22
Walibu yelung ey walidi eygo
1-2 Se ikum: walibu yelung genam no Kiwali tamot ngga lo gemang taling. Ki Wali Iram ey Domba Nok eygo, Iramdemu ba sik so, walibu yelung ngga gemang pupung. Bu ngganemot, negluong seni idop-idop ey yakena nesip lo gemang betep. Se senong: ketang idi-a idi walidi gemang pung-sing. Yagui klaya ba nogo, di ngga da 12 so mea tagot, banu klaya da klaya. Saula-saula naklay di ngga go dop lo mea pali-sing.
3 Yang! Piam go don, yakena ngga ba nogo, mo kua. No, Ki Wali Iram ey, Domba Nok eygo Iramdemu-a gemang. Ngga ey, Ki Wali Iram no iway-a rlek go, Nemot go walikebali sedue-a mea ip. 4 Ki Wali Iram, nemotnang logo-a mea ikum. Nemotnang go suongdon no, Ki Wali Iram go sui mo klik gemang. 5 Tandali go kuklik kua pung. Koyblong kua, woy ngap genang ngga nogo, nuey-a. Seni so, Ki Wali Mani Iram tang go-a, nemotnang nogo blong so mo lemoy. Yang! Iram so tamlak go, nemotnang ngga mea suing-lak. Tong yakua tong.
Tandali Iram Yesus pung genang
6 Genam sono Kiwali tamot ngga lo pu go, “Se duing: nebutpen ngge seni eygo, tupduk kekeng genang gabe! Seni so, nabi-nabi, Ki Wali Mani Iram go waglo lo tebok-ngam go kalik, nggeasui go Kiwali tamot-a mot-dak go, kutebot ba no lemoy go, Nemot go walikebali sedue lo senong genang.”
7 Ngga temu ey, Blong Dem Yesus lo pu go, “Yang! Keda so Genam mea pung. Se senong: sam ngge ba no taling go deguo ngge, waysagi ey nando lo mlak go, teguop yakay-a Ki Wali Iram lo mea iti.”
8 Deguo ey tasam eygo genam Yohanes lo tup go naklay mo ikum. Ngga ey, ta kong so Kiwali tamot go masi ba no genam gemang unuik. 9 No, genam sono nemot lo pu go, “Esang! Genam sono ta kua kong! Genam ngge, mot ey kerlam go, walikebali sedue dali. Nggano senong eygo nabi-nabi temu ey kerlam go. Nggano, sam ngge lo pu go ikum go, tupduk go sikabung, kalik dali go, genam gabe. Yang! Ki Wali Iram seguong nogo-a, ta imot logo se kokong!”
10 Nggano, tandali genam no Kiwali tamot lo pu go, “Sam ngge ba no klik go deguo, ngga ba sono mot lo kua kok! Nemot go ku pung genang, mo dagu gabe. 11 Yang! Kua seni goso sesemu go, kua seni go-a nase pluok-tenayon! Kon so sesemu go, kon-a nase pluok-tenayon. Tasam suey so pupluok go, suey go-a mea pluok-tenayon. Teguop so uwali go, teguop seni go-a mea pupung!”
12 Ngga ey, Yesus lo pu go, “Keda so Genam mea pung. Sikabung go walikebali way, Genam lo mea iti. 13 Genam ngge Nemot gabe. Takuduen sogo, Genam gabe. I go sogo, Genam gabe.” 14 Nando go kuklue, piam konkebamling bu ulu go, yakena yataput lo mea degut. Ngga ey, walidi go don buo go dam genang don mea iti. Nemotnang ngga-a teguop yakay Ki Wali Iram lo iti go ba so mea wali. 15 No, esang, kuklue, piam kon eygo! Yangga: siblue duo, sikamea duo, sinebutsi, didemu no ta so kokong go, nggano sikabung nebut wamoymlue eygo naklay-a, yakua degut. Dia idi so nemotnang se susuing-lak.
16 “Genam ngge Yesus! Genam go Kiwali tamot mot-dak go Blong duoyap naklay no deguo ngge penklong genang so, gabe klong. iram Daut go mlena-walasrang tip, tegadi dok go Danon Genam gabe. Iram Genam ngge, kublong yam no, keklak go besue dega.”
17 Se tup! Ki Wali Waglo ey, blong duoyap kabung srem eygo lo kerlam so usi go, “Weng-a!” Deguo ngge so tup go naklay golo se pu dali, “Weng-a!” Yang! Nando bunuo eygo, nase weng! Walibu so duduing go, tebadali iti go ba drop-a!
Yam sogo nebut
18 Sam ngge ba no klik go deguo nando tup go, gabe pen-asitugu: tebadali go ey, kua tebok! Nando lo tebok go, sam ngge ba no pen go dalu piam-piam, nemot sono Ki Wali Iram lo mea tebok dali. 19 Ngga ey, deguo ngge ba no pen go, nando lo ibot go, gabe pen-asitugu: nemot nogo tegadi so sam ngge ba no dok go taitiblong, Ki Wali Iram lo mea ibot dali! Ibot genang ngga, yakena teguop ba sogo sip ey, walidi eygo sik sogo seni eygo. 20 Deguo ngge naklay so taling go, Blong Dem lo gemang pu, “Yang! Keda so Genam mea pung!” Way so blong lo pu go, “Seni! Woy Dem Yesus, pung-a!”
21 Senang so motnang ey, Woy Dem Yesus go taitiklum-a mea gigit!