Mokonga amɔphani Abhalamu átoɛ ka nji nɛkɛ
12
1 *Mɔkɔta-Mokonga áongodea Abhalamu gea: « Cɔ, toka ka nji nɛkɔ áɔbɔkɔtɛana, k'ekombo nɛkɔ na k'endu ndea abhakɔ, ógɛ ka nji nde nekophangiande. 2 Nebikisande ɛbɔkɔti nɛkɔ phɛ̂, áoba na boombia ka mokonda. Nebhisande njaga ani gǔ akɔ. Neombisande ina akɔ. Obande cina á bhisa njaga ani gǔ á ɛbɔkɔti nɛngbo. 3 Nebhisande njaga ani gǔ á bundɔ babhisande njaga gǔ akɔ. Nɛ̌sɛmɛagande gǎkɛ bunde bakotambisagande. Ka nyɔngɔ akɔ unge nebhisande njaga ani gǔ á ɛbɔkɔti bhui á ka mokonda. »4 Oa, Abhalamu áotoka bíndɔ Mokonga dánsosi, Lɔ́ti áoga na yɛ. Abhalamu dátu na basaga nkama ngia á njaga íbɛ na bɔku ( 75 ), mbenɔ nde dátoki na Alani. 5 Abhalamu áɔmbhɛda nkakɛ Salai na mɔyɛnakɛ Lɔ́ti. Báokumba ɛtɔi nɛbɔ bhui na bakpa bɔbhu bunde dábatu nabɔ na Alani. Báoga na Kanána.
Baju ye na Kanána, 6 Abhalamu áotenisia ka nji á Sɛkɛ́mu, bhíbhí á me angbóngbo ndea Mɔlɛ. Ka matu ndɔ, batɔa ka Kanána baunge dábaiki ko.
7 Mɔkɔta-Mokonga áɔnsɛnɛkɛa Abhalamu, áongodea gea: «Nji nde unge neóphaeka ɛbɔkɔti nɛkɔ. » K'ɔma ndɔ, Abhalamu áɔphɛka ɛtɛ-ɔ́phɛɔ ka Mɔkɔta-Mokonga mmbe dánsɛnɛkɛi. 8 Mpɔ, áotoa oa, ka ga ka nji á mamba-mamba, nci á n'okomo á kenombe á Bhɛtɛ́li. Aogbandoa ɛ́ma nɛkɛ sɔsɔbɛ á Bhɛtɛ́li n'oyonga, na Ai n'okomo. Oa, â goto ɔphɛka ɛtɛ-ɔ́phɛɔ ka Mɔkɔta-Mokonga, áotobea ina a Mɔkɔta-Mokonga. 9 Mpɔ, Abhalamu áotutuisa tamba ka ga na Nɛgɛ́bhu.
Abhalamu na Salai ka nji á Mísii
10 Cɔ, monganya akpɛ dágu ka nji. Abhalamu áotea, áoga oika na Mísii, nga, monganya dátu akpɛ. 11 Mbenɔ nde Abhalamu dákidi bhíbhí á Mísii, áongodea nkakɛ Salai: « Ɔka phɔ, neuubha gea onde nke anjánja. 12 Bii batɔa ka Mísii bakɔ̌nande, bayɔngande gea: ‹ Nkakɛ ambɔ! › Bamomoande, bâ gǎkɛ okodeketa n'oenda. 13 Ǒngodeande gǎkɛ gea onde aɔani, ka gea bamogeeɛ anja ka nyɔngɔ akɔ. Kabondɔ unge neendande ka phɔakɔ. »
14 Bii Abhalamu akidi ye ka Mísii, batɔa ka Mísii, báɔɔna gea nkakɛ a anjánja phɛ̂. 15 Bakɔta á ntua ndea *Phaláɔ, dábamɔni nke ndɔ, báobhebha bonjanja akɛ mosa á Mɔkɔta nɛbɔ. Báonga ně k'endu ndea Mɔkɔta. 16 Phaláɔ áongea Abhalamu anja ka nyɔngɔ á Salai. Kabondɔ, áomopha bamɔgɔgɔ, bamɛmɛ, bangɔmbɛ, babhɛdanigi bǒko na bake, bamponda bǔku na bakei, na bangamia. 17 Kabondɔ, Mɔkɔta-Mokonga â gǎkɛ ontambisaga Phaláɔ n'ekombo nɛkɛ phɛ̂ ka nyɔngɔ á Salai nka Abhalamu. 18 Phaláɔ áɔmɔphana Abhalamu áomǔsia: « Ekende omogi ně bende? Ka nyɔngɔ eke kɔ́tɔmɔtɔ̌mi ka gea ande nkakɔ? 19 Ka nyɔngɔ eke nde ɔyɔngi ma gea: ‹ Ande aɔani ›, éme néomuka? Cɔ, nkakɔ ambe. Mbhɛda, óngɛ ně. » 20 Mpɔ, Phaláɔ áǒsosea babhɛdanigi nɛkɛ gea bam'beɛgɛ Abhalamu na nkakɛ, na kema nɛkɛ bhui.