“Nuni Allah omeklamsut!” aro kiplamonga
19
1-2 Neneko uro yabioba, ka'elamnoag agha yubu lilim nimi maiknori haum alamloba, yubu angkongkoa lelamlo saog uro imag agha yubu omekto lelamongdi,“Nuni Allah omeklamsut!
Eldi nimi tam lelekto kareplamlangena sik uro porog uro kareplamla.
Ane sembe lag phoro lelamapti,
Ot Nuni Allahri nimiri malia uropneag agha nimi taulbahinep.
El mikip wamlari nia mangkina saelbamla!
El ot wali aghabog wamlange sembe nuri omekto kiplamap!
Nuni Allahri ina yabirop kel neneko sembe sik uro porog uro tam karebaldi, pelengkal.
Ina yabirop kel nenekori nengabo maikno kiliro nikag maptangkamloa saog ulamori,
Mog so'oag nimi maikno kiliro ulamsioba, Allah wail ibarelamong.
Allahri awe torop nimi maikno kel nenekori olamsioa sembe
Nuni Allahri eldi arukna usog lumbaldi, tam ikinne kel nenekoag pelengkipla,”
alamong.
3 Wene alamongne neneko ka'ebanoba, nen nimi maikno tanekori yubu lelamongdi,
“Nuni Allah omeklamsut!
Nuni Allahri ina yabirop kel Babel neneko loba nembaoba,
auk mhong eneko kuklamle, paghabog kuklamlul,”
aro Allah omeklamonga ka'ebano. 4 Wene alamongba ka'ebanoba, saelba uahiropne puka urobag tibom agha, nimi nubu nang yubu epto wenehiropnang tom tara bare tanekori yabu sanukto u amupto pulingkiong. Lebe aroba tombare Allah whingag kamag ua uropne abeneko babe, sin abenekori yabu sanukto u amupto pulingkina, Nuni Allah omeklamong. Nuni Allah saelba uhiropne puka urobag pulamoba, sindi Allah omeklamong yubuna, “Sikne lebang. Nuni Allah omeklamsut!” aro omeklamonga ka'ebahino.
Pham Domba Meri Elkel toropne sembe sani yoroba
5 Wene alamongba, saelba uhiropne puka urobag tanekoag agha yubu lilim lelamoa ka'ebanongena,
“Allah Elmabo a'un ni Allah arukna wamlomne,
a'undi wanaag agha Nuni Allah kiplamlomne,
nimi ni ologneap nubungeap a'undi Nuni Allah omeklamsut!”
aro yubu lilim lelamoa ka'ebano.
6 Wene aro yubu lilim neneko lelamoba, nen ka'elamnoag agha yubu lilim lelamongena nimi maikno wamlori yubu lelamloba yubu angkongkoa lelamloa saog uro lelamongne ka'ebano. Ka'ebanongena niksiag niksiag agha limang talaglamnari, mag mhun yangkalamnari nubu uro yubu lelamloa saog uro lelamoa ka'ebano. Nari ka'elamnoba sindi yubu lelamongnena,
“Nuni Allah Mikip Phelektopne ponekori wene nia mangkina saelbitsil.
Ane sembe Nuni Allah omeklamsut!
7 Pham Domba Me ponekori, ‘Kelabo toroanun,’ senen kel eneko weroba wamlaba, sin toptanuarang.
Ane sembe nu yeng uro wameberi, Allah omekto sepna seplamukap.
8 Pham Domba Me ponekori ‘Toroanun,’ senen kel eneko sembe,
wangkanep ag wet purum winne agha wetnerop ag walinge,
leng-lenga po'oban koma kororop ag kelenekoag taroba,
ag nene wangkamlari, weroba wamla,”
aro lelamong.
(Wene aro lelamonga ka'ebanori, el tanonge, “Ag wet purum winne agha wetnerop ag walinge,” aro lelamongne kekneba sembe lebong. “Wangkanep ag walinge wangkamla,” seong aghana, Allah Eldamneri weptop mabori porog sirika ulamangne sembe lebong.)a
9 Allah arukna malaikat ponekori nanag yubu lelamori, “Mome toplulamne ane:
‘Pham Domba Me ponekori kelabo tomnepne sembe sani yobaukang. “Sani yolamanga yalulam,” aro yobolahiikpa, yubu ka'erop nimi taneko sin wali wana yeng uro wamukang,’
aro mome toplulam,” seo.
Wene seori, nen ma'aro tipto yubu lebongena, “Nene Allahri yubu sikne ambatkeken,” aro ambatneo.
10 Wene seoba, nari yabu sanukto u amupto malaikat yan tamag pulingkina, “Kipnun,” aro ulamno aghana, eldi lelamori, “Undo unuaheng kom! Ot Allah aghabog omekalulam! Na babe an wamlamne saog uro Allah arukna wamnam. Ankabo Yesusag wana saignia seneragtop nimi ni wamangneri Yesusti yubu kas mi agha ‘Sikne’ aro saelbamangba, anap nanapti babe unulamap,” aro ambatneo. Malaikat ponekori nanag undo ambatneongena, tam nene sembe. Yesusti yubu ambarelamsiogne nenena, Allah Yame Walingeri Yesusti wanaag pibogne sunsunum uro sik uro ambatsiog. Nimi etneri sik uro Allah Yame Walinge pere agha lerop tanena, Yesusti yubu sunsunum uro Allah silimu yubu tipto ambatsirop.
Pham kuda solomne alibag pukamonge poneko sembe ambatsiogha
11 Nari im tiwalengelamnoag agha ina kuptoba nhon imag wamoba, pham kuda solom pham nhon wamoa tiwalengkano. Pham kuda alibag aneko pukamonge poneko si engeropnena, Sikne Sol Walinge aro engerop. Eldi tam karepnange babe, mal talamnange babe, sunsunum uro porogne agha ulpirop. 12 Eldi haingna auk pog saog uro warea uroppa, eldi usoghagna yubu sia leropne kwiria elel molel aropne maikno eleka urop. El nongag aneko mome toptangka urop aghana, si mome toptangka urop si enekona, nimi nenne ekon. El agha mome toptangka urop si eneko eldamne agha el wamla. 13 Eldi ag wangaro pelengka urop ag enekona enengag phibiag agha wangka urop. Enengag phibiag agha eneka urop poneko El sina, “Allah Yubu,” aro engerop. 14 Undo unuamoba, ililamnoba, El umag nimi maikno yin saleropnang kong-kongne pham kuda solomne alibag pukamongdi, imag wamong. Sin nongag wet purum winne agha wetnerop ag walinge, leng-lenga po'oban koma kororop ag enekamongdi, Elag neleplamong. 15 Eldi silomag agha lanalamoa imnongena, nimi ohirop karog yo sirikne lambamonge neneko, “Nari aisa nenehiropnang as tala-tala wamangne opsukap,” aro silomag agha karog lambamo. Aisanang as tala-tala wamangne oro luknubahileri, Eldi besi agha sunurop kame salero nimi kas mi agha saelbamsilul. Eldi aisanang luknubahilengena, nimiri anggur wankga ingkisapto lolterop mag lanalamloa saog uro, Allah Mikip Phelektopne ponekori wana yo sirik senenneag agha, El “Allahri Yubu,” aro si engeropne ponekori El aisa neneropnang ingkisapsinual. 16 Eldi wangaro pelengka urop agap, eldi yan ilap abenekoag mome toropnena, el si engeropne mome torop. Eldi si mome toropnena undo:
“Yubu sia lerop nang sembe Yubu Sia Leropne Paliagne.
Mog so'oag nimi saelba uhiropnang Saelba Uhiropne Nubunge,”
aro mome torop.
17 Undo uro yabioba, tiwalengelamnoag agha Allah arukna malaikat heng nusamag sekamoa tiwalengkano. Sekamori winang im toman ni palamong winangag yubu mikip uro lelamori,
“Allahri sani nubunge weamlo saog uro weamlaba, longoro telahut! 18 Yahutti, nimi yubu sia lerop nangdi sopap, yin salerop nang sikini yabori sopap, palisong nimiri sopap, pham kudari sopap, pham kuda alibag puka urop nimiri sopap a'un winang im toman yabalamlomneri telalulom. Nimi ni wamangne, haing sae kaubiagha nimi arukna taong nimi babe, mo sektop nimi babe, nimi nubungeap, ologneap tebaiikpa, sindi sop telahut!” alamoba, ka'ebano.
19 Wene seoba, nari kemelamnoag agha lebe aroba yonge Allah san tiliptopne samenag imnonge nen sap imno. Lebe aroba nenekoap, nimi ni mog so'oag wamang nimi sembe yubu sia leropnangap, “Mal tabaukap” aro sindi yin saleropnang poloro wimbahiong. Yin saleropnang wimbahiongdi, “Imagne pham kuda solomne alibag puka uropne ponekoap, ilipsabo yin saleropnangap luknubahukap,” aro longolaong.
20 Longolaong aghana Allah san tiliptop lebe aroba nenekoap, eldi pam silimu orolena yubu tiptopne nenekoap, Allahri wepto imag agha poghogne ponekori sin abeneko haing sae kaupto saelbahio. Lebe arobari pam silimu orolena yubu tiptopne nenekona, samenag eldi nimiri uanep komne, “Mane agha ual,” senenne ulamo. Undo unulamori, “Mog so'oag nimi Allah san tiliptop lebe aroba nenekoag sip taukang,” aro pam silimu orolena yubu tiptop nimi nenekori mog so'oag nimi maikno haing kunulamsio. Mog so'oag nimi haing kunulamsio nimi taneko ekel ina pabalamsioba, haing kunulamsio nimi tanekori, “Allah san tiliptop Lebe Aroba nenekoringe taukap,” aro kekneba sindam nimi nongag tobong. “Eldinge taukap,” aro kekneba sindam nimi nongag tolamongdi, El yame sunumna sunuroba omeklamong. Undo unulamong aghana, Allah san tiliptop Lebe Aroba nenekoap, el pam silimu orolena yubu tiptopne nenekoap, Allahri imag agha wepto poghogne ponekori sin haing sae kaupto saelbahiori, auk nubungeag toboghahio. Auk nubunge nenekoag song mali auk singina ibya ua urobag sin abeneko anam teban koma auk nubungeag toboghahio.
21 Auk nubungeag toboghahiori, pham kuda solomne alibag puka uropne ponekori el silomag agha la'inirop karog saelbom agha Allah san tiliptop lebe aroba neleptop nimi ni ya'ag opsio. Ya'ag opsioba, ni winang im toman yabirop winang tanekori telaongdi, nimi teptoba taneko mon og telamonga imno.