Mokonga ěbigi Ádhamu na Ɛpha ka cikɔ á Ɛdhɛni
3
1 Cɔ, njɔka dátu na maibhe phɛ̂ kɔnyɛya banyama bɔbhu á k'osaa bunde *Mɔkɔta-Mokonga, Mokonga déconji. Áongodea nke gea: « Ande doni gea Mokonga dáyɔngi bokoeɛka ka mbuka á bame á ka ciko? » 2 Nke áongodea njɔka gea: «Bɛɔtɔka na béi ka mbuka á bame á ka ciko. 3 Cɔ, me nde a gǎkɛ ka meme á ciko, Mokonga dáyɔngi: ‹ Bókoeɛmbɛ mbuka akɛ, kabɛ dhunga a kau. Boogea bo, ambe bokuande. › »4 Mpɔ njɔka áongodea nke: «Bɛɛndɔ, bókókuɛku! 5 Mokonga auubha gea, esa nde boeaeka mbuka ndɔ, iso anu akodokanande. Bobande bea yɛ, buubhande kema nde á anja n'inde á ajede.»
6 Cɔ, nke dáɔni gea mbuka á me ndɔ dátu anja ka ea na ɔna i. Áokonda u, ka nyɔngɔ nde aoubhisa katanisa kema anja n'inde á ajede, áɔbhɛda mbuka akɛ áoea. Â phɔtɔ omopha munya kɛ mmbe dábatu kimoci nayɛ. Munyakɛ áoea. 7 Mɔngɔ ímoci iso abɔ bɔbhu babɛ áokodokana. Mpɔ, báuubha gea dábatu ndumbu. Báophopha kasa-kasa á me á motini, báɔ̌bɔɛaga bea bhɔngɔ agbae.
8 Ɔgɔgɔ ésa, báɔmɔɔka Mɔkɔta-Mokonga, Mokonga n'aɔtɔmba ciko, mǒko na nkakɛ báoga ɔ̌sɔmɛana sɔsɔbɛ á bame á ka ciko ka gea te Mɔkɔta-Mokonga, Mokonga k'ɛɛbɔnɛmbɛ. 9 Mɔkɔta-Mokonga, Mokonga áɔmɔphana mǒko, áomúsia: « Oma oanie? » 10 Mǒko áonsikisia gea: «Nɛtɔɔki nduu akɔ subi á ciko, néoba na kɔbɔbɔkɔ, nga nendumbu. Nêgǎkɛ ɔɔsɔmɛana. » 11 Mɔkɔta-Mokonga â goto ɔyɔnga gea: « Ani akophangi gea ondumbu? Ande gea te oi ka mbuka a me nde dékoimisii gea koeɛ? » 12 Mǒko áonsikisia: « Ande nke nde dómopi áambé atomopi mbuka á me, neoea u. »
13 Mpɔ Mɔkɔta-Mokonga, Mokonga áongodea nke: « Ka nyɔngɔ éke ogima bo? » Nke áonsikisia: « Ande njɔka áambé atomodhemi, neoea u. »
14 Mpɔ Mɔkɔta-Mokonga, Mokonga áongodea njɔka:
« Ka nyɔngɔ nde ogibo, nɛɔsɛmɛigi,
sɔsɔbɛ á banyama bɔbhu á tuga na bunde á k'osaa.
Obande ótamba n'egogo akɔ,
oeande mpusu á odo ka enda akɔ bhui.
15 Nebhisande kobibia sɔsɔbɛ akɔ na nke,
sɔsɔbɛ ɛbɔkɔti nɛkɔ n'ɛbɔkɔti nɛkɛ.
Ɛbɔkɔti nɛkɛ atumande mɔ̌ akɔ, n'obɛ ontumande k'ecinji. »
16 Cɔ, aongodea nke:
« Nebikisande kokae á éme nɛkɔ,
ɔ̌bɔkɔtande baniki ka tambaga.
Mɔphɛ akɔ abande ka munyakɔ.
Yɛ, abande na kɔkɔta gǔ akɔ.»
17 Mbusa, â yetɔ ongodea mǒko: « Ka nyɔngɔ nde ɔɔki ɛsɔ á nkakɔ, na ôea mbuka á me nde dékoimisii gea k'oeɛ,
cɔ, ka nyɔngɔ akɔ unge
nɛsɛmɛigi odo.
Ande ka tambaga unge
ɔtɔande ea nɛkɔ kau
esa bhui á enda akɔ.
18 Odo atɛisande kakɔ
ngenge-ngenge na ɔphɔ á kiaga.
Oeande
mbuti á ka ciko.
19 Ɔtɔande ea nɛkɔ
k'eungu á k'endondo akɔ,
na kabii osikianagande ka odo,
ka nyɔngɔ nde odo unge dábakoconji ně.
Cɔ, obɛ dábakɔbhɛdi ka mpusu á odo,
osikianande phɔtɔ ka mpusu á odo.»
20 Mǒko áonsua nkakɛ ina á Ɛpha nga, ande ama bakpa bɔbhu bunde báoendaa. 21 Mɔkɔta-Mokonga, Mokonga dáphophi ka mǒko na nkakɛ bhɔngɔ á mpokɔ á nyama, áɔ̌ɔlisa u. 22 Mpɔ, Mɔkɔta-Mokonga, Mokonga áɔyɔnga be: « Cɔ, nkpa ayetɔ bea ka besu moci, ka ubha katisana kema anja na kema ajede. Kɛ̌kɛ nde, kananɔɛmbɛ njaga akɛ ka bhɛda phɔtɔ ka mbuka á me á enda na ea i na enda mɛyɔ. » 23 Oa, Mɔkɔta-Mokonga, Mokonga áom'beaga nkpa, áonjuanisa ka nsɛngɛ á ciko á ka Ɛdhɛni, ka gea te agubhɛ odo nde dábanconji ně. 24 Mbusa á beaga á nkpa, áǒbhisa *bakɛlubhi n'okomo á ciko á Ɛdhɛni, â phɔtɔ obhisa píndí nnde aooa nkɛkɛɔ íbɛ, ka amba aphe á me á enda.