Mokonga anambi Lɔ́ti
19
1 Cɔ, ɔgɔgɔ, bamalaeka babɛ báokidia ka Sɔdhɔ́ma. Lɔ́ti daiki gǎkɛ ka kǐo a Sɔdhɔ́ma. Mbenɔ nde dɛ́bɔni, aǒmesia ka dhondana nabɔ, áogbuka keongi akɛ ka odo. 2 Mpɔ áɔyɔnga gea: «Bakɔta nɛmɔ, nenodengemisigi, kɛtani mɔtɛamɔ, eme mbɛdanigi nɛnu. Bɔɔtɔka na bosokosi ecinji anu, bódɛ mɔtɛamɔ. Bɔjujukande mɔkɛsuɛ, bôtutuisa tamba nɛnu. » Báonsikisia Lɔ́ti gea te: «Nndakɛ, bedande ka ntanga. » 3 Lɔ́ti áǒdengemisaga phɛ̂, na ka bii dábabeeki, báoketa mɔtɛakɛ. Aɔɔmba kabɔ ea na mokati kanga cacu, báoea.4 Cɔ, na bakénanumbɛ, bǒko bɔbhu á ka Sɔdhɔ́ma kpanga ka baganda na jua ka baphomi, báotimba endu. Bakpa bɔbhu kabɔ mɔci kajigɛ. 5 Baɔmɔphana Lɔ́ti, báongodea gea: «Bǒko nde bangima mɔtɛakɔ ɔgɔgɔ ba oani? Ójuanisa k'asu na nsɛngɛ ka gea tɛ bédɛ nabɔ. »
6 Lɔ́ti áojuana kubii baɔ, áophatia kǐo mbusa akɛ, 7 áɔyɔnga gea: «Baya, nenódengemisigi. Bɔ́kɔtɔtɔkisɛmbɛ bojede ndɔ. 8 Cɔ, nena baseka babɛ bunde bakadhondanimbɛ mɔnɔ na mǒko. Nějuanisande k'anu, bǒgeeande bíndɔ anobɔngɛande. Bɔ́kɔtɔtɔkisɛmbɛ ndiu ka kema ka bǒko nde. Nga, bande bakɛni nɛmɔ, akeni neambɛ bɔ anja. » 9 Báongodea gea: « Ótia! Obɛ, onde mɔkɛni. Okondi óangɛ moangɔ gǔ asu? Cɔ, bekogeande ajede kɔnyɛnya bɔ. » Báontiba Lɔ́ti akpɛ, báɔsɛkɛda bhíbhí á kǐo ka gea te bangiɛ. 10 Mpɔ, bamalaeka babɛ ndɔ báonanɔa njaga abɔ. Báonsikisa Lɔ́ti ka mpɛphɛ abɔ subi endu, báophatia kǐo, gbonge! 11 Báǒbhisa bakpa bunde dábaiki ka kǐo bakeímeíme, kpanga ka baganda na ga á jua ka baphomi. Bakpa ndɔ dábakatɔki ye jua ka kǐo.
12 Bamalaeka babɛ ndɔ báongodea Lɔ́ti: « O goto na batɔa k'ekombo nɛkɔ oani? Munya á miki nɛkɔ, baniki-bǒko-nɛkɔ, baseka nɛkɔ na nkpa bhuakɛ á k'ekombo nɛkɔ subi á kenombe nde, ójuanisa. 13 Betukatukande ɔma nde, nga, *Mɔkɔta-Mokonga aɔki ntabo ajede asǐ gǔ á batɔa á ka nji nde, ka nyɔngɔ índɔ unge ǎsoteki ka tukatuka i.». 14 Lɔ́ti áɔmɛa, áoga ǒdhonda bǒko á mbanje á baseka nɛkɛ, bunde dábaogea béboɛ baseka nɛkɛ k'eyamani. Aǒngodea: « Kamisagani, tokani ka kenombe nde! Nga, Mɔkɔta-Mokonga atukatukande ɔma nde.» Bǒko á mbanje ndɔ, bâ gǎkɛ uubha te ande nyɔngɔ á ibɔnda.
Mokonga atukatuki Sɔdhɔ́ma na Gɔmɔ́la
15 Ka saga esa, bamalaeka báonsosea Lɔ́ti gea: « Kamisaga, m'bhɛda nkakɔ na baseka ndeakɔ babɛ bunde ba oani, ambe bokuande kimoci na batɔa ka nji nde bii bakuiande bojede nɛbɔ.» 16 Lɔ́ti dâ goto na ngaka, mpɔ, bamalaeka babɛ ndɔ báondhunga ka njaga, yɛ, nkakɛ na baseka nɛkɛ babɛ báǒjuanisa ka nsɛngɛ á ka nji. Nga, *Mɔkɔta-Mokonga dákondi amisa akɛ.
17 Mbenɔ nde déjuanisi ka nsɛngɛ á nji ndɔ, malaeka moci áongodea Lɔ́ti: « Tea ka amisa enda akɔ, kɔɔnjiɛ mbɛ mbusa akɔ. Komamɛgɛmbɛ ka ntanda moci, tea ndiu nci á na mamba-mamba ka gea kokuɛmbɛ. » 18 Lɔ́ti â gǎkɛ ongodea: « Kadengedenge mɔkɔta nna bo. 19 Ande doni, o anjánja k'eme na omogi bonjanja eme mbhɛdanigi nɛkɔ ka amisa enda ani. Eme gǎkɛ, kɛtɔkɛku tea sua mamba-mamba. Nga, bojede amodakateande na nekuande. 20 Ɔna nji abhɔa nde, kadengedenge nna bhíbhí ka eme tea subi i? Omodeketa nɛsɔmɛanɛ ka nji abhɔa, ko unge neamisande enda ani.» 21 Mpɔ, malaeka áongodea Lɔ́ti: «Nekokui goto ngomi, ketukatukɛku nji abhɔa ndɔ omaongoda. 22 Kamisaga, tea tɔ ko. Nga, kɛtɔkɛku gea á kema n'okojumbɛ ko. » Ka nyɔngɔ ndɔ unge dábasǔ miki á nji ndɔ Sɔalia.
23 Mani dátai mbenɔ nde Lɔ́ti dákidi ka Sɔali. 24 Mpɔ, Mɔkɔta-Mokonga áɔ̌kisa gǔ á Sɔdhɔ́ma na Gɔmɔ́la mbua á mpophɛ á nsa nnde atoki na kobha. 25 Áouja nji ndɔ, kenombe bhui, bakpa á ka nji ndɔ, na ɔphɔ bhui nde aɔtɛa ka odo. 26 Nka Lɔ́ti, â gǎkɛ ɔɔnjia mbusa, áǒketia ka iganga á munɛi.
27 Mɔkɛsuɛ, Abhalaámu démesi ka gǎ ɔma nde dáiki mosa á Mɔkɔta-Mokonga. 28 Áɔɔnjia nkɛkɛɔ á Sɔdhɔ́ma na Gɔmɔ́la na kenombe bhui, áɔɔna maki n'aomaga sumbii maki á nsa angbo.
29 Mbenɔ nde Mokonga dátukatuki kenombe nde Lɔ́ti dáiki kau, áonkanisia Abhalaámu. Áontisa Lɔ́ti ka gea te katambɛgɛmbɛ mbenɔ nde aouja nji.
Cina á ɛbɔkɔti á baMɔabhu na baAmɔni
30 Lɔ́ti dána kɔbɔbɔkɔ á ika ka Sɔali. Áotoa ka kemombe ndɔ, áoga oika ka mamba-mamba na baseka nɛkɛ babɛ. Dábaiki subi á kubhu ókanga. 31 Esa moci, nseka imbɔ ange áongodea mɔtɔakɛ gea: « Abhasu ande phomi. Bǒko bana ka nji nde ka gea bɛ́ɔmanɛ na bɔ bíndɔ baogea k'ɔma nɛngbo. 32 Cɔ, bhika bénusɛ abhasu makana anjɛ, bédɛgɛ nayɛ ka gea bébɛ n'ɛbɔkɔti nde atoki k'abhasu.»
33 Kǐpha ndɔ, báonusa abhabɔ makana anjɛ. Nseka ímbɔ ange áoga oda n'abhakɛ. Abhabɔ kaubhɛ ka kema mbenɔ nde nseka ndɔ ange děnanu na kabii děmesi. 34 Mamai, nseka ímbɔ ange áongodea juɛbɛ gea: «Nǎma kǐpha, nedema n'abhɛ. Benusɛ goto makana anjɛ ɔgɔgɔ á k'esande, mpɔ, ógodɛ nayɛ ka gea te bébɛ n'ɛbɔkɔti nde atoki k'abhasu. » 35 Ɔgɔgɔ ndɔ, bâ goto onusa abhabɔ makana anjɛ. Nseka nɛkɛ ímbɔ juɛbɛ â goto oga oda nayɛ. Abhabɔ kaubhɛ ka kema mbenɔ nde nseka ndɔ juɛbɛ dénanu na ka bii démesi.