Kaina na Abhɛ́li
4
1 Mǒko Ádhamu dádhondani na nkakɛ Ɛpha. Ɛpha áokumba éme, áɔm'bɔkɔta Kaina. Áɔyɔnga gea: «Nɛntɔi miki-mǒko nde ka bukpɛkpɛ ndea *Mɔkɔta-Mokongaa. » 2 Â goto ɔm'bɔkɔta mɔtɔakɛ na Kaina, ina akɛ Abhɛ́li. Abhɛ́li dátu nambi-étuge, Kaina â gǎkɛ oba ngubhi.3 Mbusa á mbenɔ moci, Kaina áobhika omopha Mɔkɔta-Mokonga *phɛa á mbo á ka ciko nɛkɛ. 4 Abhɛ́li â phɔtɔ obhika na phɛa á ba ange á ka banyama étuge nɛkɛ na bánɔnigi. Mɔkɔta-Mokonga áom'beekea Abhɛ́li na phɛa nɛkɛ. 5 Cɔ, Mɔkɔta-Mokonga dákam'beeki gǎkɛ Kaina na phɛa nɛkɛ. Ka nyɔngɔ índɔ unge Kaina dábɛi phɛ̂, áophinda kiki akɛ. 6 Mɔkɔta-Mokonga áongodea Kaina: « Ɔbɛi ka nyɔngɔ éke? Ophindi kiki ka nyɔngɔ éke? 7 Aoba n'ɔbhɛdanigi anja, bákaobeekeɛku? A gǎkɛ oba n'obhɛdanigi ajede, cɔ, bojede ɛ̌sɔmɛani ka kǐo nɛkɔ, aokaba ákogoe. Akeni ɔ́tɔkɛ.»
8 Mpɔ, Kaina â gǎkɛ ongodea mɔtɔakɛ, Abhɛ́li: « Bégɛ! » Bii bakidi ye ka ciko, Kaina áom'bhutukia mɔtɔakɛ Abhɛ́li, áomoa.
9 Mɔkɔta-Mokonga áomusia Kaina: « Mɔtɔakɔ, Abhɛ́li a koni? » Kaina áonsikisia: « Keuubha. Eme áambé nema m'bondigi á mɔtɔ̌? » 10 Mpɔ Mɔkɔta-Mokonga â goto ongodea Kaina: « Ekende ogǐma? Nɛɔɔka nkogɔ á magia á mɔtɔ̌ akɔ n'áotoka subi á odo, áomodhonda. 11 Cɔ, kɛ̌kɛ nde *nɛɔsɛmɛigi, neokobeaga ka odo nde dáuku aphɛnɔkɔ akɛ ka boea á magia á mɔtɔ̌ akɔ mmbe dómoe. 12 Mbenɔ nde obande ogubha, odo kabɛkuɔtɛisa mbo nɛkɔ. Obande ǒtambeaga na mɔkɔbɔ ka mokonda. »
13 Kaina áongodea Mɔkɔta-Mokonga gea: « Oteni nyɔngɔ nɛmɔ akpɛ phɛ̂, kɛtɔkɛku. 14 Omobǐgi k'esande ka odo nde aɔtɛngisa mbo na nɛ̌sɔmɛanande danga n'obɛ, n'ětambeagande na kɔba ka mokonda. Cɔ, nkpa nde amɔɔnande, amomoande. » 15 Mpɔ Mɔkɔta-Mokonga áongodea: «Nna bo, aobá́ nkpa na moe Kaina, báogisia nyɔngɔ akɛ mɔngɔ ngia á njaga íbɛ (7). » Mɔkɔta-Mokonga áobhisa mphangiɔ ka Kaina, gea te bunde bámɔɔnande bakamoɛmbɛ. 16 Mpɔ Kaina áotoka k'iso á Mɔkɔta-Mokonga, áoga oika na Nɔdhi, nji nde á n'okomo á Ɛdhɛni.
Ebɔkɔti ndea Kaina
17 Kaina áodhondana na nkakɛ, nkakɛ áokumba éme, áɔm'bɔkɔta miki-mǒko, ina akɛ. Enɔki. Kaina dáphɛki kenombe, dásǔ kenombe kau Enɔki, ina á anakɛ. 18 Enɔki áɔm'bɔkɔta Iladhi. Iladhi gǎkɛ áɔm'bɔkɔta Mɛuyaɛli. Mɛuyaɛli áɔm'bɔkɔta Mɛtusaɛli. Mɛtusaɛli áɔm'bɔkɔta Lamɛki.
19 Lamɛki débǔ bake babɛ. Nke á mosa ina akɛ dátu Ádha, nke á mbusa ina akɛ dátu Sila. 20 Ádha áɔm'bɔkɔta Yabhali, mmbe dátu abha bunde baǒtuga banyama na dábatuoikaga subi á ɛma. 21 Ina á munamakɛ dátu Yubhali. Yɛ áambe dátu abha á babɛti baphii na básugu mbengu. 22 Sila gǎkɛ áɔm'bɔkɔta Tubhali-Kaina, mmbe dátu ntombe ka bɔngisiaga á ngɔa etete bhui. Aɔakɛ na Tubhali-Kaina dátu Naama.
23 Lamɛki áǒngodea bake nɛkɛ gea:
« Ádha na Sila, ɔ́mɔɔkani!
Bake á Lamɛki, bhisani kecue anu ka yɔnga nɛmɔ.
Báɔmɔbɛta, neomoa nkpa moci,
báomotuma, neomoa miki moci.
24 Cɔ, kabɛ na báɔgisia mɔ̌ á Kaina
mɔngɔ ngia á njaga íbɛ (7),
bágisiande nnde á Lamɛki,
mɔngɔ nkama ngia á njaga íbɛ na ngia á njaga íbɛ (77). »
25 Ádhamu dádhondani goto na nkakɛ Ɛpha. Áɔm'bɔkɔta goto miki-mǒko, áonsua ina á Sɛtib. Nga, dáyɔngi: « Mokonga amogabhei ɛbɔkɔti nɛngbo ka mpɛnɛ á Abhɛ́li mmbe Kaina damoe. »
26 Cɔ, Sɛti áɔm'bɔkɔta phɔtɔ miki-mǒko moci, áonsua ina á Enɔsi. Mpɔ bakpa báokpanga tobea Mokonga, ka ina á *Mɔkɔta-Mokonga.