20
Yagui seribu ba no Iram tamlak go
1 Genam Yohanes nemu iti go, Kiwali yakena ba sik so, lili go, Kiwali tamot meno, gemang ikum. Sikebong sip yatap sebendi ey, lante kangok go ey ta no nemot lo gemang mlak. 2 Ngga ey, walu dega sogo Lema, Kiwali tamot lo gemang mlak. Nggano, yagui seribu yam so suing genang so, nemot lante lo gemang dok. Seni so, Lema ngga ‘Londa’ ey, ‘Kupiamgo’ eygo so pu go. 3 Dok gono, sikebong day dega ba sono betep go, yatap kadun go, sebendi gemang ketok. Ngga sik so, kukunan blo sogo saula-saula, tandali Lema logo yakua mlue. E... yagui seribu ngga mea yam. Ku ngga yam gono, yatap tenuing go, ku tebot dato so, tandali Lema ngga ta mea itak.
4 Nggano, genam nemu iti go, iramdemu blo so nemotgo-nemotgo suing-lak go sikabung gemang ikum. Ngga, blong duoyap go dabui lap. Sikabung neyboy genang don, nemotnang no mo iti. Seni so, Yesus, Iram so yang go sik so, nggano Ki Wali Iram logo nebut ibe no penklong go tang so, blong duoyap ngga, wengkabui tengang lo tong go, mo kebong. Yang! Nemotnang ngga, menay, patung eygo nogo ta kua kokong go, suongdon ey, ta eygo nogo, segey kua gang dali. Kebong gono, tandali nglong go, nggeasui go yagui seribu yam so, Iram Yesus ey nemotnang ey Iramdemu no kerlam so mea suing. 5 Ngge, da klaya tete so nglong go gabe. No, sikabung temu maning kua nglong. E... yagui seribu ngga mea yam.
6 Da klaya tete sogo no nglong go sikabung, Ki Wali Iram sik sogo nenem yakay dega ey! Ki Wali Iram ey, tegadi so dok go Iram Yesus eygo nogo, trang-trang so demusung no taiti-a dewi eygo, nemotnang lo mea keklak. Nggano, yagui seribu yam so, Iram Yesus ey, nemotnang klay gono ta mea mlak. No, nemotnang da namon tete kebong logo yakua gluik.
Tandali Lema namboy itak go
7 Yagui seribu ngganemot yam gono, Sikebong day dega boy sik sogo, Kupiamgo plet go mea pung. 8 Pung gono, saula-saula kukunan blo sogo naklay no, nan sedingno-sedingno klong go, wamoymlue plepung sogo atuia, Kupiamgo ngga lo mea semu. Yangga, Gog-iram ey, nan Magog a eygo no. Yang! Nemotnang pluep genang, tagu i sogo yakua, miam dega ey, beap kaseglok kalik. 9 Nan seding-seding sik so nemotnang naklay kukunan blo lo koklong lak go, e... Ki Wali Iram go blong duoyap go bala-bala ey yakena teguop Yerusalem-sop eygo wok mea teguot. No, se ikum! Ut ba sik so li go koy lo plesi ngga naklay mea kuim-lak. 10 Ngga ey, saula-saula so mlue go Kupiamgo ngganemot, idakoy nebleng nemon piam eygo, beap kalik go ba sono, iti go gemang betep. Ngga, Menay ey, nebut so iwot go nabi piam go eygo klay gono suing genang sip. Ngga ba sogo kuklik-kublong nemotnang nogo iseng, mea tetaling, tong kua tong.
I go seni so neyboy genang
11 Ngganemot no, genam Yohanes nemu iti go, Iramdemu klaut blo sogo Iram dega gemang ikum. Ngga ey, Nemot go suongku sik sogo, kekayso ut ey, nan ey kap go gemang nega-lak. 12 Ngga yam so lemoy gono, Iramdemu sogo suongku no sikabung seguaygo-babugo kebong go pluep go, genam lo mo ikum. Pluep gono, sam-sam gemang truk-sing. Seni so, sam ngga no klik go kalik, sikabung kebong go, nemotnang go takebali tang so mea neyboy. Ngga ey, sam meno klaya gemang truk dali, ngga Kiki Sam. Ngga ba nogo, blong duoyap go sui naklay mo klik-sing. 13 Yang! Beap ba no kebong go, beap ba sik so tandali nglong go mea pung. Nggano, Sikebong ey, Kebong sip ey go sik sogo, gemang itak go pung dali. Ngga ey, takebali tang so nemotnang klay-klay mea neyboy-sing. 14 Ngga naklay lemoy gono, Sikebong ey Kebong sip eygo-a, idakoy dedasing go ba sono gemang betep. Yang! Idakoy ngga, da namon tete sogo kebong. 15 Yang! Kiki Sam ngga ba nogo, nando go sui klik go kua ikum go, idakoy dedasing go ba no gemang betep.