Abhalamu na Lɔ́ti bakatani
13
1 Abhalamu dátoki na Mísii, áoga nti á Nɛgɛ́bhu. Yɛ, nkakɛ n'ɛtɔi nɛkɛ bhui. Lɔ́ti áoga kimoci na yɛ.2 Abhalamu dátu ntɔi phɛ̂, k'etuge, ka bangɔa na ɔ́lɔ. 3 Áotutuisaga tamba, áojua ka Nɛgɛ́bhu. Ɔma nde dágbandu phɔ ɛ́ma nɛkɛ ka kaɔnga á Bhɛtɛ́li na Ai. 4 Ɔma ndɔ dáphɛki phɔ ɛtɛ-ɔ́phɛɔ. Oa, Abhalamu áotobea ina á *Mɔkɔta-Mokonga.
5 Lɔ́ti mmbe dáge kimoci na Abhalamu dátu phɔtɔ n'etuge abhɔbhɔbhɔa na nnde angbôngbongbo. Dátu phɔtɔ na ɛ́ma nɛkɛ ásǐ. 6 Bii nji ndɔ dɛ́bɔkanigi ně, dábakaiki ye k'ɔma ímoci. Nga, ɛtɔi nɛbɔ dábiki. 7 Sani dátu sɔsɔbɛ á babondigi etuge ndea Abhalamu na bunde á Lɔ́ti. Cɔ, ka matu ndɔ, batɔa ka Kanána na bunde á ka Pɛlɛ́si dábaiki gǎkɛ ka nji ndɔ. 8 Mpɔ Abhalamu áongodea Lɔ́ti: «Neodengemisigi, sani kabɛmbɛ sɔsɔbɛ ani n'obɛ, sɔsɔbɛ á babondigi etuge nɛmɔ na bunde akɔ, bende batɔa komunaměma. 9 Nji bhui a mosa akɔ. Cɔ, békatanɛ. Ooga njaga á nkei, néoga njaga á mǔku. O gǎkɛ oga njaga á mǔku, néoga njaga á nkei.»
10 Lɔ́ti dáɔnji, áɔɔna mpenga á Yɔɔdháni bhui ka ga sungiaga na Sɔai na ana ibo ásǐ. Mosa á Mɔkɔta-Mokonga tukatuka á Sɔdhɔ́ma na Gɔmɔ́la, ɔma ndɔ dátu bea *Paadhísɔ ndea Mɔkɔta-Mokonga bea mpenga á ɔba Níi ka Mísii. 11 Kabondɔ, yɛ Lɔ́ti aɔsɔmbɔa nɛkɛ mpenga á Yɔɔdháni áoga nci á n'okomo. Bondɔ unge dábakatanigi. 12 Abhalamu áojiga ka Kanána. Lɔ́ti â gǎkɛ oika ka kenombe á mpenga á Yɔɔdháni, áotoisa ɛ́ma ndeakɛ, áoga ocuma ka Sɔdhɔ́ma. 13 Tambea á batɔa ka Sɔdhɔ́ma dájɔɔkani phɛ̂, báoba na bojede mosa á Mɔkɔta-Mokonga.
14 Mbusa á Lɔ́ti katana na Abhalamu, Mɔkɔta-Mokonga áongodea Abhalamu: «Bii oiki, ɔnjia phɔ n'okomo, n'oyonga, gǔ na kusi. 15 Nji bhui nde ɔɔna, nekophande obɛ na basuko akɔ nkongopha. 16 Nebikisande phɔtɔ ɛbɔkɔti ndeakɔ bea mpusu á odo. Atuoba na baɔtɔka tanga á mpusu á odo, mmbe batu phɔtɔ ɔtɔka tanga á ɛbɔkɔti ndeakɔ. 17 Cɔ, tɔmba bondanda na bogbae á nji, nekophande u. »
18 Abhalamu áotoisa ɛ́ma ndeakɛ, áoga oika bhíbhí á bame á ngbóngbo á Mamúlɛ ka Ɛbhulɔ́ni. Oa, áɔmphɛkɛa Mɔkɔta-Mokonga ɛtɛ-ɔ́phɛɔ.