3
Senongkalong eygo pung genang
1-2 Dem debui sop, blong duoyap! Banim no, motnang nogo, sam klaya tete sogo, genam mo klik. Ngge, da namon tete sogo sam, motnang nogo gabe. Se senong! Kunala nenggluong go kalong ey, motnang ba nogo tandali duing go senong pung genang so, sam namon ngge gabe kiklik. Yangga: banim go nabi-nabi teguop golo pen-nengam go, nggano imot go Sesuoy Iram Woy Dem lo pu go walidemu, motnang nogo tamot-tamot go lom lo mo pen.
Ku pung genang iti-tui sogo kua duing
3 Klaya seni sogo ngge, kua kay! Kunala temoy no se suing! Ku yam sogo nogo, duduing piam golo dok go sikabung mea pluep-lak. Ngga ey, motnang sogo, piam-piam so ngge kalik mea wayang-netogon, 4 “Tandali pung genang so, Woy Dem pu-yom go! Nemot kay pung-aton? Esang! Mu sono, imot go moy-ay da naklay koklong-lak go. Ku so semu go kalik, maning git-atugun go.” 5-7 No, ngga seni so mo pu? Se senong! Kuduong sogo, utey-naney Ki Wali Kumam go senongblong-duduing no mo lemoy-ngam. Kukunan ngga, bu sik so bu blo no lemoy go. No, bu dali, kangok so klak golo, ku so semu go nan ngganemot kenok go, sikabung mo leguot-lak. Ngga, keduong sogo kukunan gemang.
No, ut ey nan ey nggeasui go ngge, Ki Wali Iram go senongblong-duduing klaya go ngga dali lo, yay gabe got-ton, e… sikabung piam go, kisebui iti go, waluk genang ku no mea pung. Nggano ut ey nan ey koy lo mea puit-dak.
8-9 Dem debui, blong duoyap! Klaya go ngge-a, motnang kua kay! Woy Dem go ku mea pung-ayun. No, sikabung temu lo duing go, “Ngga lemoy genang sogo, Woy Dem iti-tui sogo gabe.” Genam, Simon Petrus lo pu go, “Sikabung naklay wali teguey go Woy Dem no keng genang so, gabe gling-ton. Klaya nang go waluk genang, Woy Dem kua iwat. Ngga ey se senong: Ki Wali Iram go suongku nogo, ku klaya go, yagui miam dega go ey mo kerlam. Nggano: yagui miam eygo, ku klaya go ey mo kerlam dali.”
Blong Dem pung genang sogo kalik ya
10 Se senong! Woy Dem pung genang, wom sedue kalik lemoy so mea lemoy. Ku ngganemot no, ut ey nan ey ku kluim kangok go ba lo mea nega. Ngga ey, ut blo sogo woy, banu, top naklay, koy lo mea kuim. Nggano Ki Wali Iram lo neyboy genang so, kukunan tasam naklay nenguon so mea pung.
11 Ngga naklay waluk go, motnang go wali sogo kalik ya? Ayanang, mianang! Imot go wali ngge-a, teguop so, Ki Wali Iram lo iwat go-a, se suing! 12-13 Ki Wali Iram go kisebui ku ngganemot pung sogo-a dabui lo motnang se bubung. Keda so Woy Dem pung genang, wali kebali suey go-a, motnang lo ya semu go-a, se pupluok!
Ayanang, mianang! Nemot-a, ku ngganemot nogo, ut ngga ba sogo seni naklay ey, koy lo kuim go nega go, ut ey nan ey demening go, Ki Wali Iram lo tegadi so dok go-a, dabui lo gabe duen-eton. Ngga sogo wali, seni eygo nemudi sogo seguong-a gemang!
Don kok genang nebut mangking
14 Dem-debui, blong duoyap! Ku ngganemot so bubung go nogo, ngge naklay-a, Woy Dem go suongku nogo se ikum: waliteguop piam kua go, Blong Dem ey ngengam keduik genang-a, kangok so motnang logo se usey! 15 Se senong! Nemot weng genang ku maning kua pung go imot go Woy Dem lo gigling go ngga, sikabung sesuoy genang so, ku iti go gemang. Ngga, sam ba no motnang nogo so, nemot no senongduduing iti golo Paulus-dem mo klik-yom gemang. 16 Seni so, Paulus-dem lo klik go sam temu ba nogo, duduing ngga mo klik-sing. No, suey so naklay senong genang, keda so yakua mlak. Diding ba logo tang so, kunala kua go sikabung temu, suey so don ey kua keng golo, way so iwot-sing so, ne nguok klong. Seni so, Wali Sam klaut temu ba sogo kunala naklay, ngga kalik nemotnang lo gemang ngunguok dali. No, ngga kalik golo, nemotnang tang go waluk genang tap-a gemang tetaling.
17 Dem-debui blong duoyap! Woy Dem pung genang lelemoy go, motnang mo senong. Ngganemot sogo so, kunala temoy no motnang-a se! Walidemu kua mlak go sikabung go tap piam golo wawi genaning! Woy Dem blo no don ey masi-a se gualing-lak! 18 Ngga ey, imot go Sesuoy Iram, Woy Dem Iram Yesus lo uwasey go taitiklum, senongduduing ba no, segu genang-a motnang se u-usey!
Nemot go sui iway-a, blo sono go se keklak! Nggeasui sik so, e... senang so se iti! Seni!