17
Yakena Babilon nogo idekeba iti genang ku mo pung
1 Ngga blo idi lo, genam Yohanes no ngge kalik, tegun bu taidisonamon eygo Kiwali tamot meno lo gemang pu, “Ngge sono weng-a! Piam unen yakena Babilon nogo so kisebui iti-silu genang, pla ikum-a! Esang! Butuobu nesip no piam-a puplok go sikamea duo, nemot dega gabe.” 2 Kukunan sogo iram naklay kamea ta-a nemot ey keduik go. Esang! Kamea bu ngga drop golo kukunan sikabung naklay mo puplu.
3 Ngga senong genang so, kekay so Ki Wali Waglo go don lo genam, Yohanes se saguip. Nggano, genam Kiwali tamot ngganemot lo wawi go, kaseglokpay seduekuagosip sono gemang klong. Pung gono, genam nemu iti go, kin suk sogo menay blo no suing go kabung gemang ikum. Ki Wali Iram suongsut wayang genang sui peysing-paysing so pu go, menay temoy no gemang klik-sing. Menay ngga go wengkabui, taidisonamon, matu tanamon ey gemang. 4 Buensani suk so bom-bom eygo amka-a kabung ngga lo gemang kok. Nemot temoy nogo srem glung go, ngga: emas, demusamon suey golo semu go ngoyundan. Nggano, ta no nemot lo mlak go, degit tegun emas klaya. Ngga ba nogo, sikamea takeduik go, taybat kua seni go naklay lo mo tram. 5 Suongdon nogo, sui meno mo klik. Ibe logo sui ngga yakua senong. Ngga, ‘Babilon dega’ sikamea unen, kukunan piam go nuik. 6 Yang! Genam ikum go, kabung ngganemot, Ki Wali Iram go blong duoyap go kin drop golo mo puplu. Yangga, Yesus no tupduk go tang so tuk go leguot go sikabung. Ngga ikum go sik so, saduibong ey genam gemang pling. 7 Ngga kalik ikum gono, Kiwali tamot ngga lo gemang usi-nawon, “Sogo kalik golo mot kuikui-dapto?” Se senong! Menay wengkabui taidisonamon, matu tanamon yam sogo blo no klak go kabung seni senong genang, mea pen-asilu!
8 Se tup: Ikum-to go menay ngga, gemang. No, nggeasui go kua. Ku tebot ba no, dayput kangok go, Sikebong sip sik so mea pung-ayon. No, pung gono, keda so mea nega. Esang! Kublung kong go sik so, Kiki Sam ba no kua klik go sikabung, menay ngga ikum go, ta wasrang glok go mea nega-neyon, “Esang! Menay ngga, gemang. No, kua dali gabe! Nggano, tandali mea pung-ayun.”
9 Yang! Nemot go seni naklay mlak genang, senongduduing kalong eygo wagloblong lo se pung. Duing-a: wengkabui taidisonamon eygo menay ngga, meduim taidisonamon. Ngga blo so ‘kabung’ gemang. Wengkabui taidisonamon yam sogo, seni meno gemang: ngga taidisonamon yam sogo iram-iram. 10 Iram taidisonamon ngganemot sik sogo iram taidi mo kenuong. No, klaya go-a maning gemang. Klaya dali go maning kua pung. Pung go, walong so kua got-yon. 11 Se duing! Menay banim gemang go, no, nggeasui go kua go, yangga: taidisonangglik tete sogo iram so mea got-yon. Nemot-a, taidisonamon yam sogo no mo i dali. No, kebong sono, nemot gemang kekap. 12 Mot lo ikum tanamon yam sogo matu, ngga iram maning kua temuit go deguena tanamon gemang. No, woy klaya seguong no menay ey kerlam-kerlam so tamlak go don nemotnang no mea iti. 13 Seni so, deguena-deguena ngga go duduing klaya seguong. Yangga: menay ngganemot seguong sono asay-blong naklay nemotnang logo mea itak. 14 Ngga sik so, Domba Nok ey ple tui genang-a, nemotnang naklay lo mea duen-neyon. No, nemotnang-a don kua goso Domba Nok lo mea kenok. Yang! Domba Nok ngga seduewoy naklay go Woy Dem, Deguena naklay go Iram, don dega eygo! Se senong: nemot tete so kuoy go blung, tupduk so nemudi sogo, gemang keng.
15 Ngge kalik tandali genam sono Kiwali tamot ngga lo pu go, “Betuobu mata so ikum-to go, ngga saula-saula, nan-nan, tang-tang, sikamea kabung no duk go uduonebo gemang. 16 No, se senong: sikamea kabung, a so dabuipiam go, mot lo ikum go deguena tanamon ey, menay eygo lo mea waydang-neyon. Ngga sik so, nemot go saysuk nogo srem, taut naklay idok go tega go, ulue so sikamea kabung ngga mea itak. Ngganemot no, pedom so nemot go kedong-a dam go, temu itak go koy sono nemotnang lo mea puit. 17 Kua kay! Ki Wali Iram go duduing no ngge naklay lemoy go gabe. Yangga: dabui klaya iram-iram lemoy go, menay sono asay blong naklay iti gono, Ki Wali Iram lo pu go-a, mea pung. 18 Seni so, mot lo ikum-to go kabung ngga, kukunan blo sogo iram naklay ta so mlak go yakena kangok go gemang.”