3
Iram Yesus ba no sang go wali
Kolose 3:1-4
1 Yang! Wali Yakena ba no, Ki Wali Iram go ta semlea idi no Iram Yesus gabe suing. Blong Dem ey klay gono, Ki Wali Iram lo tandali motnang nglong go, Ki Wali Yakena ba sogo taitiblong-a kangok so uwet go, motnang logo se mlak! 2 Ngga ey, blo seguong sono nemudi so tui so-tui go, motnang go kunala-duduing naklay se koklong, kukunan sono teguop ey kua duing! 3 Se senong! Kukunan nogo motnang mo kebong gabe. Blong Dem ba sogo Ki Wali Iram ba sono sang go, suey so kok go motnang go wali mo gigit gabe. 4 Iram Yesus tang go ngga, motnang go wali min gemang. Blong ba lo pung go ku no, Nemot go blong ba no motnang mea ip-lak.
Wali buin ey wali inim eygo
Kolose 3:5-17
5 Blong Dem ey klay goso susuing go, motnang logo saysuk go kunalatasam piam go, kay so but go se kebong. Kunala ngge kua duing: kamea; tabat piam go; duduing piam go. Nggano, taut-a mata so yaluim genang kua uwet! Se senong: taut tap ngga, didemu no ta kokong go tap! 6 Piam go tap ngga kalik goso pupluok go, walidemu no suey so kua kengduk go, nemotnang nogo Ki Wali Iram dabui sadui ey. 7 Banim nogo, wali buin ba so susuing go nogo, tasam-tasam piam ngga kalik go, motnang tang golo mo pupluok dali. 8 No, nggeasui go, motnang go tasam piam go naklay ngga sono se betep! Dabui piam; plesagui; nebut piam go; kemla kon eygo; 9 way-way sogo, wamoymlue kua semu. Seni so, motnang go wali buin nemot go tasam naklay ey, motnang logo mo itak gemang. 10 Yang! Motnang ngge, sikabung inim go gabe. Kuno-woyno Ki Wali Iram, mot so klik go ey, inim goso motnang gabe kekerlam, e... Ki Wali Iram nogo duduing seni eygo, motnang ba no mea pung. 11 Yang! Iram Yesus seguong nogo-a don ey susuing go, blong duoyap naklay ba sogo Nemot-a gemang. Ngga ey, blong duoyap nogo saula-saula go sang-sang naklay mo suep. ‘Yahudi saula suk tong go, Yunani saula suk kua tong go’, ‘amble-tapui’, ‘koybutasemu-wengkabui’, ngga kalik go tandali yakua pu. Nemotnang naklay Iram Yesus go uduonebo.
12 Motnang ngge Ki Wali Iram go blung. Motnang nogo Nemot go klum kangok. Nggano, dui ey Nemot nogo so motnang mo kuoy. Ngga tang sogo so, sikabung meno nogo: ta suey; dabui suey; suot-suot so; dabui klum; gigling-a se tetaling! 13 Kunala piam way-way so blong duoyap lo tetra go, dabui keda so kua piam! Nggano, meno duo eygo way-way sogo piam, keda so kay go se betep! Yang, Motnang go kuklue, dabui lo Ki Wali Iram mo kay go kalik, mot tang so way-way sogo ta se luluik. Ngga ey, piam naklay kay go se itak! 14 No, seni-seni! Way-way klum-a senang so se tetaling! Klum logo tang so, ngengam teguop so mea dok. Nggano, klaya goso motnang mea lemoy. 15 Dabui ba nogo ngengam-yakay Iram Yesus lo mo iti. Ngga ey, saysuk klaya go ba no motnang mo usi gemang. Yang, motnang go dabui-a taitisuey yakay ey, senang so se tetra! 16 Blong Dem sogo Walinebut tutup go ngga, motnang go dabui ba no kin-kedong so se lemoy! Nggano, senongkalong ey golo, way-way so motnang tang go se ngunguok, way-way so mang se kiking! Ngga ey, Ki Wali Iram nogo iway iti genang sogo dabui ba sik so, Walidemi ey, u sam ey go-a se kukluo! 17 Se duing! Woy Dem Yesus go sui logo so motnang go takebali, nebutpen naklay se pupluok! Ngga ey Aya, Ki Wali Iram nogo taitisuey, Blong Dem ba no motnang lo i-iti genang.
Yap tenglam nogo nebut mang
Kolose 3:18-4:1
18 Mianang, sedue go senun! Woy Dem nogo yakay ba lo koklong go nogo, motnang go sedue nogo tupduk so se! 19 Ayanang, kabung go kenin. Mot go kabung nogo klum motnang logo se tetaling! Dedon-dedon so, kua bebat!
20 Duoyap, aya-mia nogo tupduk so se! Ngga tang sogo so, Ki Wali Iram go dabui nogo ey motnang yakay genang. 21 Ayanang! Motnang logo, mot go duo nogo dabui sadui kua taling! Nemotnang dabui kuo pung go, don kua go, lasom waluk genaning.
22 Koybutasemu, wengkabui lo taling go naklay nogo tup go se keng! Nemot damoy seguong so mot go sui blo sono sikabung lo pu genang-a, kua. Kebali dabui lo suey so sesemu go, mot go Woy Dem no suali goso se kebali! 23 Sogo-sogo kebali naklay sesemu go, dabui klaya iti go se semu! Yang, ngga sikabung nogo so kua sesemu, no, Woy Dem nogo so semu go kebali kalik se! 24 Motnang se duing: nemot go blung nogo tete so dali ta go, yangga wali inim, Woy Dem lo mea iti. Seni so, motnang tupduk-keng genang Wengkabui seni sogo ngga, Iram Yesus tang go gemang. 25 No, nando lo kuklue-a sesemu go, nemot tang so kuklue ngganemot mea lek. Seni so, kisebui sikabung naklay nogo nemudi so Ki Wali Iram lo mea taling.