2 YOHANES
1
Sam so tenuing go
1 Iram Yesus go blung naklay nogo so klik go sam. Iram Yesus go blung so, motnang-a Ki Wali Iram lo mo kuoy. Moya sop! Mot go ndengtabang ba sogo blong duoyap ey, suey gemang! Motnang nogo genam go dabuiklum kangok. Yang! Walitap seni eygo senong go blong duoyap naklay nogo, genam dabui lo klum gabe tetra. Genam Yohanes ngge, blong duoyap go trang dega gabe. 2 Iram Yesus, seni go nuik! Tong kua tong, klay goso imot go dabui ba no gigit go tang so, sam ngge gabe kiklik.
3 Imot nogo, taitiklum, gualaklum, ngengam-yakay, Ki Wali Aya ey, Danon Iram Yesus eygo-a gemang ya gigit. Walitap seni no keng golo, klum ba lo naklay mea pupluok.
Klum seni eygo
4 Moya sop! Genam senong go, mot go duoyap temu walitap, Ki Wali Aya lo iti go demu no gabe kekeng. Ngga tang so, genam yakay kangok.
5 Moya sop se tup! Gabe pen-asitugu, “Way-way klum-a imot se tetaling!” pen-asitugu go ngge, demu demening go-a kua pen gabe. No, maning imening keng gono, imot no demu ngge Blong Dem tang golo mo iti-ngam. 6 Ki Wali Iram go demu no tupduk keng go, ngga klum min gemang. Seni so! Kuduong so tup go demu ngga lo, imot se uwali.
7 Esang! Nggeasui go, kukunan nogo, klui piam go mo suep-lak gabe. Kukunan blo sono sedue so Blong Dem Yesus lemoy go, nemotnang logo mea kua yang. Ngga kalik tenguo go, Blong Dem go plesi, Wamoy Iram nemotnang gemang. Tap paysing sogo-a gemang tetaling. 8 Kunala temoy no se! Motnang nguok so seguot atnang lo pung go, nega genaning. No, Ki Wali Iram sik sogo taiti tabunga iti genang-a, kangok so se u-usey! 9 Blong Dem lo nguok go tap nando lo itak go, banom tap so koklong go, Ki Wali Iram nemot logo kua uwawi. No, Blong Dem lo nguok go walitap seguong no nando lo kekeng go, Ki Wali Aya, Danon eygo nemot ba no gemang. 10 Nando lo Blong Dem go tap ngga-a kua nguok go, yap ba no glop sogo kua wawi. Nemot nogo, ta kua kong dali. 11 Se senong: nando lo takong go, sedue ngga go tasam piam go, mo lek dali gemang.
Sam yam sogo nebut
12 Motnang no pen genang nebut mata dega so gemang. Sam no dinekuoy lo yakua klik-srelu. No, klong go, motnang ey tegu go, nebut lo mea pen. Ngga genam gabe duduing. Tegu sik so dabui yakay teguop imot nogo pung genang.
13 Moya sat sop! Ngge sogo duoyap, Ki Wali Iram lo kuoy go logo suey, motnang nogo gabe pupu dali.