22
1-2 Allah arukna malaikat anekori, “Mag kamag nenehirop mag yabiropne neneko kembalulam,” aro ambatneo. Nimiri teropba magti ya'ag kamag nenehirop mag whi uro yabirop mag enekona, mag yame-yame uropba imang-imang arop mag agha imno. Mag whi uro yabirop mag, nimi ya'ag kamag nenehirop mag lu nenekona, Allahap Pham Domba Meap abenekori nikag Saelba Uhiropne puka urobag agha lanalamlaba, as eneko anabiag nimi yan yabirop ina nubunge nusam toman yabalamla. Yabirop mag eneko abolag tara-tarana, kal kamag nenehirop kal pongolamnaba pongoroba imno. Mag tara-tara pongorop kal enekona, wana mauroba hengkun nhonag agha li aobare maurop. Wana maurop nena wal nhonag agha li ik nhon-nhon maurop. Kal enekori ma'alna nimi mog so'o tala-tala urop nimi wali nenehirop. 3 As eneko lomag uropnena, Allahri waro yo'oro kutkuruka nenenne nhon babe wamlul kom. Allahap Pham Domba Meap abenekori nikag Saelba Uhiropne puka urobag as enekoag wamleba, Eldi arukna Elmabo tanekori El omekto paliag nenero Eldi awe tolamukang. 4 Eldamne whing ililamikpa, Eldi sina “Naringe” aro nimi tanekori haioghag mome toro paibatsilul. 5 Nuni Allahri nu Saelba Uhiropne ponekori wareamsilul ane sembe, inibinne wamnep kom. Eldamneri wareamsilul ane sembe nimiri, “Whea tibin warenne wamso,” sembanep komdi, “Heng wamso,” senenne babe wamnep kom. Eldi mikipnena, Elmabori saeag pipleba, yubu sia leropnang saog uro saelbamsiik paghabog ya'ag saelbamsukang.Yesus yanepne sembe pibogha
6 Allah arukna malaikat anekori nanag yubu lelamori, “Yubu ka'ebalamne nene ot sikne agha wamla ane sembe, sik uro yabilul sembanep. Nuni Allah nia mangkina saelba uhiropne ponekori samenag Eldamne Yame walingeag agha Allah silimu yubu tiptop nangag ambarelamsiog saog uro, wene babe Eldi arukna malaikat a'unag pognel. Eldi pognelne, ‘Ko'o we uro wamna komag uro yabinepne sembe ambatsilul,’ aro Eldi arukna Elmabo mog so'oag wamangneag na Allah arukna malaikat pognel,” aro malaikat nenekori ambatneo.
7 Wene aro ambatneoba, Yesusti lebogha nene ka'eamnoba, “Ka'eamsut! Ko'o we uro wamna komag Na men phea yanun. Nari silimu yubu tiptop yubu mome toro pairoba wa'amogtopne neneag wamlangena, nimi etneri ka'ero saelbamleri, sunsunum uro ulpalamle tanena, nimi eneko wana awi uro wamlul,” seog.
8 Na, Yohanesti ni ane aori ka'ebanori, ni ane haingdi imno. Nari ni ane ka'ebanori imnori, nari Allah arukna malaikatti nanag ambatneonge neneko whingag nari yabu sanukto u amupto malingkina, “El omekto kipnun,” aro ulamno. 9 “Omekto kipnun,” aro ulamno aghana, eldi nanag lelamori, “Undo unuaheng kom! Allah agha kipto omeklamlulam! Na babe an saog uro arukna wamna. Anap, an kabo Allahri silimu yubu tiplamek nangap, nimi ni mome eneag mome toro paliropne saelba nelepto ulpirop nimiap saog uro, a'un Allah arukna wamlomne saog uro na babe wamna. Allah agha kipto omeklamlulam!” seo.
10 Wene seori nen lelamori, “Ni amik uro yabinepne sembe iplamne nene ko'o we uro wamna komag uro yabilul. Ane sembe, amik uro yabinepne sembe mome tolamlamne nene wangaro tognoamseng kom. 11 ‘Sikne urop kom nimiri sik urop komne tipto ulamik,’ aro liloamsululom. Allahri senenne seneragna koma malinge ulamik tanena liloamsumunba, sindi malinge tipto ulamukang. Aghana, ‘Allahri seneropne uanun,’ senerop nimiri tipto Allahri seneropne sunsunum uro ulamukang. Nimi etneri, ‘Na Allah sembe mo kopto wamna,’ senerop nimi wamik tanena, ‘Allah sembe mo kopto wamna,’ aro Allahri senenne sunsunum uro tipto ulamukang,” aro wene seo.
12 Yesusti lebonge ka'eamnori, tipto palilamna. Yesusti ambarelamsiongena:
“Ka'eamsut! Ko'o we uro wamna komag Na men phea yanun. Nari saeag nimi ni sembe a'ero-a'ero tatsinepne wamla. ‘Mog so'oag nimi niri ulamangne sunsunum uro a'ero-a'ero tatsinun,’ aro yanun. 13 ‘Nanagha Alphaa wamna,’ alamnange, yum-yum samenag Na mori nia mangkina alniro sumbahinge wamna. ‘Nanagha Omegab wamna,’ alamnange, Na mori nia mangkina komobitnepne wamna. Nanagha nia mangkina wamna komag samen babe wamsiba, nia mangkina kom talea babe, ya'ag wamnun,” seo.
14 Nimi etneri Yesusag sip taleri, ag wangaro siliplengka urop ag a'alelamloa saog ulamle tanena, nimi eneko awi uro wamlul.c Nimi enekoag Yesusti ambatsileri, “Wali, Nari as kaluro sorop as enekoag nubu uro pa'arop ina siram toman agha wa'iapmundi, nimiri kal wana teropba, nimi ya'ag kamag nenehirop kal wana eneko telamlulom,” aro ambatsilul. 15 Aghana as kaluro sorop as paiag sipna,
mili lerop nimiap,
elkel ela'ange toptan koma salik-malik uro maptangtop nimiap,
nimi ya'ag ohirop nimiap,
mema pharop nimiap,
nimiag orolena lena yubuag agha babe, saeag agha babe orolenange lelpiro ulpiro urop nimiap,
as kaluro sorop as walinge neneko paiag sip agha wamukang. Sinna nimiri uaheng komne, kam yongeri ua urop saog ulamang nimi ni as walinge eneko lomag wamnep komdi, paiag sip agha wamukang.
16 Yesusti nen lelamori, “Na Yesusti Allah arukna malaikat a'unag pognangena, ‘Malaikat enekori Nari yubu nene tipto ambatsileri, Na Yesusag seneragto winiltalamang nimi el nembahilul,’ aro malaikat aneko pogna. Na Yesus, Allahri samenag salag pibogne sunsunum uro Daudti nimi yana mangarobag agha mangaro yabihinge wamna. Nanagha imbrea heng walilingkirobag sip tibin sirik wareropne poneko Na wamna,” aro Yesusti wene seog.
17 Allah Yame Walinge nenekoap, Pham Domba Meri kelabo toro anep kelenekoap abenekori lelamdangnena, “Yae,” aro yoplamsirang. Nimi etneri ka'elamla tanena, nimi enekori babe tipto nimi yoplamsileri, “Yae,” aro yoplamsilul. Nimi etne mag yo wamleri, kamag nenehirop mag neneko sembe, “Mag tehene,” sembale tanena, el neneko yahori, kamag nenehirop mag eneko sembe kamna tomna koma mo telamlul.
Yohanes whingag lag taogha ibogne sembe ambatsirop yubu komopto pibogha
18-19 Na Yohanesti amik uro yabinepne sembe haingdi imnonge mome eneag mome toro palilamna. Nimi etneri nari yubu nene ka'elamik tanena, wenero ambarelamsinnena ane. Nimi etneri amik uro yabinepne sembe mome toro piamnange neneap ma'aro piple tanena, mome neneag tibin nenero piamnange sunsunum uro Allahri nimi nong obahinepne nimi nenekoag pelengkalul. Nimi etneri mome toro piamnange neneag agha ologha babe kom nembale tanena, mome neneag nimiri walia tomnepne sembe tibin nenero piamnange Allahri nimi enekoag walia tatnepne kom nembalul. Mome neneag piamnangena, Yesusti ambatsileri, “Wali, Na mori as kaluro sorop as walinge enekoag wa'iapmundi, kal wanari nimi kamag nenehirop kal wana eneko telamlulom,” aro ambatsilulne sembe mome toro paimna. Aghana nimi etneri mome toro piamnange neneag agha ologha babe kom nembale tanena, nimi enekoag “Wa'imendi, tululam,” aro ambatnepne sembe kom selul.
20 Yubu ni ane ambatnelne poneko Eldamneri ambarelamsilnena, “Sik uro lelamna. Ko'o we uro wamna komag Na men phea yanun,” seo.
Nene Sikne lelamla. Nu Saelbamsilamne Yesus, An yalulam!
21 Yesus nu Saelbamsilne ponekoag molbarelamsinne, “Andi wana walingeag agha Allah Elmaboag walia ulamsilulam,” aro molbarelamsin.
Sikne agha lemna. Abenda.