Buku ndea Mósa
Nkpangeɔ
Conja á mokonda na nkpa
1
1 Ka nkpangeɔ, Mokonga dáconji odo na kobha. 2 Odo dákatu na kaengekɔ, phɔtɔ kanga kema. Kaiphiɔ ásii dágbukumi kibha obenge na ɛphɛu á Mokonga dáoyembiá gǔ á ibo.3 Mpɔ Mokonga áoyɔnga gea: « Ambe oanga abɛ. » Oanga áoba ngbaii! 4 Mokonga dáɔni gea oanga ande kema ánjá. Â gǎkɛ okatanisa oanga na kaiphiɔ. 5 Mokonga áosua oanga « esa », áosua kaiphiɔ « keiphe ». Esa áogɔgɔmana, esa áosa. Datu esa á ko ímoci.
6 Mokonga â goto ɔyɔnga: « Ambe mpɛna abɛ, ka katanisa á ibo gbutuka íbɛ.» 7 Mokonga dági mpɛna, mpɛna ndɔ dákatanisi ibo nnde á k'ego na nnde á kusi a mpɛna. Â tɔ ba bo. 8 Mokonga áosua mpɛna « kobha ». Esa áɔgɔgɔmana, esa áosa. Datu esa á ko íbɛ.
9 Mokonga â goto ɔyɔnga gea: « Ambe ibo nde a kusi á kobha ádhondanɛgɛ k'ɔma ímoci, ka gea ɔbɛ̌ asɛnɛkɛ. » Â tɔ oba bo. 10 Mokonga áosua ɔbɛ̌ « odo », áosua ibo nde adhondanigi « obenge ». Mokonga dáɔni gea nndɔ a anja. 11 Mpɔ Mokonga áɔyɔnga gea: « Ambe odo átɛisɛ kasa na me danga-danga. Kasa áoba na mbo inɛkɛ, me nde aɔgɔmba na mbuka, áoba na mbo etete inɛkɛ. » Â tɔ oba bo. 12 Odo átɛisɛ mbo á tɛisa kasa, n'inde aɔtɛisa me á gɔmbisa mbuka k'etete inɛkɛ danga-danga. Mokonga dáɔni gea nndɔ a anja. 13 Esa áogɔgɔmana, esa áosa. Datu esa á ko isaɔ.
14 Mokonga â goto ɔyɔnga: « Ambe oanga abɛ na kobha ka katanisa keiphe n'esa, ka gea te aengɛ ka mphangiɔ danga-danga á matu, esa na basaga aubhikanɛ. 15 Ambe oanga ábhɛnyɛ ka odo n'áotoka na kobha. » Â tɔ oba bo. 16 Mokonga â gǎkɛ ogea cina á oanga angbóngbo íbɛ. Mmbe a angbóngbo abɛ bea mɔkɔta á ésa, mmbe a abhɔbhɔa abɛ bea mɔkɔta á kǐpha. Â phɔtɔ koyamɛa basɛɛngɔa. 17 Mokonga áǒbhisa na kobha ka gea ba bhɛnyɛ ka odo. 18 Báoba bea bakɔta á kǐpha n'esa, ka katanisa á keiphe n'esa. Mokonga dáɔni gea nndɔ a anja. 19 Esa áɔgɔgɔmana, esa áosa. Datu esa á ko gena.
20 Mokonga áɔyɔnga: « Ambe ibo átumɛ na kema nde aoenda, na bambǔ bayaɛ ka mpɛna á kobha gǔ á odo. » 21 Mokonga dáconji banyama angbóngbo á k'ibo na etete danga-danga á bambǔ bunde báoenda subi á ibo na etete bhui á bambǔ. Mokonga dáɔni gea nndɔ a anja. 22 Mokonga *áobhisa njaga akɛ gǔ abɔ, áǒngodea be: «Bani n'ɛbɔkɔti, bóbikɛ, bótumɛ k'ibo óbenge. Bambǔ babikɛ ka mokonda. » 23 Esa áɔgɔgɔmana, esa áosa. Datu esa á ko bɔku.
24 Mokonga â goto ɔyɔnga gea te: « Ambe odo ákidianisɛ etete bhui á banyama: banyama á tuga, banyama abhɔbhɔbhɔa áodaa, na banyama á k'osaa á etete bhubhui. » Â tɔ oba bo. 25 Mokonga â gǎkɛ ǒgea etete á banyama á k'osaa na bunde á tuga, banyama abhɔbhɔbhɔa áodaa. Mokonga dáɔni gea nndɔ a anja.
26 Mpɔ Mokonga áɔyɔnga gea te: « Béconjɛni bakpa ka keongi asu, bakengeanɛ na besu ka gea te, babɛ na kɔkɔta gǔ á basu á k'obenge, bambǔ á na kobha, banyama á tuga, gǔ á odo bhubhui, gǔ á banyama abhɔbhɔbhɔa áodaa. »
27 Cɔ, Mokonga áǒconja bakpa ka keongi akɛ,
bakpa báobá keongi á Mokonga.
Mokonga aǒconja mǒko na nke.
28 Mbusa i, Mokonga áobhisa njaga akɛ gǔ abɔ. Mpɔ áǒgea: «Báni n'ɛbɔkɔti, bóbikɛ, bótumisɛ mokonda, bhɛdani kɔkɔta gǔ i. Bani na kɔkɔta gǔ á basu á k'obenge, gǔ á bambǔ á na kobha na banyama abhɔbhɔbhɔa áodaa. » 29 Mokonga â goto ɔyɔnga gea: «Nenophi etete á kasa na mbo inɛkɛ, na me nde aɔgɔmbisa mbuka, nndɔ abande ea nɛnu. 30 Cɔ, ka banyama bɔbhu á ka odo, bambǔ bɔbhu á na kobha, banyama abhɔbhɔbhɔa áodaa, ande gea kema bhui nde a n'ɛphɛu á enda, něophi kasa-kasa abɛ ea nɛbɔ. » Â tɔ oba bo. 31 Cɔ, Mokonga dáɔni kema bhui nde dági, dátu anja phɛ̂. Esa áɔgɔgɔmana, esa áosa. Dátu esa á ko ngia á njaga.(6)