Nkpangeɔ 7

Nɔ́a akambi ka koko angbóngbo

1 *Mɔkɔta-Mokonga áongodea Nɔ́a: «Cɔ, kambea subi á koko. Obɛ n'ekombo nɛkɔ bhui, nga, obɛ sasakɔ tɔ áambé nɛkɔɔni ntɔa-doni sɔsɔbɛ á batɔa k'ɛbɔkɔti aka matu nde. 2 Ɔ́bhɛda banyama á kanga otaɔ bakei ngia á njaga íbɛ (7), na bǔku ngia á njaga íbɛ (7) á etete danga-danga bhubhui. Ɔ́bhɛda gǎkɛ banyama otaɔ nkei na mǔku k'etete danga-danga. 3 Cɔ, ka bambǔ á oyaa, ɔ́bhɛda phɔtɔ ngia á njaga íbɛ (7) nkei na mǔku ka amba etete danga-danga abɔ ka mokonda gea te báamɛ. á esa ngia á njaga íbɛ (7), nɛɔ́kisande mbua ka mokonda k'esa nkama gena (40), keiphe n'esa. Negogande kema bhubhui nde aɔphɛkuma nnde déconji ka mokonda. » 5 Nɔ́a áɔtɔtɔkisa kema bhui bíndɔ Mɔkɔta-Mokonga dánsosi.

6 Nɔ́a dátu na basaga mia ngia á njaga (600) mbenɔ nde ibo dátumi phɛ̂ ka mokonda. 7 Yɛ, nkakɛ, banakɛ na bake á banakɛ, báongia subi á koko ka tea tuma á ibo. 8 Banyama á kanga otaɔ, banyama ótaɔ, bambǔ áoyaa na banyama abhɔbhɔbhɔa áodaa ka odo, 9 nkei na mǔku á etete danga-danga, báobhika mɔtɛa Nɔ́a ka ngia subi á koko bíndɔ Mokonga dánsosi. 10 Mbusa á esa ngia á njaga íbɛ (7), tuma á ibo phɛ̂ áomia mokonda.

Tuma á ibo phɛ̂

11 Mbenɔ nde Nɔ́a dátu ye na basaga mia ngia á njaga (600), esa á songe nkama na ngia á njaga íbɛ (17) ka songe á ko íbɛ, ntoɔ bhui á subi á odo áophuphutisa ibo. Boenga á na kobha áoukukana. 12 Mpɔ, mbua áɔɔka ka mokonda k'esa nkama gena (40) keiphe n'esa. 13 Esa ndɔ tɔ unge Nɔ́a, nkakɛ na banakɛ, Sɛ́mu, Amu, Yaphɛ́ti na bake babɔ, dábakambi ka koko. 14 Bɔ, báokambea kimoci n'etete moci-moci á banyama á k'osaa, banyama á etuge, banyama babhɔbhɔbhɔa áodaa na bambǔ áoyaa, na kema bhui nde a na kepupe. 15 Ka kema bhui nde aɔphɛkuma, báobhika ka mpɛphɛ a Nɔ́a, nkei na mǔku, báokambea subi á koko. 16 Nkei moci na mǔku moci etete moci-moci, báokambea bíndɔ Mokonga dánsosi Nɔ́a. Mpɔ, *Mɔkɔta-Mokonga áophatia kǐo mbusa á ngiaá Nɔ́a gbonge!

17 Tuma á ibo phɛ̂ dátu ka mokonda k'esa nkama gena (40). Ibo áotuma, áophobisa koko. Koko áophoba gǔ á odo. 18 Ibo áondanda, mokonda áotuma na ibo phɛ̂, koko áophobaga gǔ á ibo. 19 Ibo â goto tɔ otuma phɛ̂ gǔ á odo, áomia mamba bhubhui éndandanda á ka mokonda. 20 Ibo áotuma, áɔnyɛnya sese á bamamba bea mɛtɛɛ ngia á njaga íbɛ (7). 21 Kema bhubhui nde dáoemana ka mokonda, áokua: bambǔ áoyaa, banyama á etuge, banyama á k'osaa, banyama babhɔbhɔbhɔa áodaa ka odo na bakpa bɔbhu. 22 Kema bhui nde dáɔphɛkuma gǔ a odo, áokua. 23 Bondɔ unge Mɔkɔta-Mokonga dágogi kema bhubhui nde dáɔphɛkuma ka mokonda: bakpa, banyama á etuge, banyama babhɔbhɔbhɔa áodaa, na bambǔ áoyaa, bɔbhu dábatindi ka mokonda. Nɔ́a tɔ áambé dájigi kimoci na bunde dábatu na yɛ subi á koko. 24 Ibo áoteka ka mokonda k'esa mia moci na nkama bɔku (150).