Bɛi ndea Mokonga gǔ á bakpa
6
1 Bii bakpa bakpangi bɔkɔta basi ka mokonda, baseka baɔbɔkɔtɛana. 2 Bana-Mokongaa báɔɔna gea baseka ndea batɔa ka mokonda bábɔngigi, báɔ̌sɔmbɔa kabɔ báoba bake babɔ. 3 *Mɔkɔta-Mokonga áongea: « Ɛphɛu ani kaikɛku subi á nkpa esa bhubhui. Nga, yɛ a tɔ na nyama á odo. Enda akɛ abande basaga mia moci na nkama íbɛ (120). » 4 Ka matu ndɔ na mbusa i, batɔa-éndanda phɛ̂ dábatu ka mokonda. Mbenɔ nde bana-Mokonga dábadhondani na baseka ndea bakpa, báɔbɔkɔta baniki. Baniki ndɔ dábatu bauka a kǎ. Dabatu batɔa okuu na boombia. Ina abɔ dáombi.5 Mɔkɔta-Mokonga dáɔni gea bakpa dábabikisi bojede ka mokonda phɛ̂, na mɔphɛ á ka měma abɔ dátu tɔ ajede esa bhui. 6 Oa, Mɔkɔta-Mokonga aɔ̌bɛia ka cɔnja á bakpa ka mokonda, měma akɛ áosida. 7 Mpɔ, áongea: «Něgogande bakpa bɔbhu bunde děconji ka mokonda, bakpa na banyama, banyama babhɔbhɔa áodaa, na bambǔ áoyaa. Něbɛɛi nga, děconji. » 8 Nɔ́a â ndiu oba na bonjanja ékondi mosa á Mɔkɔta-Mokonga.
Nɔ́a aɔsɛka koko angbóngbo
9 Cɔ, ɔkani nyɔngɔ ndea Nɔ́a: Nɔ́a dátu ntɔa-doni, na m'bangi-Mokonga sɔsɔbɛ á batɔa ka matu ndɔ. Dáɔngani na Mokonga. 10 Dɛ́bɔkɔti gǎkɛ baniki-bǒko basaɔ: Sɛ́mu, Amu na Yaphɛ́ti.
11 Mokonga dáɔni gea te mokonda atumi n'otukɔtukɔ na ajɔɔkani na bojede phɛ̂. 12 Mbenɔ nde dáɔɔnjia mokonda, áɔɔna gea te mokonda atukani. Nga, nkpa bhuakɛ atukatuki aphe nɛkɛ. 13 Mpɔ, Mokonga áongea Nɔ́a: «Nesui gea te nɛɔgɔba batɔa ka mokonda bɔbhu. Nga, bátumisi mokonda n'otukɔtukɔ. Kabondɔ unge neótukatuka, něphɔtɔ otukatuka mokonda. 14 Cɔ, nsɛka k'akɔ koko angbóngbo á me akpɛ. Óbhisɛ ɔma danga-danga subi i, ósiɛ phɔtɔ na mpitɛ subii na ngɔngɔ i. 15 Ɔnsɛkande gǎkɛ be: Bondanda i abande mɛtɛɛ mia moci na nkama bɔku (150m), bogbae i mɛtɛɛ nkama íbɛ na bɔku (25m), dhumana i mɛtɛɛ nkama na bɔku (15m). 16 Okambisande na nkombe, óodeketa gbutuka mɛtɛɛ moci sɔsɔbɛ á nkombe na koko. Ka mpamba i, ɔ̂bɔngisiaga kǐo. Mbusa ɔ̂bɔngisiaga ɔma á bhuiki isaɔ á kambeanaga ka mpɛna.
17 Nga, éme nebhikisande tuma á ibo phɛ̂ ka mokonda, ka tukatuka kema bhubhui nde aoenda. Kema bhubhui nde a n'ɛphɛu gǔ á odo, akuande. 18 Nɛɔnganande ndiu n'obɛ. Okambeande subi á koko. Obɛ na nkakɔ, na banakɔ, na bake á banakɔ. 19 Ongisande phɔtɔ subi á koko, etete á kema bhui nde aɔphɛkuma, íbɛ-íbɛ, nkei na mǔku ka amba enda abɔ kimoci n'obɛ. 20 Cɔ, ongisande etete á bambǔ áoyaa bɔbhu, banyama, banyama á bhɔbhɔa áodaa, nkei na mǔku. Babhikande bhíbhí akɔ ka gea te baendɛ. 21 Óboambɛ phɔtɔ etete á kema akoea bhui, ôbhisa kampɛphɛ, abande ea nɛnu, n'inɛbɔ. » 22 Nndɔ unge Nɔ́a dági, áɔtɔtɔkisa kema bhui nde Mokonga dánsosi.