Nkpangeɔ 8

Nɔ́a ajuani subi á koko angbóngbo

1 Mbusa i, Mokonga áonkanisia Nɔ́a na banyama bɔbhu á etuge na bunde á k'osaa, bunde dá nabɔ subi á koko. Áobhikisa maepheɔ ka mokonda. Ibo áokpanga dhakana. 2 Ntoɔ á ibo á subi á odo, na boenga á na kobha áodakekana. Mpɔ mbua áotenekeana. 3 Ibo áǒtutuisa ka phua bokɛ-bokɛ. Cɔ, mbusa á esa mia moci na nkama bɔku (150), ibo áophua. 4 Esa á songe nkama na ngia á njaga íbɛ (17) ka songe á ko njia á njaga íbɛ (7), koko áokpatekana gǔ á bamamba á kenombe á Alalati. 5 Ibo áotutuisa phua, áojusa ka songe á nkama moci. Esa á songe á ko ímoci ka songe ndɔ, sese á bamamba áokpanga kidiana.

6 Cɔ, mbusa á esa nkama gena (40), Nɔ́a áoukua boenga, nnde dábɔngisigi ka koko. 7 Áon'juanisa mbǔ bea mboe, áoyaa. Áoga n'aoja mɔngɔ asǐ na kabii ibo dáphu ka mokonda. 8 Mpɔ Nɔ́a áonteka mboe ka gea áɔnɛ ambe ibo adhidhi ka mokonda. 9 Dákaɔni gǎkɛ ɔma á kambea. Nga, ibo dátu phɔ́tɔ na tuma. Áoja bhíbhí á Nɔ́a subi á koko. Nɔ́a áonanoa njaga akɛ, áɔmbhɛda mboe, áongisa bhíbhí akɛ subi á koko. 10 Áobondea goto esa ngia á njaga íbɛ (7), mbusa â goto onteka mboe ndɔ. 11 Ɔgɔgɔ, mboe ndɔ áoja na kasa adhɛ̌ á misɛituni k'ébombo akɛ. Mpɔ, Nɔ́a áuubha gea te ibo adhidhi ye tɔ ka mokonda. 12 Â goto obondea esa ngia á njaga íbɛ (7), áon'teka mboe, kajɛ ye mɔtɛakɛ.

13 Mbenɔ nde Nɔ́a dátu na basaga mia ngia á njaga na moci (601) esa á songe moci á songe á ko imoci, ibo daphu ka mokonda. Nɔ́a áophoa ɔma abhɔa bhǎ-kijɔ á koko, áɔkɛngɛdia na nsɛngɛ, áɔɔna gea odo aɔmi. 14 K'esa á songe nkama íbɛ na ngia á njaga íbɛ (27), á songe á ko íbɛ, odo â ye tɔ n'aɔmi bhubhui.

15 Mpɔ, Mokonga áongodea Nɔ́a: 16 « Cɔ, juana subi á koko, obɛ na nkakɔ, banakɔ na bake bábɔ. 17 Ójuanisa phɔtɔ banyama bɔbhu bunde bá kimoci n'obɛ, etete bhui á bambǔ á oyaa, banyama á etuge, banyama abhɔbhɔbhɔa áodaa bɔbhu, bábɔkɔtɛ asǐ ka mokonda, bándandɛ ɔma bhubhui. » 18 Cɔ, Nɔ́a áojuana subi á koko, yɛ na nkakɛ, banakɛ na bake bábɔ. 19 Mpɔ, báojuanaga phɔ́tɔ k'ekombo: banyama bɔbhu á k'osaa, banyama ábhɔbhɔbhɔa áodaa bɔbhu, bambǔ áoyaa bɔbhu na kema bhubhui nnde aoemana ka mokonda.

20 Nɔ́a áɔphɛka *ɛtɛ-ɔ́phɛɔ ka ina á *Mɔkɔta-Mokonga. Áɔbhɛda etete moci-moci á banyama á etuge na bambǔ á kanga otaɔ, áǒtoboa gǔ á ɛtɛ-ɔphɛɔ. 21 Mɔkɔta-Mokonga áoboea su anja á phɛa ndɔ, áǒgea sasakɛ be: « Kesɛmɛɛgɛeka ye mokonda ka nyɔngɔ á nkpa. Nga, neuubha kanisia á nkpa a tɔ ajede kpanga á ka koniki akɛ. Kabondɔ unge kégogɛeka ye kema bhubhui nde aɔphɛkuma bíndɔ dégi.

22 Cɔ, na kabii mokonda aendaeka,

matu ékona na dungu,

pheɔ na jonga,

okame na bɛjɔ̌,

keiphe n'esa

kásungiɛgɛeka. »