15
Ki Wali Iram go sui iway iti go
1 Yang! Tasam kangok go meno, ut ba no go genam Yohanes mo ikum: Kiwali tamot taidisonamon yam so, i go sogo iseng taidisonamon tete ey gemang pung. Ngga Ki Wali Iram go dabuipiam yam genang.
2 Ngga ey, beap idop-idop dega eygo, koyneblong ey bluot go kalik, genam lo gemang ikum. Ngga blo so, Domba Nok go sui ba no, don ey suing go sikabung gemang. Yangga: Menay ey, duosana-sana ey, segey gang go sui eygo don, nemotnang lo mo pedueng-sing. Se ikum: Ki Wali Iram sono yakay iti genang, bloma ta no gemang mlak-sing. 3-4 Ngga ey, Ki Wali Iram go kebalisedue Musa ey, Domba Nok logo u ey, nemotnang lo ngge kalik gemang kluo-netebawon,
“Woy Wali Iram!
Mot, atnang go Ki Wali Kumam!
Mot go tasam, naklay don-dega ey!
Mot lo ta mlak go tap, seni eygo, nemudi so!
Saula-saula nogo Iram Dega, Mot gabe!
Woy Wali Iram! Mot seguong-a teguop dato!
Nando logo-a Mot nogo suali eygo ta ya kua kong go?
Mot go tasam seni eygo ibe lo ikum go tang so,
saula-saula weng go, unuik go Mot no ta mea kokong.
Seni!”
Ki Wali Iram go dabuipiam
5 Ngga blo idi lo, genam nemu iti go, blo sogo Kiwali Yap, ngga Ki Wali Tegadi Bala, yatap tenuing go gemang ikum. 6 Ngga ba sik so, iseng taidisonamon yam sogo ey, Kiwali tamot gemang pluep-lak. Nemotnang go amka lenan klaut, irop-irop ey. Nggano, dabuidon nogo, temoybung so, emas logo kuibey ey gemang glung-sing. 7 Nggano, Walikabung namon-namon ip go, Kiwali tamot taidisonamon no, emas logo tegun taidisonamon yam so gemang ikak. Tegun ngga, Ki Wali Mani Iram go dabuipiam lo damoy-sing go. 8 Yang! Ki Wali Yap naklay, Ki Wali Iram go blongdon waw lo yam so gemang kenok. Yap ngga ba sono go klayanang go yakua degut. E... iseng taidisonamon yam sogo, naklay Kiwali tamot taidisonamon lo taling gono, mea degut.