga. Moamɛ á ka Sɔdhɔ́ma áoga odhondana na yɛ k'eembe á Saphɛ, ande gea te: « Eembe ndea Moamɛ.»
18 Cɔ, Mɛɛkisɛdhɛ́ki moamɛ á ka Salɛ́mu dátu ntobéi-phɛa ndea Mokonga mmbe á na kobha, dábhiki na mokati na makana anjɛ̌. 19 Áobhisa njaga akɛ gǔ á Abhalamu, áɔyɔnga be: «Mokonga á na kobha, mmbe aconji mokonda na kobha ábhisɛ njaga akɛ gǔ á Abhalamu. 20 Bosegi ka Mokonga mmbe á na kobha, mmbe débhisi babibia ndeakɔ ka njaga akɔ. » Mpɔ, Abhalamu áomopha nkama moci á mosunge bhui.
21 Moamɛ á ka Sɔdhɔ́ma áongodea Abhalamu: « Omopa bakpa ɔ́bhɛdɛ nɛkɔ ɛtɔi. » 22 Abhalamu áonsikisia: «Nɛɔphi k'ina á *Mɔkɔta-Mokonga, Mokonga á na kobha mmbe dáconji mokonda na kobha. 23 Nɛɔphi gea kɛ́bhɛdɛku tanda ka kema ndeakɔ, nanga aba muɛngɛ, kabɛ ngoi á beato. Kabondɔ unge kógeɛku: ‹ Eme ambé nemophi Abhalamu ɛtɔi. › 24 Kɛ́bhɛdɛku ka nkumba. Nebeeki tɔndɔ nnde baganda nɛmɔ dábai, na kebu á bagami ndeamɔ: Anɛ́li, Ɛsikɔ́li na Mamúlɛ, bundɔ baunge babhɛdande nɛbɔ. »