2
Kisebui taling genang nebut
1 Ayanang, mianang! Se senong: blung Israel ba nogo tap paysing so ngunguok go nabi-nabi mo pung-nengam. Yang! Nggeasui go ku nogo, motnang sik sogo klui-klui piam go ngga kalik dali mea. Sikabung ey uwaluk go tap piam sogo, nemotnang lo iti go mea degut. Nemot-a, Woy Wali Danon go kin lo mo king go, nemotnang tang golo mea paysing, esang. No, se ikum! Saysuk blo nogo piam wayang go sik so iti golo, keda so nemotnang tang so mea waluk. 2 Klui-klui piam go ngganemot nogo, blong duoyap miam ey mea keng. Seni so, saysuk go duduing no, tasam-tasam piam go nemotnang lo pluok go sik so, seni eygo walitap, piam so ibe lo mea pu. 3 Yang! Taut nagluim kunala sik so, motnang sogo nebutiwot ta lo mea semu. No, walu so idekeba iti genang ku, nemotnang nogo so dali Ki Wali Iram lo mo tui gemang. Kedaso nemotnang go wali mea waluk.
4 Ayanang, mianang! Kisebui iti go tap ngge-a, motnang se duing! Walu dega so, kuklue Ki Wali tamot-tamot lo pluok go, idekeba-a mo taling! Sikebong sip, day kangok go sono, dok go mo tega-sing. Ngga so, kuklik go ba no, kisebui Ki Wali Iram lo iti genang so nemotnang gemang bubung. 5 Ngge se senong dali: banim go kukunan sikabung, Adam sik so, e... Noak no pung go, ngga kalik dali, taybat piam go pupluok go sogo, kisebui iti genang kua itak-srengam. Noak-a, Ki Wali Iram go dabui nogo iwat go, wali seni eygo tang so, don ey mang mo king-ngam. No, kukunan sikabung naklay, tasam piam go-a, ne yambeto-neakam. Ngga tang so, bu klak golo nasup go, yam so mo leguot-sing. No, Noak-a nemot go yap tenglam ba sogo taidisonamon yam eygo-a, wali so gemang sesuoy. a
6-8 Israel go babu Lot no se ikum dali! Yang! Seni eygo, nemudi sogo tap lo koklong go, Lot-a gemang got-anakam. Kuno-woyno, Sodom, Gomora eygo lo pupluok go taybat-a i-ikum, tup-anakam. b Yang! Tabat piam eygo sikabung nesip no dabui sadui ey, suongsut ey tebadali Lot gemang got-nakam. c Ngga tang so, Sodom, Gomora eygo no kisebui taling go, Lot-a mo sesuoy. Yakena-yakena ngga, yam so Ki Wali Iram lo puit go mo kuim. Ngga naklay, nggeasui go sikabung taybat so yambeto go nogo yatrang.
9 Tasam-tasam ngga sik so, ngge se mlak: nago no blong duoyap iseng yatrang lek go, Woy Wali Iram lo mea sesuoy. No, neneyboy ku pung go nogo, piam so yambeto go sikabung-a, kisebui iti genang so, Nemot lo mea dok go gigit. 10a Se senong! Tap paysing so pupluok go klui-klui-a, kisebui mea iti. Yangga: suongsut kua goso, taybat duduing piam go, kamea-kamea-a uwet go, ngga, Ki Wali Iram go don so uwayang go sikabung naklay gemang.
Nebuemnebit temoy no uwet go klui-klui
2 Petrus 2:10b-16
10b Blong duoyap sik so nega go klui-klui gemang. Suali kua goso, dabuitategue ey, ut ba sogo blongdon so uwayang go, nemotnang gabe. 11 No se duing: Ki Wali Iram go suongku nogo Ki Wali tamot-tamot-a suali ey. Ut ba sogo don kangok go nemotnang lo bebat go, idekeba taling genang, yakua! 12 No, esang! Nega go klui-klui ngga kalik kua ne. Menay kalik tui go, nebuemnebit temoy no, tebadali uwet go, truik go, but go kebong genang, nemotnang gemang. Ut ba sogo blongdon kua senong, nebut piam-piam-a, tebadali nemotnang lo gemang uwayang. No, tasam piam go-a yambeto go sik so, nemotnang mea waluk. 13 Taybat-a usey go sik so, iseng way nemotnang mea lek dali. Yang! Nemotnang lo duing go, “At go saysuk go duduing, taybat-a, dabuirley genang sogo, woy nenguon no mea pupluok.” Nago no walop sogo no, imot ey pung go, nemotnang go taybat ikum go sogo, kusui rlom ey mea tetra. Seni so, bu lo rlo go kalik, yakay wamoymlue-a nemotnang lo gemang pepla. 14 Taybat pupluok sogo, nemotnang yakua besam. Kabung iti-itak-a, senang so nemu lo gemang uwet. Don kua go sikabung, nemotnang go piam don lo gemang lelek. Nemotnang go dabui, gugluik lo naklay mo damoy. Yang! Waluk genang so tenguo go, nemotnang gemang!
15 Nemudi sogo tap lo duk genang, nemotnang moyso. No, tap kua golo keng go gemang koklong-lak. Babuasi Bileam, d Beor go danon logo tap, banim go-a, nemotnang logo gemang keng-lak. Se duing! Bileam go yakay ngge kalik: tabat piam go pupluok go sik so, duoy iyaluim genang. 16 No, Nemot go takebali piam go ngga tang sogo so, nemot nogo nebut dawin ey gemang bebat. Yangga: kuda, nemot klak go koklong golo, sikabung go nebut so pang go, gemang bebat-nawon, “Bileam se tup! Puplu sogo klaydrang kunala, ngga sono se itak.”
Klui-klui piam go nogo kisebui
17 Se senong! Taitak goso nguok go klui-klui piam go, bu pang go bumu kalik, seni kua. Lekuoy-lekuoy sogo utkenuim nebit kangok golo kerlok go kalik, iwa-iwa so nemotnang gemang. Yang, kukuim sogo sip meno, dali nemotnang nogo so semu go, gemang gigit.
18 Seni kua go nebut-a kangok so klui-klui piam go logo gemang pepen. Ngga ey, saysuk go duduing suongsut kua golo, nega go sik so demening sesuoy go sikabung tandali piam sono, nemotnang lo gemang lelek. 19 Se senong: taitak goso uwali genang tegadi-a, tebadali klui-klui piam go ngga lo gemang penklong. No, esang! Tasam-tasam waluk golo, nemotnang tang go-a, keduik go gemang lelek. Yang! Yam so piam golo nando pok go, duduing piam go koybutasemu so, nemot gemang mo lemoy. 20 Kua kay! Woy Dem, imot go Sesuoy Iram. Nemot, nando lo mo senong go, kukunan go piam sik sogo taplet-dak go nemot gemang. No, nando blong duoyap-a, tandali taybat ngga lo dok go, mea waluk seni. 21 Esang! Seni eygo walitap kua senong go-a suey. No, walidemu teguop nguok go, tandali tenguo go-a, naklay mo waluk seni. 22 Nemotnang lo pupluok go ngga, nebut ngge ey mo kerlam gabe,
“Uduo logo so, kusui iwot go, tandali mea dam.”
Nggano,
“Nebo-a, bu mo ulu go, iwot go,
tandali nanbu mea klong go tang.” (Amsal 26:11)