Mɔphɛkɔ angbó ndea Bhabhɛ́li
11
1 Bakpa bɔbhu á ka mokonda dábaɔyɔnga yɔngɛa moci na yɔnga moci. 2 Cɔ, nci á n'okomo, bakpa báodhonda ěmbe moci ágbae ka nji á Sinali báoika oa. 3 Báɔyɔngaga sɔsɔbɛ abɔ gea te: «Bɛ́bɛtɛni biíki, bétoboɛ u ánja na nsa. » Báɔbhɛdaneaga biíki ka mɔphɛkɔ na kabolembo bea esau. 4 Bâ goto ɔyɔngaga sɔsɔbɛ abɔ gea te: « Bɛ́phɛkɛni kenombe moci na mɔphɛkɔ moci angbó nnde ntɔndɔ i angbóndoande kobha. Ka gea te ina asu áombɛ na békephanjekanɛmbɛ ka mokonda bhui. »5 Kabondɔ, *Mɔkɔta-Mokonga áokia ka toka na kobha ka gea áɔnɛ kenombe na mɔphɛkɔ angbó nde bakpa dábaɔphɛka. 6 Mpɔ Mɔkɔta-Mokonga áɔyɔnga gea: «Cɔ, ɔ́bɔnani, bɔbhu, yɔngɛa nɛbɔ a tɔ moci, batɔ batɔa-k'ɛbɔkɔti moci! Kɛ̌kɛ nde, aobá́ na bakpangi bende, nna na kema nde ěimisiaeka ka tɔtɔkisa ekuma nde baokanisia gea i. 7 Cɔ, békiɛni, béyombokisɛ yɔngɛa nɛbɔ, bakaɔkanɛmbɛ ngǔngu abɔ. » 8 Oa, Mɔkɔta-Mokonga áǒphanja ka mokonda k'ɔma bhubhui. Báokamba mɔphɛkɔ á kenombe ndɔ. 9 Kabondɔ unge, báɔɔphana kenombe ndɔ Bhabhɛ́lia. Nga, oa unge Mɔkɔta-Mokonga dáyombokisi yɔngɛa á ka mokonda bhui, â phɔtɔ ǒphanja bakpa oa k'ɔ́ma bhubhui ka mokonda.
Ɛbɔkɔti ndea Sɛ́mu
10 Cɔ, ɔ́nani ɛbɔkɔti ndea Sɛ́mu: Sɛ́mu dátu na basaga mia moci (100), mbusa á tuma ibo phɛ̂, áɔm'bɔkɔta Aipakisadhi. 11 Mbusa á bɔkɔtɛana á Aipakisadhi, Sɛ́mu dáendi goto basaga mia bɔku (500). áɔ̌bɔkɔta baniki-bǒko na bake.
12 Aipakisadhi dáendi basaga nkama isaɔ na bɔku (35), áɔmbokɔta miki-mǒko Cɛ́la. 13 Aipakisadhi dáendi goto mbusa á bɔkɔta Cɛ́la basaga mia gena na isaɔ (403). Áɔ̌bɔkɔta baniki-bǒko na bake.
14 Cɛ́la dáendi basaga nkama isaɔ (30), mpɔ áɔm'bɔkɔta miki-mǒko Ɛbhɛ́li. 15 Mbusa á bɔkɔtɛana Ɛbhɛ́li, Cɛ́la dáendi goto basaga mia gena na basaɔ (403), â phɔtɔ ɔ̌bɔkɔta baniki-bǒko na bake.
16 Ɛbhɛ́li dáendi basaga nkama isaɔ na gena (34), mpɔ áɔm'bɔkɔta Pɛlɛ́gi. 17 Mbusa á bɔkɔtɛana Pɛlɛ́gi, Ɛbhɛ́li â goto koenda basaga mia gena na nkama isaɔ (430), â phɔtɔ ɔ̌bɔkɔta baniki-bǒko na bake.
18 Pɛlɛ́gi dáendi basaga nkama isaɔ (30), mpɔ áɔm'bɔkɔta Lɛ́u. 19 Mbusa á bɔkɔtɛana Lɛ́u, Pɛlɛ́gi dáendi goto basaga mia íbɛ na ngia á njaga gena (209), â phɔtɔ ɔ̌bɔkɔta baniki-bǒko na bake.
20 Lɛ́u dáendi basaga nkama isaɔ na íbɛ (32), mpɔ áɔm'bɔkɔta Sɛlúgi. 21 Mbusa á bɔkɔtɛana Sɛlúgi, Lɛ́u dáendi goto basaga mia íbɛ na ngia á njaga íbɛ (207), â phɔtɔ ɔ̌bɔkɔta baniki-bǒko na bake.
22 Sɛlúgi dáendi basaga nkama isaɔ (30), mpɔ áɔm'bɔkɔta Naɔ́li. 23 Mbusa á bɔkɔtɛana á Naɔ́li, Sɛlúgi dáendi goto basaga mia íbɛ (200), dɛ́bɔkɔti phɔtɔ baniki-bǒko na bake.
24 Naɔ́li dáendi basaga nkama íbɛ na ngia á njaga gena (29), mpɔ áɔm'bɔkɔta Tɛ́la. 25 Mbusa á bɔkɔtɛana Tɛ́la, Naɔ́li dáendi goto basaga mia moci na nkama moci na ngia á njaga gena (119), dɛ́bɔkɔti baniki-bǒko na bake.
26 Tɛ́la dáendi basaga nkama ngia á njaga íbɛ (70), mpɔ áɔm'bɔkɔta: Abhalamu, Naɔ́li na Alani.
Ɛbɔkɔti ndea Tɛ́la
27 Cɔ, ɔnani ɛbɔkɔti ndea Tɛ́la: Tɛ́la dám'bɔkɔti Abhalamu, Naɔ́li na Alani. Alani áɔm'bɔkɔta Lɔ́ti. 28 Alani ímbe dáku abha Tɛ́la n'aphɔ béi ka Úli á batɔa ka Kaadhɛ́a, nji nɛbɔ á bɔkɔtɛana. 29 Abhalamu na Naɔ́li báǒboa bake. Ina á nka Abhalamu dátu Salai, ina á nka Naɔ́li, Míika. Míika dátu nseka ndea Alani, Alani mmbɔ abhakɛ na Isíka. 30 Salai dákaonji, nga, dátu ngomba.
31 Tɛ́la áɔm'bhɛda miki-mǒko nɛkɛ Abhalamu, áɔm'bhɛda Salai nka anakɛ Abhalamu. Â phɔtɔ ɔm'bhɛda mosuko akɛ Lɔ́ti muna Alani. Bɔbhu kimoci, báotoka ka Úli á batɔa ka Kaadhɛ́a, báoga ka nji á ka Kanána. Bii baju ka Alani, báoika oa. 32 Mbusa á enda á basaga mia íbɛ na bɔku (205), Tɛ́la áokua ka Alani.