As Yerusalem Wendogne Lag Taoa
21
1 Samen imnonge, El puka urobag solomne nubunge pukamonge poneko whingag anekoa imap so'oap kom taongom seoba, mag nubu uro longorop mag laut ka'eseptangom seo. Undo uro yabio ane sembe, wene imnongena im wendogneap, so'o wendogneap imno. 2 As soro kalurop as wendogne Allah Eldamneri lelnerop as eneko imnonge nenekona, as Yerusalem wendog as Allah imag ua urobag agha kulukulalamoa imno. As soro kalurop as walinge nene imnongena, kelabo agha, “Ela'ange wendogneap haiptarukang,” aro wali-walia towalengeropba, holno arop saog wamo as soro kalurop as kulukul alamoa imno. 3 Undo unuamoba, ka'elamnoag agha nimi nubunge saelba uhiropne puka urobag agha yubu nubu uro lelamoba ka'ebanongena,“Wene Allahri ua urobag anekona nimiap nhon wamnebag wamla.
Sinna Allah Elmabo wamikpa, Allah El sinap nikag wamleri, Sikini Allahri sin pai uhiropne wamlul.
4 Eldi sindi engena ninge sembe engelamikne eldi hail mag lupsilul.
Nimiap lebe arobaap tepna nen wamlul kom.
Wana ikin senenneap, wana ngik ngokha engenneap, seklenne babe nen wamlul kom.
Nia mangkina samenag uro yabiropne ya'ag orog tangto kom tal,”
alamoa ka'ebano.
5 Wene alamoba, El nubunge nia mangkina saelba uhiropne puka urobag pukamonge ponekori yubu lelamori, “Wene nia mangkina Nari wendog nenelamna!” aro wene seo. Nanag babe tipto yubu lelamori, “Ni yubu lelamnange tane sikne agha lelamna. Sik uro yabilul sembanep ane sembe, ni lelamnange nene mome toplulam,” aro na ambatneo.
6 Wene seori yubu lelamori, “Ni uro yabilulne sembe komopto ambatken. ‘Nanagha Alphaa wamna,’ alamnange, yum-yum samenag Na mori nia mangkina alniro sumbahiropne wamna. ‘Nanagha Omegab wamna,’ alamnange, Na mori nia mangkina komobitnepne wamna. Nimi etneri, ‘Mag yori mag tehene,’ senerop tanena, Na mori nimi eneko mag tebatsinun. Mag tebatsinunne neneko, kamag nenerop mag lu la'inilamlange nenekoag agha kamna kapto koma mo tebatsinun. 7 Nimi etneri malinge luknuro khapto ulamik tanena lemnange ni aneko wanaag agha elag tatneri, Na el Ili paia uropne taneba, el neneko Na Name talul. 8 Aghana ora nimi ik phendep sum tebaukang.
Sin log lelem aghabog senerop nimiap,
Na Allah wailag ibatnerop nimiap,
malinge aghabog wanaag loloro seneragtop nimiap,
nimi ohirop nimiap,
elkel ela'ange toptan koma nikag maptangtop nimiap,
mili lerop nimiap,
mema pharop nimiap,
nia ni orolena lerop nimiap,
sin taneko song mali auk singina ibya ua urobag mag longorop wamloa saog auk nubungeag toboghahinun. Nenena, ik phendep sum nimi tepnange tebaukang,” aro wene alamoa ka'ebano.
9 Wene seoba ka'ebanoba, Allah arukna malaikat nhon nanag yaongena, samenag kau saekpare lomag nimi nong opsineba, saekpare komoptobagne Allah arukna malaikat saekpare tanekori saelbamongne agha, malaikat nhon nanag yao. Nanag yaori, yubu lelamori, “Nari an sembe Pham Domba Meri Eldi tomnep kel eneko whingag pabakineba, kembalulam aro yae,” alamoa ka'ebano.
10 Wene alamoag agha Allah Yame Walinge nanag taneoba, Allah arukna malaikat enekori na poa lemneori, yim we sirikne nhonag payingkineo. Eldi payingkineori, “As Yerusalem Allahri as El Moringe eneko tiplengkalulam,” aro nanag ambatneo. As Yerusalemna, Allah imag ua urobag agha kulukul alamoa imno. 11 Allah Eldamne imang wareropne neneko as enekoag wamoba, as nenekoag wareropne nenena, kamna alikinag torop kirik sildi haing omom uropne saog uro ulamoa imno. Kirik sildi haing omom uropne saog uro ulamoa imnonge nenena, kirik uwongne wali sirikne mag whi urop mag saog uro ulamoa imno. 12 As eneko leka toro poa kanektobana, alikin sirik wamori, nubu wamoba, ina siramna aobare wamo. Ina siram aobare wamonge pa'aropne abenekoag, Allah arukna malaikat nhondi nhon, nhondi nhon ina siram aobare taneko yae ubu piamong. Ina siram aobare abenekoag nhonag nhon, nhonag nhon nimi sisa mome topto piamongnena, Israel elmabo nimi sisa sunuro aobare nang abeneko si mome toroba imno. 13 As mog so'o ingkis aneko sunuro ina siram wilindi-wilindi pa'arop. Heng walelingkirobag sip ina siram wilindi pa'arop, heng purukul pirobag sip ina siram wilindi pa'arop, ople sip ina siram wilindi pa'arop, tabo sip ina siram wilindi pa'arop. 14 As soro kalurop as nene kirik leka tobekti sobaeknena, yangan kirik aobareag agha sobaek. Yangan kirik tanekoag mome toropnena Pham Domba Me ponekori nimi aobare wepsiogti pogsiog nang enekori si aobare mome tohirop.
15 Allah arukna malaikat nanap yubu lelamonge nenekori kame tunguna saelbamongena emas agha sunuroba saelbamo. Kame tunguna saelbamonge nenena, as eneko porog o'onne, ina siram pa'aroba taneko porog o'onne, kirik leka tolingkiroba taneko o'onne kame tunguna emas agha sunuroba saelbamo. 16 As enekona ingkisna tomabare urop. Ingkis aneko sunuro tara-tara babe, tai sip babe, tau sip babe, nikneag karepsaelbom agha sobaek. Ane sembe Allah arukna anekori eldi o'on kame tunguna eneko agha porog o'obao. Porog o'obao aneko we uro sobaekana, yan ingiro a'ilina saog tanena teng-tengne agha, 2.400 kilometer wamo. Ingkis ni aneko 2.400 kilometerag sobaekti, tai solingkiekne babe 2.400 kilometerag tai solingkiek. 17 Allah arukna malaikat anekori kirik leka topto waelbaekti, sobaekne porog o'obaoana, moromna teng phendeap epto aobareap (66 meter) sobaek. Allah arukna malaikat anekori porog o'obaongena, nimiri porog o'oro soroba sunsunum uro porog o'obao. 18 As kaluro sorop as nene kirik leka tobekti sopso waelbaekana, kirikna uwongap mirinap yogto-yogto piarop kirik alam-alam arop kirik agha leka toro poa as kanektoba sobaek. As kaluro sorop as sobaekana leng-leng aroba kamna alikinag uro toroba emas mori sobaekpa, haing omom upsererop. Emas neneap orange ma'aban koma urop emas wamoba, kembiag agha mag whi urop mag saog uro kemerop. 19 As kaluro sorop as leka kanero sobaeka nene kamna alikinag torop kirik yangan kirik pibekti sobaeknena, leng-leng arop uwong-uwong arop kirikna yogto-yogto sobaek.
Yangan kirik seleknena, uwongap mirinap yogto-yogto urop kirik alam-alam arop kirik agha sobaek.
Yangan kirik phendepnena, halubil saog kirik agha sobaek.
Yangan kirik wilindipne sobaeknena, halubil saogne ma'aro erenne ma'arop kirik agha sobaek.
Yangan kirik tomne sobaeknena, eren saog urop kirik agha sobaek.
20 Yangan kirik lamne sobaeknena, kirik uwongneap, piringeap, solomneap yogto-yogto uropne agha sobaek.
Yangan kirik no'opnena, ip pin lararopne saogne agha sobaek.
Yangan kirik saeknena, kamongkai saogne agha sobaek.
Yangan kirik linnena, yungka saogne agha sobaek.
Yangan kirik supnangena, sua ulne uwong uropne agha sobaek.
Yangan kirik sa'onge sobaeknena, erenne agha kiki agha leptopne agha sobaek.
Yangan kirik ko'olomne sobaeknena, im piri saog pogna uwong yogtop-yogtopne agha sobaek.
Yangan kirik aonge sobaeknena, pona kirik agha sobaek.
21 Ina siram aobare aneko sik wana nubunge kamna alikinag torop saogne sina mutiara aobarenge agha sopso yabiek. Ina siram aobare aneko a'ero-a'ero sik wana saog uropne mutiara neneko nhonog agha a'ero-a'ero sopso yabiekti, sik wana mutiara a'obare agha sopso yabiek. Ina siram wa'ina yandi pirop ina as kaluro sorop as nubunge nenekoag tobekana, leng-leng aroba emas kamna alikinag uro torobari tobeknena, nen orabaap ma'aban koma mo leng-leng aroba kamna alikinag toroba emas mo agha yandi pirop ina sobaek. Ma'aban koma urop emas agha tobekpa, haingdi kemelamnagna whi urop mag agha alam-alam agha upsererop.
22 As enekoag Nari kembanonge Allahri Mem Ae imno kom. Allah Nia mangkina Saelbamlange Mikip Phelektopne ponekoap Pham Domba Me ponekoap sindamnang as enekoag wamdangdi, Allahri Mem Ae sindamnang agha lunuro wamdangpa, mem ae imno kom. 23 As enekoag Allah Eldamne Imangap, Pham Domba Meri tibin warerobaap sin abenekori as enekoag tibin nenehirop ane sembe, nimi nhondi babe, “Heng tingiro warebahori, wal tingiro warebaho,” sembanep kom. 24 Nimi ni mog so'oag urop nimi tibin ina eneko toman palamikpa, mog so'oag nimi sembe yubu sia lerop nang sindi saeagha wali-waliaba tup neneptangtoba poa as kaluro sorop as enekoag poa wa'alamukang. 25 Allah Eldamne Imangap, Pham Domba Meri tibin warerobaapti as enekoag warelamdikti, as enekoag ae inipnange wamnep kom. Inipnange wamnep kom ane sembe, as enekoag leka kanero sorop ina siram nhon babe serekan koma, ina sop-sop kuptoba wamle paghabog wamlul. 26 Mog so'oag nimiri tup neneptangtobaap nimi nubunge kipto tatsirobaap as enekoag poa wa'alamukang. 27 Ot walinge aghabog Allahri senenne sunsunum uropne as kaluro sorop as nenekoag poa wa'inep. Nimi etneri sik urop komneap, Allahri mali senenneap ul pirop tanena, nimi taneko as enekoag wa'inep kom. Ot as enekoag wa'inep nimina, Pham Domba Me ponekori sin sembe, “Ya'ag kamag wamukang,” aro nimi si mome toro pairop mome wa'amogtoba nenekoag sindi si mome tobog taneogna, undop nimi agha wa'inep.