I Yesus nampopesuwu koro-Na ri ana-ana guru-Na ri sowea nu rano Tiberias
21:1-14
21
1 Naopu ee, nipopesuwu mbiimo ni Yesus koro-Na ri ana-ana guru-Na ri sowea nu rano Tiberias. Iwei kajadiana: 2 Sauatu eo i Simon Petrus, i Tomas to nisanga mbii Toporapi, i Natanael lako ri Kana ngamba Galilea, ana-ana ni Zebedeus, pade rodua ana guru ni Yesus ntanina, ranca-ra notobu. 3 Nangulimo i Simon Petrus si sira: “Yaku madota malou mosoko bou.” Nesono-ra: “Metutu-ka.” Nangkajadika nalou-ramo nencawi duanga. Agiana sambengitua ee tado-namo nuapa nisoko-ra. 4 Nemberepa eo, nokongkoremo i Yesus ri sowea, agiana tado nincani-ra bakote i Yesus ee. 5 Nangulimo i Yesus si sira: “Ngana-ngana, nariada bou-mi?” Nesono-ra: “Tado naria.” 6 Nangulimo i Yesus si sira: “Wentemo jala-mi mbira ri ngkana nu duanga, mariada ngoni bou mi-rata.” Pade niwente-ramo jala-ra, agiana tado-mo nipakule-ra nosore mpanculi apaa nadea mpuu bou ri rarana. 7 Pade nangulimo ana guru to nipotowe ni Yesus si Petrus: “Edou i Pue.” Nirongepa ni Simon Petrus bakote i Pue-da ee, nipasua-namo powaru-na, apaa bula-na nolendo, pade nekawantu ri rara ue. 8 Ana-ana guru ntanina noduanga nalou ri lorena, nodisi lako jala to naponu ante bou ee. Tado nakawao-ra lako ri lorena, rapa-rapana saatu mete ngkola kawaona. 9 Narata-rapa pura ri lorena, nikalio-ra nariamo riri nu apu natuwu isee pade ri wongko nu riri apu ee naria sambaa bou bo roti nitunu. 10 Nangulimo i Yesus si sira: “Kenimo tumei basangkia mbaa bou to lako nisoko-mi etu.” 11 Nencawimo i Simon Petrus ri rara duanga, pade nodisi jala ri lorena. Jala ee naponu ante bou singka nabete, bou ee naria saatu alima mpulu tolu mbaa kadeana. Noudamo iwee kadea bou, tado nasempa jala ee. 12 Nangulimo i Yesus si sira: “Kamei-tamo mangkondi.” Tado namo saduaa ana-ana guru-Na ee nabia nepekutana: “Yemada-Ko ei?” Apaa nincani-rada bakote Ia i Pue. 13 Naopu ee nijungkuki-ramo ni Yesus pade nangala roti ee pade nobagika-ra. Iwee mbii nipowia-Na ante bou ee. 14 Ee-mo katolungkanina i Yesus nampopesuwu koro-Na ri ana-ana guru-Na sinungka-Na natuwu mpanculi lako ri kamatea.Ewumo bimba-bimba-Ku
21:15-19
15 Naopu-rapa nangkondi, nipekutanamo ni Yesus i Simon Petrus: “Simon ana ni Yohanes, neliupa pampotowe-mu Ku lako ri pampotowe-ra Ku ei?” Nesono i Petrus: “Nakono Pue, nincani Mu-da bakote yaku nampotowe-Ko Pue.” Nanguli i Yesus si-ya: “Ewumo bimba-bimba-Ku.” 16 Nipekutana mbii ya-mo ni Yesus karongkanina: “Simon ana ni Yohanes, nipotowe-mu Ku-da?” Nesono i Petrus: “Nakono Pue, nincani Mu-da bakote yaku nampotowe-Ko.” Nanguli i Yesus si-ya: “Ewumo bimba-bimba-Ku.” 17 Nipekutana mbii ya-mo ni Yesus katolungkanina: “Simon ana ni Yohanes, nipotowe-mu Ku-da?” Nentuumo rara ni Petrus apaa tolungkanimo i Yesus nampekutana-ya. Jadi, nesono mbiimo i Petrus: “Pue, Iko nanguncani ngila ngayana. Nincani Mu-da nipotowe-ku Ko Pue.” Nanguli i Yesus si-ya: “Ewumo bimba-bimba-Ku. 18 Kakono-konona Ku'ulikaka-ko, tempo-mu nanguradapa, iko dodo to mopou peko-mu, pade malou riumba-riumba to nipodota nu rara-mu. Agiana ande matuadamo-ko ngoni, iko kana moulu pale-mu ri tou ntani, pade tou ntani kana motaka-ko, pade mangkeni-ko ri pearia to tado nipodota-mu.” 19 Nuanu ee niuli-Na bona mopanotosi beiwa dala ngkamate ni Petrus ngoni bona mampemabose Allatala. Naopu ee nangulimo i Yesus si Petrus: “Tutu-Kumo.”
Ana guru to nipotowe ni Yesus
21:20-23
20 Naopu ee nipeilimo ni Petrus bengo-na, nikalio-na ana guru to nipotowe ni Yesus nantutu-ra. Ia-mo ana guru to noncunda ri siawe ni Yesus tempo-ra nangkondi pade nampekutana-Ya: “Pue, yema to kana mampobalu-Ko?” 21 Pangkalio ni Petrus ana guru ee, nipekutana-namo i Yesus: “Pue, nuapa to kana majadi ante ia ei?” 22 Nesono i Yesus: “Ande madota-Ku, bona ia kana matuwu dodo duuna marata mpanculi-Ku, tado urusia-mu ee, agiana iko tutu-Kumo.” 23 Nopamula lako isee nowoleamo kareba riolo nu ana-ana guru ni Yesus, bakote ana guru ee tado mamate. Bo ee tado niuli ni Yesus bakote ana guru ee tado mamate, Ia aga nanguli: “Ande madota-Ku, bona ia kana matuwu dodo duuna marata mpanculi-Ku, tado urusia-mu ee.”
Lolita kaopuana
21:24-25
24 Ana guru ee-mo to nambei posabiti nancambelai kajadia-kajadia ei, pade ia mbiimo to notulisi. Pade nincani-ta bakote nuanu niuli-na ee nakono. 25 Nadeadapa nuanu ntanina mbii to nipowia ni Yesus, agiana ande sumaweena ee ratulisi saongu-saongu, tado magana dunia ei rapambolii sumawee buku to kana ratulisi ee.