2
1 Bende unge Mokonga dágɔbi conja á mokonda na kobha na kema bhui nde a subi i. 2 K'esa á kongia á njaga íbɛ,(7) Mokonga áoumbia mbusa á gɔba á ekuma nɛkɛ bhui nde dábhɛnanigi. 3 Mokonga áobhisa njaga akɛ gǔ á esa ngia á njaga íbɛ,(7) na bhisa i esa á bonjánja. Nga, esa ndɔ unge Mokonga dáumbi ka bhɛdanaga a ekuma á conja á mokonda na kobha. 4 Cɔ, nndɔ ande mbino á conja á mokonda na kobha, bondɔ unge *Mɔkɔta-Mokonga, Mokonga dáconji u.Ciko á ka Ɛdhɛni
5 Ka baniki á me á k'osaa dákatɛimbɛ phɔ tanda ka odo, phɔtɔ kasa moci á k'osaa dákatɛimbɛ goto, nga, *Mɔkɔta-Mokonga, Mokonga dákaɔkisimbɛ mbua gǔ á odo. Bakpa dábakabimbɛ ka gubha á ciko. 6 Oa, kema bea ntoɔ á ibo áophuphuta, áodhɛkisaga odo bhui.
7 Mɔkɔta-Mokonga, Mokonga áɔm'bɔngisiaga nkpa na mpusu á odo. Mpɔ, Mokonga áoophia mpophɛ á enda subi á ɛɔ akɛ, nkpa ndɔ áoba nkpa nde aoenda. 8 Mbusa, *Mɔkɔta-Mokonga, Mokonga áokona ciko moci ka Ɛdhɛni nti á n'okomo. Dámbhisi nkpa nde dám'bɔngisigi kau. 9 *Mɔkɔta-Mokonga, Mokonga dátɛisi etete danga-danga á bame nnde abɔngi ka ɔna i, n'inde a anja k'eea. Áobhisa ka meme á ciko me á enda na me á ubhisa kema nde a anja na kema nde a ajede.
10 Ntoɔ á ibo moci dátoki na Ɛdhɛni, áoyoka ka dhɛkisaga á ciko. Ko, áokatanaga ka sese á banik'ibo gena. 11 Mik'ibo á ka mosa-mosa báɔmɔphana Pisɔ́ni. Mmbɔ ambe atimbi nji bhui á ka Aphíla. Subi á nji ndɔ unge ɔ́lɔ a kau. 12 Ɔ́lɔ a ka nji ndɔ a anja phɛ̂. Ko, a phɔtɔ na me á su a nkoki na ɛtɛ anja phɛ̂ n'anjɛnjɛmani. 13 Mik'ibo á ko íbɛ báɔmɔphana Giɔ́ni. Mmbɔ ambe dátimbi nji bhui á ka Kúsi. 14 Mik'ibo á ko isaɔ báɔmɔphana Tigɛlɛ. Mmbɔ ambe aoyoka nti á n'okomo ka kenombe á Asulía. Mik'ibo á ko gena báɔmɔphana Ɛphulati.
15 Mpɔ Mɔkɔta-Mokonga, Mokonga áɔm'bhɛda nkpa áombhisa subi a ciko á Ɛdhɛni ka gea agubhɛ na bondeaga i. 16 Mɔkɔta-Mokonga, Mokonga áonsosea nkpa ndɔ be: « Ɔɔtɔka n'oi ka bambuka á me bhubhui a ka ciko. 17 Mbuka á me nde a gǎkɛ uubhisa kema anja na kema ajede, koeɛeka kau. Ka nyɔngɔ nde esa nde oeaeka ka mbuka á me ndɔ, okuande.»
18 Mbusa Mɔkɔta-Mokonga, Mokonga áɔyɔnga gea: «Nna anja nkpa aikɛ sasakɛ. Nɛm'bɔngisiagande dhakɛ mmbe anengande anja. » 19 Mɔkɔta-Mokonga, Mokonga áǒconja na odo banyama bɔbhu á k'osaa na bambǔ bɔbhu á na kobha. Mpɔ áobhika nabɔ mɔtɛa nkpa, ka gea ɛ́bɔnɛ na sua abɔ ina nde bɛ́ɔphanaeka kau. Ina nde nkpa ěsuande, a unge babande ně. 20 Mpɔ, nkpa áǒsua banyama bɔbhu étuge, banyama bɔbhu á k'osaa na bambǔ á na kobha ina. Cɔ, nkpa, dhakɛ imbe ankɛni dákatú béi. 21 Cɔ, Mɔkɔta-Mokonga, Mokonga dámaki nkpa ndɔ ka tɔ̌ kpuu! Bii dátu ka tɔ̌, Mɔkɔta-Mokonga, Mokonga dáphui ka bampamba akɛ moci, áodakatisa kesuku ɔma ndɔ. 22 Mɔkɔta-Mokonga, Mokonga áɔm'bɔngisiaga nke na mpamba ndɔ, áom'bhika ně mɔtɛa nkpa. 23 Bii amɔ̌ni nke, áɔyɔnga:
« Eya! Mpɔ etɔ mmbe ande nkua á nkua ani,
kesuku á kesuku ani,
mmbe bamɔphanande nke.
Nga atɔ̌kɛani ka mǒko. »