5
Kukunan don Yesus no keng golo mea pedueng
1 Se senong! Dabui ba nogo ngge kalik yang go, “Tegadi so Ki Wali Iram lo dok go Iram, ngga Yesus gabe”, nemot ngga Ki Wali Iram sik so tui go duo gemang. Ki Wali Aya nogo, nando klum eygo, Ki Wali Aya sik so tui go duoyap temu nogo, klum dali ey mea tetaling. 2 Yang! Ki Wali Iram nogo, klum eygo, walidemu tupduk go, mea senong: Ki Wali Iram go duoyap temu nogo klum, imot gabe dali. 3 Ki Wali Iram nogo nando klum eygo walidemu naklay no, tupduk so nemot lo mea pluok. Se senong: Ki Iram lo iti go walidemu ngga, keng genang ide kua, iwa-iwa seni so gabe. 4 Kukunan go don Ki Wali Iram sik so tui go duoyap lo gabe pepedueng. Yang! Iram Yesus no dabui lo keng go tang so, kukunan go don imot logo gabe seguoy-sing.
Ki Wali Danon ibe lo senong genang
5 Kukunan go don, nando logo so, ya pedueng? Yang! Yesus, Ki Wali Danon so yang go logo-a, kukunan don mea gualing. 6 Se duing! Kukunan blo nogo, bu tui go tap ey, kin pi go kebong go tap eygo lo, Blong Dem mo pung gabe. Yang! bu tui tap seguong-a kua, kin pi go, kebong go tap ey go-a gabe taling. Se senong! Ki Wali Waglo-a, seni eygo nuik gabe! Blong Dem so ibe nogo, Ki Wali Waglo tang golo mo yang: bu tui go, kin pi go tap lo, Blong Dem seni so mo pung!
7-8 Se senong! Ibe no Yesus Danon so yang go, tasam nangglik ngge gabe:
Yangga:
- Ki Wali Waglo dabui lo iwat go;
- Sikabung bu tui golo yang go;
- Yesus go kin so taling go anggul drop golo.
9 Se senong! Ibe no sikabung lo yang go, imot keng go, Ki Wali Iram tang so taling go-a, don dega ey se mlak! Ibe no ngge-a Ki Wali Iram lo gabe taling, “Ngge Genam go Duo gabe.” 10 Ki Wali Danon so, Blong Dem Yesus nando lo yang go, nemot go dabui ba nogo senong ngga gemang. No, Danon so, Ki Wali Iram lo yang go mo tenguo go, Ki Wali Iram wamoymlue so, nemot lo gemang temuit sang. 11 Dabui ba sogo senong ngga, ngge kalik gabe taling:
- imot nogo, kiki wali-a, Ki Wali Iram lo mo iti gabe.
- Kiki wali ngga Ki Wali Danon ba so gemang.
12 Dabui ba no, Danon nando lo wawi go, kikiwali inim ey iti go nemot gabe ip. Danon kua uwawi go, kikiwali inim nemot kua gemang.
Kiki wali tong kua tong go
13 Ngge naklay senong genang so gabe klik-situgu: Danon-a dabui iti go keng go, kikiwali inim sono nemot mo degut gemang. 14 Yang! Ki Wali Iram go suongku nogo, nisonoso imot mea ip. Nemot lo iwat go dewi-a imot keklak go, Nemot tang golo mea tup seni. 15 Nemot sono dewi pupu go, ngge-a imot se senong, “Uwadong go ngga, Nemot tang golo tup go imot nogo mo iti.”
16 Dewi tap ngge, kua kay! Blong duoyap sik sogo andua meno lo kuklue pluok go, Ki Wali Iram sono, dewi-a nemot so ikum go andua lo se pu! Dewi pu go sik so, wali suey go-a andua ngga nogo pung genang. No, kuklue meno gemang dali. Ngga, Ki Wali Iram go don so wayang go-a, tandali wali sono go nemot yakua lek. Ki Wali Iram eygo mo tong-lak gemang. Gabe pen-asitugu, “Tebadali nemotnang sogo dewi kua pupu.” 17 Yang! Kuklue naklay, piam konkebamling! No, walitap nogo kebong eygo pung go kuklue gemang; kebong ey kua pung go gemang dali.
18 Imot gabe senong: Ki Wali Iram sik so tui go blong duoyap, tap piam go-a kua koklong gabe. Blong duoyap Ki Wali Iram sik so tui go Danon go ndengtabang ba so gabe. Ngga tang so, Kupiam golo waluk genang, blong duoyap mea kua lek. 19 Nemot-a, kukunan ngge naklay Kupiamgo masi ba so gigit go, ngge-a imot gabe senong: imot-a Ki Wali Iram sik so pung go gabe. 20 Ngga ey, imot gabe senong dali: Ki Wali Iram seni senong genang, Ki Wali Danon mo pung gabe. Yang! Imot go wali klaya goso, Ki Wali Iram ey Nemot go Danon, Iram Yesus lo mo dok gabe. Yesus ngga, Ki Wali Iram klayking, kikiwali inim Nemot-a gabe got-ton.
21 Dem-debui, blong duoyap! Ida, didemu, demat, naliwabu, kukunan kuasep nogo kunala temoy no se!