Phia sikini nubunge neneko hengkun taibuka taubuka teng-tengne (1.000) haing kaupto uroba
20
1 Neneko uro yabioba, kemelamnoag agha Allah arukna malaikat nhon imag agha kulukulalamoa imno. Eldi saeag saelbamoa imnoana, selenga nimiri we sumbanep kom selenga ina siram kupto sereknaap, nimi kaupsin haing nubu sirikneap saelbamoa imno. 2-3 Ina sereknaap, nimi kaupsin haingap saelbamori, paghae sel-sel yum-yum samenag wamog phae eneko salelamoa imno. Phae nenekona phia yonge sikini nubunge neneko, si Satanas neneko Allah arukna malaikat ponekori haing sae kauplamori, phia ua urobag selenga lomag pelengero toboghao. Pelengero toboghaori, selenga ina siram kaubiagha mikip uro serekaori, kwerekanep kom kekneba ina siram tiptobag pibo, andarina hengkun taibuka taubuka teng-tengne (1.000) aneko anam pin komag, paghae sel-sel Satanas nenekori mog so'oag as tala-tala urop nimi haing kunuro orolena ambatsilul kom. Ot hengkun taibuka taubuka teng-tengne (1.000) aneko uro yabile taneogna, Allahri, “Paghae sel-sel Satanas neneko sae lopsut,” selul.4 Neneko uro yabioba, kemelamnoag agha nimi nubu nang saelba uhiropnang puka uroba ipsino. Sin saelba uhiropnang puka urobag pukamong nimi tanekori samenag Allah san tiliptop Lebe Aroba neneko omeklamong komdi, Lebe Aroba nenekoringe tangtop kekneba sikin haioghag babe, saeag babe tobong kom. Sin saelba uhiropnang puka urobag pukamong nimi tanekori samenag Allahri Yubu sik senelamongdi, Yesusag “Sikne” aro seneragto ambarelamsiongne sembe yo nimiri sin usog yae waksiong. Sin usog yae waksiongbog, wene kamag taongdi, sin kamag tangka sindi yame taneko saelba uhiropnang puka urobag pukamongba, Allahri sindi saeag mikipne pipsio. Mikipne pipsioba, Allahri wepto poghogne Yesus Kristus nhonap pulamikti, hengkun taibuka taubuka teng-tengne (1.000) aneko uro yabalamle abeneko pere, Kristus nikag tam lelekto kemero kareplamikti, mog so'o saelbamsukang. 5 Nene agha yum-yum ik selek sum nimi teptop nimi kamag nenehiropne imno. Amik ik phendep sum babe, nimi teptopne orange kamag taukang, aghana hengkun taibuka taubuka teng-tengne (1.000) aneko uro yabile taneogna, nimi teptopne orange kamag taukang. 6 Sin yum-yum ik selek sum kamag nembahio nimi nene, sin yeng uro wamukang. Sin agha Allah Eldamneringe taong. Samenag nimi nongag tebanep aghana, ik selek sumeneko sin kamag nembahile tanena, Allahri tam ikinne pelengerop sumenko ik phendep sum tebukang kom. Sinna ik phendep sum teban koma, memnang wamloa saog wamikti, Allahap Eldi weptopne Kristusap sembe wali-walia paliro yepsirop nimi taukang. Paliro yepsirop nimi taikpa, hengkun taibuka taubuka teng-tengne (1.000) aneko uro yabalamle abeneko pere, Allahri weptopne Kristusap ma'aptangka sindi Elap nhon yubu sia lero mog so'o saelbamsukang.
“Phia sikini nubunge Satanas nenekoag tam paliro luknulamoa imno,” aro ambatsiogha
7 Hengkun taibuka taubuka teng-tengne (1.000) aneko kom taleba, phia sikini nubunge Satanas neneko haing sae kaupto palirobag anekoa sae lopto pilul. 8 Sae lopleba, mog so'o ingkisag ni tala-tala asag pileri, “Nanag sip taukang,” aro orolenange lelamlul. Phia sikini nubunge nenekori sin mal tabanepne sembe poloro wimbahilul nimi taneko sembe, likiptop yubuag agha, “Gogap Magogap,” aro si engero pirop nimi along poloro wimbahilul. Sin teng-tengne kirik a'angkea mag nubu uro longorop mag abolag uropne saog uro wimbahilul.
9 Nari imnongena, poloro wimbahioba, sin as mog so'o nimi tala-tala urobag wa'alpionga, Allahri o'ona sembamsil as taneko piongdi, kanero weamsiong. Kanero weamsiongba, Allahri el weptop nimiri as ua ulamikne tanekoag, sin kanero weamsiong nimiri, “Opsukap,” aro weamsiong. Aghana auk imag agha kulukulaori, sin kom nembahio. 10 Kom nembahiori, Allahri el phia sikini nubunge neneko, nimi haing kunuhirop phia neneko salero, song mali auk singina ibya ua urobag auk nubungeag toboghao. Auk nubunge anekoag Allah san tiliptop Lebe Arobaap, eldi pam silimu orolena yubu tiptopne nenekoap samenag toboghahio. Sin anekoag iniplamlea kweleklamlea seklelamsik paghabog sop-sop ya'ag aneko wamukang.
Nimi teptopne sembe tam karebom agha sinag pelengkahinepne
11 Neneko uro yabioba, kemelamnoag agha nimi nubunge saelba uhiropne puka urobag solomne nubu sirikne imno. Puka urobag solomne neneko alibag El pukamoa imnoba, imap so'oap El whingag anekoa kom taongom seoba, olog ilenne olog imno kom. 12-13 Imap so'oap imno komdi kemelamsinoag agha, nimi teptop nimi ologne nubunge kamag taonga nimi nubunge saelba uhiropne puka urobag whingag aneko sekamong. Mag nubu uro longorop mag laut enekori nimi teptop nimi lomag wamongne tam lelekto kareptopne ponekoag tarelahiloa saog pabahio. Tepna nenekoap, Hadesa nenekoap sin abenekori nimi teptoba salelamsiangne nimi tam lelekto kareptopne ponekoag tarel phirong. Maghap, Tepnaap, Hadesap nimi tarel phiongba, sekamongba, mome toro pairoba wa'amogto pairop mome etpare taneko sangaro wamongba imno. Mome toro pairoba sangaro wamongba, nimi teptop nimi taneko sindi samenag ulamekne ni mome ni neneag toptangtoba wamo. Mome toptangtoba anekoag kembiag agha tam lelekto kemeropne ponekori sindam nimiri uroba sunsunum uro tam palilamo. Mome toro pairopne wa'amogtoba nenne babe sangaptaonge wamongena, nimi ya'ag uro kamag wamnep nimi si mome toroba imno. 14-15 Nimi ya'ag uro kamag wamnep nimi si mome toro piptangtoba enekoag, eldi si orog pagha tanena auk nubunge mag longorop saog urop auk enekoag toro toboglamsio. El nimiag tam palilamori, tam lelekto kemero kareptopne ponekori nimi teptopne saelba uhiropnang si Tepnaap, Hadesap aro engeropne abeneko auk enekoag toro toboglamsio. Auk nubunge mag nubu uro longorop mag saog urop auk enekona, ik phendep sum tepnange aro engerop.