16
Tegun bu taidisonamon yam sogo kukunan blo sono pi go
1 Yang, seni so! Nebutkluim kangok go, genam Yohanes lo mo tup. Ki Wali Yap ba sik so Kiwali tamot taidisonamon yam sogo ngganemot sono, ngge kalik nemot lo pu go, “Nggeasui go klong-a! Kukunan blo sono anggul tegun, Ki Wali Iram go dabuipiam taidisonamon yam sogo ngga, iti go se pi-sing!”
2 Ngga ey, Kiwali tamot klaya tete sogo pung go koklong go, kukunan blo sono tegun bu ngga gemang pi. Ngga lo, Menay sik sogo segey eygo, duosana-sana no takokong go sikabung, saysuk nogo kluo piam go iseng eygo-a, mata so gemang pung-sing.
3 Namon tete sogo Kiwali tamot koklong go, tegun bu iti go, beap blo sono gemang pi. Ngga ey, kin suk-a beap iwot go, sedue kebong go kin kalik, gemang ikum. Beap ba menay naklay ngga lo se leguot-anatun.
4 Nangglik tete sogo Kiwali tamot koklong golo, tegun bu iti go, betuobu-betuobu, buput-buput pupung go ba sono gemang pi. Ngga ey, kin suk-a bu naklay gemang iwot-sing.
5 Ngga lemoy go nogo, betuobu-betuobu ta so mlak go Kiwali tamot lo gemang pu, “O, Aya, Mot logo kisebui ngge seni eygo mo taling. Mot teguop go. Mot gemang, Mot gabe. 6 Yang! Kiwali blung teguop go ey, senong eygo nabi-nabi tuk-sing go kin, mo pi-ngum. Nggeasui go, nemotnang nogo kin way Mot lo iti go se drop-nesiyon. Ngga, nemotnang go takebali tang so, nemudi so taling go gabe!”
7 Ngga ey, demusung blo sik so ngge kalik tenguo go, genam Yohanes mo tup,
Ya, Woy Wali Iram, Ki Wali Kumam.
Mot logo kisebui, naklay seni eygo,
nemudi so gabe tetaling.
Seni!
8 Namon-namon tete sogo Kiwali tamot koklong golo, tegun bu iti go woy blo sono gemang pi. Ngga ey, kukunan sikabung go saysuk, woy so waluk don lo gemang buot-sing. 9 Ki Wali Iram go don lo saysuk buot go iseng tetra go tang so, Ki Wali Iram go sui sikabung lo gemang wayang. No, piam-piam ngga itak go teguey sogo nemotnang moyso. Nemot nogo iway-a kua iti ne!
10-11 Taidi tete sogo Kiwali tamot koklong golo, tegun bu iti go, Menay go iramdemu sono gemang pi. Ngga ey, Menay go blongdon naklay gemang kenip. Tasam ngga naklay lemoy go nogo, kluo iseng sogo so nemotnang go nebleng wasrang lo glok go, Kiwali yakena ba sogo Ki Wali Iram, menay no keng go sikabung lo gemang wayang. No, piam-piam ngga itak go nemotnang teguey sogo, moyso.
12 Taidisoklaya tete sogo Kiwali tamot klong go, tegun bu iti go, Eplat bu kangok go sang so tui go sono, gemang pi. Ngga ey, betuobu kangok go ngganemot kekayso pang go, tap so gemang lemoy. Nggano, menay ey ple tui genang sogo tap ngganemot lo woy klak sik sogo iram-iram degut-lak genang.
13 Se ikum! Yaut suk sogo Kuasep nangglik gemang pung-lak. Yangga, meno Lemakupiamgo lom ba sik so pung go, meno Menay banim go lom ba sik so, nggano meno dali duosana-sana, ngga Nabi piam go lom ba lo pung go. 14 Kuasep ngga kudumat don lo yam so pedot-sing go. Tasam kangok go mata so, kukunan sedingno-seding no don ngganemot lo nemotnangglik gemang pupluokklong. Ngga tang so, kukunan iram naklay yaluim go, Ki Wali Kumam go ku kangok go nogo ple tui genang. 15 Ngganemot sogo so, blong duoyap se tup: “Woy Wali Iram, Genam gabe! Womsedue kalik pung so mea pung. Genam pung go nogo, motnang amka klaut ey dali kok go bubung go-a, ulue so yakua ip, suongsut eygo yakua!”
Kukunan blo sono yam sogo tegun bu pi go
16 Sip klaya go sono, kukunan iram naklay, Kuasep piam golo gemang yaluim-lak. Sip ngga nan Israel sogo meduim, Iblani nebut so pu go, ‘Har-Magedon’. 17 Taidisonamon tete Kiwali tamot koklong golo, tegun bu iti go, ut blo lo gemang pi-biwon. Ngganemot no Ki Wali Yap ba sogo Iramdemu blo sik sogo nebut, kangok so ngge kalik gemang pu, “Kupiam go ku mo yam!” 18 Ngga kalik pu gono, kuydop, kukluim kangok go ey, way-way so sesebuk. Ngga ey, babu dega so kuysu gemang lek. Seni so, kublung kong go sik so, ngga kalik go kuysu maning kua lek, kuysu meno-meno eygo kua kerlam. Babu dega seni! 19 Seni so, Ki Wali Iram go dabuipiam dega, anggul tegun damoy eygo ngga, piam unen yakena kangok go Babilon nogo so iti go. Ngga lemoy gono, yakena kangok go kekayso nangglik ey sran go, gemang pui. Nggano, kukunan saula-saula go yakena naklay yam so gemang net-anatun dali. 20 Yang! Nan-nan beap lo tong go, meduim-meduim naklay kekayso gemang nega. Nemot go sip tandali go kua ikum. 21 Esdemu ide dega eygo, sa so sikabung blo sono gemang pu-sing. Ngga tang so, dabuipiam ey Ki Wali Iram go sui sikabung lo gemang wayang. Seni so, iseng ngga babu dega seni!