21
Ut inim nan inim
1 Nggano, genam Yohanes nemu iti go, ut inim ey kukunan inim ey gemang ikum. Seni so, takuduen so semu go ut ey nan ey, mo nega. Beap tandali go kua ikum dali. 2 Nggano, yakena teguop, ngga Yerusalem inim, Kiwali yakena ba sik so, Ki Wali Iram logo gemang li. Yakena ngga wip dok go, srem semu go, kenin ey tegu genang kabung dok go kalik, teguop dato! 3 Nggano, Iramdemu blo sogo lo, kangok so nebut ngge kalik pu go, genam lo gemang tup, “Ikum-a! Sikabung nesip sono Ki Wali Sip ngge li go! Seni so, sikabung ey klay goso Ki Wali Iram mea susuing. Nggano, Ki Wali Iram go blung so, sikabung mea lemoy. Iram so Ki Wali Iram tang go-a mea got-togon. 4 Nemotnang go unebu, Nemot lo mea drok. Tandali go kebong, yakua pung. Nggano, tandali go genuing yakua suing, u yakua kluo, tandali go iseng yakua tra. Seni so, banim go naklay mo yam.” 5 Ngganemot no, Iramdemu blo sogo lo gemang pu, “Ikum-a! Inim so naklay-naklay Genam lo mea lemoy.” Nemot lo tandali pu go, “Ngge naklay pepen go, seni ey gemang. Tupduk genang gabe. Ngga nemot sogo so, ngge naklay, sam ba no nase klik!” 6 Nggano, tandali go genam sono ngge kalik gabe pu, “Nggeasui go yam so naklay-naklay mo lemoy. Genam ngge Nemot gabe. Takuduen sogo, Genam gabe. I go sogo, Genam gabe! Bunuo eygo sikabung nogo, walibu-a Genam lo mea iti! Duoy logo yakua nay. Ngga, wali genang yelungbu. 7 Suey so don ey nando suing go-a, nemot no ngga naklay Genam lo mea iti. Nemot go Ki Wali Iram so Genam-a. Genam go dem-debui so nemot-a mea temuit. 8 No, suali so kua tupduk kekeng go, piam-a pupluok go, sinebutsi, sikamea duo, isiblue eygo, nggano lema no, didemu no ta kokong go, nebut so iwot go sikabung naklay, idakoy nemon piam go ba sono idok go mea tega.” Ngga, da namon tete sogo kebong gemang.
Yerusalem inim
9 Kiwali tamot meno genam mit no gemang weng. Ngga. tegun bu, idekeba lo damoy goso idok go taidisonamon yam sogo sik sogo Kiwali tamot. Ngge kalik nemot lo gemang pu, “Ngge sono, weng-a! Domba Nok go kabung, srem dali semu go, mot no ya taling-silu go.”
10 Nggano genam Wali Waglo lo mlak go, meduim kangok go blo dega sono, Kiwali tamot lo wawi go gemang klong. Ngga blo sik so, Yerusalem yakena teguop go, Ki Wali Iram sik so, Kiwali yakena ba sik so li go, genam sono nemot lo gemang taling. 11 Seni so, yakena ngga Ki Wali Iram go neblong lo damoy go. Nemot go blong kangok dega, demu samon ey kuadon ey irop go kalik. 12 Yakena ngga go tema blo dega so naklay kangok dega. Yataput kangok go 12 yam so. Yataput ngganemot nogo, Kiwali tamot 12 lo gemang suing-sing. Nggano, yataput ngga blo nogo, Israel go tang 12 go sui gemang klik-sing. 13 Yataput-yataput ngga, woy klak idi no nangglik ey tong, woy sut idi no nangglik dali so tong, dun idi no nangglik dali tong go, nggano sada idi no nangglik dali gemang tong. 14 Yakena ngga go tema kutrui, demu 12 yam dali sogo lo mo sey gemang. Ngga ey, demu ngga temoy no, Domba Nok lo kuoy go tamot 12 go sui gemang klik-sing.
15 Kiwali tamot genam ey nebut so pepen golo emas sik sogo teguoli ta no gemang mlak. Yakena ey, yataput ey tema eygo, teguoli ngganemot lo yam tui genang. 16 Yakena ngga go kuibata, masiwalong, kerlam seguong. Nemot go tebuem namon-namon ey. Se ikum: yakena ngga go yam, Kiwali tamot go teguoli lo gemang tui. Nemot go kuibata, masiwalong, 12 ribu yam no. Seni so, blo sono go, walongbata ey mo kerlam. 17 Yakena tema yam tui go, nemot go blo sono go 144, 12 X 12 yam no. Seni so, Kiwali tamot lo i go, sikabung lo i go ey mo kerlam. 18 Yakena go tema ngga, demusamon klaut-klaut sogo, irop-irop eygo lo klik go. Yang! Yakena ngga tang go, emas iku seni lo samonsuip irop go kalik klik go. 19-20 Tema kutrui so tui go demu naklay temoy nogo, ‘permata’ sukmeno-sukmeno lo, srem gemang semu-sing. Yangga kutrui,
- 1 tete sogo nogo srem, demu ‘yaspis’;
- 2 tete sogo nogo srem, demu ‘nilam’;
- 3 tete sogo nogo srem, demu ‘mira’;
- 4 tete sogo nogo srem, demu ‘samblut’;
- 5 tete sogo nogo srem, demu ‘unam’;
- 6 tete sogo nogo srem, demu ‘sardis’;
- 7 tete sogo nogo srem, demu ‘ratna cempaka’;
- 8 tete sogo nogo srem, demu ‘beril’;
- 9 tete sogo nogo srem, demu ‘klisolit’;
- 10 tete sogo nogo srem, demu ‘klisoplas’;
- 11 tete sogo nogo srem, demu ‘lasuardi’;
- 12 tete sogo nogo srem, demu ‘kecubung’
lo gemang semu-sing.
21 Nggano, 12 yam sogo yataput ngga, mutiara 12 yam sogo lo semu go. Yataput klaya, mutiara klaya. Ngga ey, yakena ba logo tap naklay, emas iku seni lo semu go nogo, samonsuip idop go kalik.
22 Yakena ngga ba nogo, Kiwali yap genam kua ikum. Yang! Woy Wali Iram, Ki Wali Kumam tang go ey, Domba Nok tang eygo-a, Kiwali yap so gemang. 23 Yakena ngga ba nogo banu ey, woy eygo kua pli. Seni so, yakena ngga mablong so Ki Wali Iram go blong lo mo itak. Ngga ey, Domba Nok tang go yakena neblong. 24 Yang! Nemot go blong ba lo saula-saula mea uwali. Yakena ngga sono, kukunan sogo iram naklay lo ta mea kokong. 25 Yakena ngga go yatap naklay, ku blong go nogo, yakua kadun. Seni so, kuklik ngga sogo kua. 26 Yakena ngga sono, naliblong ey ta suey ey, saula-saula lo idok go mea weng-lak. 27 No, yakena ngga ba nogo, tasam piam ey, taybat eygo, wamoymlue sogo sikabung, yakua degut. Domba Nok go Kiki Sam ba no sui klik go seguong-a mea degut.