Sura ni Yohanes to Karongkanina
Tabe popamulana
1
1 Lako ri topangkeni todea nu Allatala. Sura ei nitulisi pade nipakatuka-ku tina to nipelisi nu Allatala pade ri ana-ana-na to mpuu-mpuu nipotowe-ku. Tado kawule yaku to nampotowe komi, agiana sumawee tou to nanguncanimo Allatala to nakono ee nampotowe mbii komi. 2 Apaa Allatala to nakono ee natida ri rara-ta, pade kana mamporoasi oa-ta duuna masae-sae. 3 Towe rara, asi rara pade kasanaa lako ri Allatala, pade lako si Yesus Kristus, Ana nu Allatala kana mamporoasi-ta ri rara nu kakonoa pade towe.Katida-mo dodo ri rara pepatuduki ni Kristus
4 Yaku nadonu mpuu apaa nirata-kumo basangkia dua ana nu tina to natuwu nantutu pepatuduki to nakono, ewa to niparentaka-tamo nu Allatala, Tuama, si kita. 5 Eemo sabana yaku merapi mpuu-mpuu si komi tina, bona ikita sumawee mombepotowe. Parenta ei tado parenta nabou to nitulisi-ku si komi. Parenta ei nariamo si kita lako ri paramulana. 6 Mepotowe batuana natuwu mantutu parenta-parenta nu Allatala. Pade ei-mo parenta-Na ee: Matuwu mombepotowe komi ewa to nironge-mi lako paramulana. 7 Apaa nadeamo topebagiu neonga ri dunia ei. Isira tado nampangaku bakote i Yesus Kristus nameimo ri dunia ei najadi sadua manusia. Tou ewa ee-mo topebagiu pade bali ni Kristus. 8 Ee-mo sabana, maingada komi bona nemo maronto kaparisayaa-mi si Kristus, to nipesimbukui-ka si komi. Agiana pesimbukuimo bona mi-rata sumawee tombo to nipasadiaka komi nu Allatala. 9 Tou to tado matida dodo ri rara pepatuduki ni Kristus pade mangani lako ri pepatuduki ni Kristus, tou ee tado nosaongu rara ante Allatala. Tou to natida dodo ri rara pepatuduki ni Kristus, nitarima-namo Allatala Tuama-ta pade Ana-Na. 10 Ande maria tou mamei mangkeni pepatuduki to tado ewa to nipepatudukii ni Kristus si komi, nemo mitarima-ya ri rara ncou-mi, pade nemo mitabe-ya. 11 Apaa ande mitabe-ya, natantumo ikomi mbii nantutu tou ee nowia inggu nadaa.
Kaopuana
12 Nadea mpuu nuanu to madota ku'ulikaka komi, agiana nipekiri-ku nabelo loupa ande tado kutulisi ri sura. Yaku nancarumaka mamala-kudapa mamei mampotomuka komi, pade mampololitaka komi, bona masana mpuu rara-ta. 13 Naria mbii tabe si komi lako ri ana-ana nu sarara-mi bangkele to nipelisi nu Allatala.