Mokonga agi iɔnga na Nɔ́a
9
1 Mokonga áobhisa iɔnga gǔ á Nɔ́a na banakɛ, áǒngodea be: « Bɔkɔtani, bóbikɛ, bótumisɛ mokonda. 2 Kɛ̌kɛ nde gǎkɛ, banyama bɔbhu á ka mokonda, bambǔ bɔbhu á ka mpɛna, banyama babhɔbhɔbhɔa bɔbhu áodaa, na basu bɔbhu á k'obenge bánobangande phɛ̂, báoba na kɔbɔbɔkɔ anu. Nga, něbhisi kusi á kɔkɔta nɛnu. 3 Kema bhui nde aoemana, na nnde aoenda, abande ea nɛnu. Nenophi phɔtɔ nndɔ bhui bíndɔ dénophi mbuti. 4 Bókoeɛmbɛ ndiu kesuku á nyama n'ana enda subi akɛ, ande gea te magia akɛ. 5 Atɔ bo ka benu. Nɛmɛma tɔ enda á nkpa nde aduki magia á nkpa. Kabɛ n'ande nyama, kabɛ n'ande nkpa, nɛmɛmande enda akɛ.6 Mmbe aoduka magia á nkpa,
nkpa tɔ áambé adukande magia inɛkɛ.
Nga, dábanconji nkpa bea keongi á Mokonga. 7 Cɔ, benu, bɔkɔtani, bóbikɛ, bótumisɛ mokonda, bóbikɛ gǔ i.»
8 Mokonga â goto ongodea Nɔ́a, kimoci na banakɛ be: 9 « Cɔ, éme, nɛɔnganande na benu, n'ɛbɔkɔti á mbusa anu. 10 Kema bhubhui nde aoenda kimoci na benu: bambǔ, banyama étuge, na banyama bɔbhu á ka mokonda bunde dóbojuani na bɔ subi á koko, nɛɔnganande phɔtɔ nabɔ. 11 Nebhisi ɛɔphi nɛmɔ na benu gea, ibo katumɛeka phɛ̂ ka mia á mokonda na tukatuka kema bhubhui nde aoenda.»
12-13 Mokonga â goto ɔyɔnga: «Cɔ, nebhisi akema nɛmɔ na kobha ka gea te, nnde ábɛ mphangiɔ á iɔnga nde nebhisi sɔsɔbɛ ani na benu, na kema bhubhui nnde aoenda kimoci na benu, k'ɛbɔkɔti bhui á mbusa anu. Abande mphangiɔ á iɔnga sɔsɔbɛ ani na mokonda. 14 Mbenɔ bhubhui nde nebande ogbukumia mokonda n'egugu, akema áojuana na kobha. 15 Mpɔ, nekanisiande iɔnga nɛmɔ na benu, na kema bhui nde a phɔ́tɔ koenda. Eya, ibo keeketiɛeka ye ka tuma phɛ̂ ka tukatuka kema bhui nde aoenda. 16 Mbenɔ bhubhui nde akema aye ojuana na kobha, nɛ́ɔɔna, néokanisia iɔnga á mɛyɔ sɔsɔbɛ ani na kema bhui nde aoenda ka mokonda.» 17 Mokonga áɔgɔbɛa yɔnga nɛkɛ na Nɔ́a gea: «Nnde ande mphangiɔ á iɔnga nde nebhisi sɔsɔbɛ ani na bakpa bɔbhu á ka mokonda.»
Ɛbhɛdi á makana ndea Nɔ́a
18 Cɔ, bana Nɔ́a bunde dábájuani na yɛ subi á koko dábatu Sɛ́mu, Amu na Yaphɛ́ti. Amu dátu abha-Kanána. 19 Ɛbɔkɔti á baniki basaɔ ndea Nɔ́a a unge atumisi mokonda bhui.
20 Nɔ́a áogubha ciko, áoba nkpa á ka mosa-mosa á kona me nde báɔɔphana mujabibo. 21 Áonoa makana anjɛ̌, makana áɔmbhɛda, áoika ndumbu subi á ɛ́ma nɛkɛ. 22 Abha-Kanána áɔɔna ndumbu á abhakɛ, áɔ̌tɔmia bamunamakɛ babɛ bundɔ dábatu na nsɛngɛ. 23 Sɛ́mu na Yaphɛ́ti bâ gǎkɛ ɔbhɛda bhɔngɔ, báogbandoa k'ɛkɔta abɔ. Báoga binangɔngɔ ka gbukumia ndumbu á abhabɔ. Bii dábaɔɔnjia nci nɛngbo, dábakaɔni ndumbu á abhabɔ.
24 Mbenɔ nde ɛbhɛdi á makana ansi ye Nɔ́a, báomǔbhisa kema nde Amu, anakɛ ímbɔ juɛbɛ dángi ně. 25 Mpɔ áongea:
« Bansɛmɛɛgɛ Kanána,
ábɛ nkɔbɛ á ka sungiaga ka bamunamakɛ.
26 *Mɔkɔta-Mokonga, Mokonga nɛmɔ ábhisɛ ndiu njaga akɛ gǔ á Sɛ́mu.
Kanána ábɛ nkɔbɛ nɛkɛ.
27 Mokonga ándandisɛ Yaphɛ́ti,
aikɛ subi á ɛma ndea Sɛ́mu.
Kanána ábɛ phɔtɔ nkɔbɛ ndea Yaphɛ́ti.»