18
1 Neneko uro yabioba, nari haing uamna kwelekamna senenag agha kemelamnoba, Allah arukna malaikat yogne imag agha kulukulalamoba imno. Eldi saelba uhirop mikipne nubu wamoba, elag imang wamonge nenekori mog so'o tibin warelobo. 2 Yubu nubunge agha lelamori,“Wene loba tal! As kaluro sorop as Babel nubunge eneko tapto loba tal!
Wene as enekoag phia tognol tanag taori,
mema yongeri nimi nepsiropne ua urobag agha wamla.
As lomag tao wamnebagna, ni winang nimiri winang sop tehirop kom winangap,
nimiri mali senehirop winangap wamnebag agha tao.
3 As kaluro sorop as Babel nimiri samen malia ulamongnena,
ina yabirop kelabori nimi sae kiliro mag yonge tebatsiro
nenek nenelamsiloa saog ulamongdi,
wana tohiro kamna sembe nengaboap ma'aptangka
malia ulamloa saog uro nimi mog so'oag nimi ni ulamsiongba, Babel nimi neleplamsiong.
Mog so'oag nimi sembe yubu sia lennangdi, ‘Bobonge nari wanaag wamlange agto yaboho,’ aro
Nuni Imagne poneko wailag nembiagha as nubunge nenekoap ma'aptangkamong.
Kamna kapto toltoro tolongoropnang mog so'oag tala-tala wamongnang as enekoag pang-yang ulamongdi,
Nimiri wanaag, ‘Nanag yaboho,’ senen wali-waliaba along kamna kapto toro palamongdi, tup talamong.
Ina yabirop kelenekoag nelebom agha Nuni Allah wailag nembaong ane sembe, as soro kalurop as Babel nubunge eneko wene tapto loba tal!”
aro lelamoa ka'ebano.
4 Nen nari ka'elamnoag agha imag agha yubu nhon lelamongena,
“Allahri a'un ambarelamsilnena, ‘Lambahut! Nari mabo, a'undi as kaluro sorop as Babel tanekoa a'un lambalulom!
As aneko nimiri malia ulamangeag nelebahom tanena,
sinag nimi ohinne sekleroba tam timbanepne a'unag babe taleag aro lambalulom,’ aro ambatsil.
5 Malia ulamangdi, sembenga loloro palilamlange neneko ere-ere waelbaongdi,
imag tai yangkalamloa saogne as aneko nimiri malia ulamangne sembe Allah elwamla,” seog.
6 Nen nari ka'elamnoag agha, yubu lilim imag agha lelamonge nenekori,
“Ina yabirop kel Babel enekori nimiag ulamsil saog uro, elag babe undo unualulom.
Eldi nimiag yonge ulamsiog saog uro lumbamundi,
A'unba, eldi nimiag yonge palilamsionge phelekto elag ma'aro yonge piplulom.
7 Kelenekori el wanaag agha maiptangtop yubu lelamlari,
‘Yauog kel wamna komdi, na yubu sia lerop kel nubunge wamna.
Ik nhon babe amang uro wana ikin uro yaghe sembanun kom,’ alamla.
Eldamne paliag neneltangkamlari,
‘Bobonge wanaag wamlange agto yaboho,’ aro tup talamla.
Ane sembe, wene wali-walia maikno elag to'opto wamlange talupto nembamundi,
seklenne agha to'opto lumbamun andarina, wana ikin uro seklebalul.
Eldi senelamlangena, ‘Ik nhon babe wana ikin uro yaghe sembanun kom,’ alamla.
8 Tam nene sembe, ik nhon sum agha nimi ohinne elag omnepnena,
tepnange babe, amang uro unne babe, kwaneng yo seklenne babe
elag uro yabilul.
Nuni Allah nu Saelbamsilne mikip sirik wamlari,
keleneko sembe tam lelekto kemero kareplamleba,
ik nhon sum agha elna aukti tero kom talul.
Elag undo unuanepne nenena,”
aro wene alamoa ka'ebano.
9 Wene aro ka'ebanongena, as kaluro sorop as Babel eneko aukti telamleri, auk mhong kuka walelamleba, mog so'oag nimi sembe yubu sia leropnangdi ililamikti, ngolol aro engelamukang. Mog so'oag nimi sembe yubu sia lennangdi, “Bobonge nanag wamlange agto yaboho,” aro ulamongdi, Nuni Imagne poneko wailag nembiagha yog kelabo saelbamloa saog uro as kaluro sorop as nenekoap ma'aptangkamong. Ane sembe, as kaluro sorop as neneko aukti telamleba, yubu sia leropnangdi engero, ‘Wali-waliaba nen nunag talul kom,’ aro ngolol alamukang. 10 As Babel aneko auk telamleba, seklelamukangne sembe yubu sia leropnang ‘Nunag taleag,’ aro log lelem weag sekamikti, tibog amukang. Sin weag sekamikti lelamikti,
‘Yaghe, seklelamang-ti-e! As Babel kaluro sorop as nubunge eneko aukti mane agha telamla.
As nubunge Babel mikip sirik aghana, ot heng ko'o nhonogag agha
tam pelengeloglaba, aukti as tel!” alamukang.
11 Nimiri kamna kapto toltoro tolongorop nimi tanekori babe, as nubunge neneko sembe amang piro engelamukangnena, “As eneko wamso tanena, sikindinge taneko kamna kapto tolaheng,” senelamukang aghana, kom taleba, “Nimi nhondi babe nuri saeag payalamapne kamna kapto tolaukang kom,” aro engelamukang. 12 As nubunge neneko anam aukti ten komag, nimiri yeng sirik senennena, kamna alikinag uro kapto tomneba undopne:
leng-leng arop kirik kamongkai saog kirik emasap,
leng-leng arop kirik kororoba perakap,
kirik wana yame-yame up sererop kirik wana elektobaap,
wali sik wana katne saog uropne mutiaraap,
ag wet purum winne agha wirop ag walingeap, wet purum yongonne agha wirop ag walingeap,
tup nimiri enektop ag uwong agap, uwong ag agha poptangtop agap,
kal kem-kem song wali saog kalap,
pham nubu sirik pham gadya sombola wenge agha sunurobaap,
kal kamna alikinag uro torop kalap,
besi agha sunuroba uwongneap piringeap,
ae sorop kirik sildi yogto-yogto pairop kirikap,
13 kwaneng ma'al yona emem arobaap,
emem aroba kal konap,
song walia aukag tamnepneap,
nimi nongag likto song wali nenerobaap,
kal wea song walingeap,
haing anggur wana loltero terop maghap,
kal zaitun wana lolterop maghap,
kwaneng roti sunuroba leng-lenga walingeap,
kwaneng roti sunuroba gandum walingeap,
pham sapiap, pham dombaap,
pham kudaap, nimi alibag pukamnaba pham kudari kiliro pabihiropneap,
nimi babe, arukna nembahinep nimi nong kamna kapto pabihirop nimiap,
anam as nubunge Babel eneko aukti ten komag, pibom agha nimiri kamna kapto tol pinep.
14 Kamna kapto toro tolongorop nimi tanekori as nubunge nenekoag ikinne timbalenge ibom agha lelamikti, “Andi wanaag ‘Wali-walia topsene,’ senelamlamne neneko ni kom tal. An tuptangka an holno seneba ni ka'eseptaoba, nia taneko nen iplulam kom,” alamukang. 15 As kaluro sorop as neneko aukti telamleba, auk ogti lebareklamlenge sembe, sin samenag as enekoag nimiag kamna kapto toroaekti, tup taek nimi taneko weag agha tiboghaukang. Tiboghaikti, log lelem weag sekamikti, amang piro engelamukang. 16 Engelamikti yubu lelamikti,
“Yaghe, seklelamang-ti-e! As kaluro sorop as nubunge Babel eneko mane agha loba tal!
Elag kwiria elektoba enekamongena, ag purum winne agha wirop agap,
ag uwong popneap, uwong agap eneka urop.
Eldi sop-sop towalengeptangtobana leng-leng aroba emasap,
kamna alikinag agha sik wana saog uropne mutiaraap,
kirik wana yame-yame up sererop kirikap towalengeptangka urop.
17 Aghana heng ko'o nhonog tin haingag agha elag tup ua ulamlange neneko orog tal,” alamukang.
Mag alip toman kabong nubunge alibag pirop nimi ni, kabong o'orop nang sikini yaboap, kabong lomag o'orop nangap, “Mag lomag uroba sembe ero toroaukap,” aro kabongag nhon pirop nangap, sin niri weag agha sekamikti tibog amukang.
18 Weag sekamikti tilamikpa, as eneko auk telamleri, mhong kuklamlea tiboghamukang. Tiboghamikti yubu haum alamikti, “As nubunge nhon as ene saog uro nubu uro soro kaulbaekne nhon urop kom,” alamukang. 19 Unulamlea sembe sin engelamikti, amang uropne agha usoghag hao lopto towalengel dalamikti, yubu engenange agha nubu uro engelamukang. Engelamikti,
“Yaghe, seklelamang-ti-e! As kota nubunge Babel as eneko mane agha loba tal!
As eneag tup wamlangeri nu kabong mag alip toman piroba ngai nimi tup nenelamsil!
Aghana heng ko'o nhon tin haingag agha nia-ni wamlange loba tal,”
alamukang.
20 A'un imag ua uropnang, as kaluro sorop as neneko kom talne sembe yeng uro wamsut!
A'un Allah Elmabo weptopneap, A'un Yesusti wepto pogsirop nangap, a'un Allah silimu yubu tiptop nangap, awi senelamsut!
As neneko nimiri a'unag malia uhiropne sembe Allahri tam pelengero lumbahil!
21 Neneko uro yabioba, imnori kemelamnoag agha Allah arukna malaikat palisongne nhondi kirik nubu sirikne saelbamori, mag longorop mag laut nubungeag tobog aori yubu lelamori,
“Undo kirik nene mikip uro pelengero tobogan saog uro,
as Babel soro kaubaogne neneko yo uro webongkia tobog aleba,
nimi nhondi babe olog ibukang kom.
22 Pingpong yubu neneroba kecapi orop nimiri olamika lilim babe,
sepna septop nimiri seplamika babe,
ma'i agha lom nembongkia pho alamikpa yubu lelamlea babe,
ma'i trompet pho alamika babe andi as Babel tanekoag nimiri nen ka'ebaukang kom.
Sa'a-sa'a ni kop-kop tagto elwamnari, sunuro sorop nimi babe as tanekoag ibukang kom.
Kwaneng roti koloptop wana ururo yambalul aro poa kanektop kirikti yubu lelamlea babe as tanekoag ka'ebaukang kom.
23 As tanekoag whea nhon babe nen wareamlul kom.
Anekoa nimiri kelabo tomnep sepna seplamikti, irit pholong alamika babe ka'ebaukang kom.
Samen as soro kalurop as Babel neneag agha
kamna kapto toltoro tolongorop nimi tuptankamongdi maibiltalamong.
An Babel nimiri mili lero nimi mog so'oag nimi ulamsiloa saog ulamomba,
mog so'oag nimi tala-tala wamong nimiri a'un sembe ‘Nubunang,’ aro nelebahiongdi,
orolena sik senelamong.
A'un Babel nimiri unulamlomne abeneko sembe Allahri opsilul,”
aro Allah arukna malaikat palisongne nenekori wene alamoa ka'ebano.
24 Allahri as Babel nimi opsiongena,
Allah silimu yubu tiptop nangap, Allah Elmabo weptopneap, Yesusti yubu salerop nimi opsiong nimi niap
as Babel nimiri sin opsiongba, eneng lanaro tebaong.
Ane sembe, Allahri as soro kalurop as Babelag tam ikinne pelengkaoba, as kom taoa imno.