“Kelabo nhonap Lebe Aroba nhonap ipsino,” seogha
17
1-2 Neneko unuaoba, sin Allah arukna malaikat saekbare abenekori kau saekbare saelbamongne abeneko agha, nhon nanag yaori yubu lelamori, “Yae, nari anag ambatkenunnena, ina yabirop kel si nubu kelenekoag Allahri amik omnepne sembe ambatkenun. Ina yabirop keleneko sembe likipto lelamnangena, as nubu uro soro kalurop as mag magne libunag uropne sembe lelamna. Nengabori ina yabirop kel saelbom agha kamna sembe maptangka malia ulamloa saog uro, mog so'oag yubu sia leropnang ubu piamang nang enekori Allah wailag nembiagha as nenekoag piongdi, ‘Bobonge nari wanaag wamlange agto yaboho,’ senenne agha malia ulamong. Ina yabirop kelabori nimi sae kiliro mag yonge tebatsiro nenek nenelamsiloa saog ulamongdi, wana tohiro kamna sembe nengaboap ma'aptangka malia ulamloa saog uro as soro kalurop as Babel nimiri undo unulamong. As Babel nimi nenekori as tala-tala urop nimi wana tohiro loba nenelamsiongba, Allah wailag nembaong. Sin Babel nimiri undo malia ulamangne agha Allahri sin tam karepto opsinepne sembe ambatkenun,” aro ambatneo.3 Wene aro ambatneoba, Allah Yame Walinge nanag taneoba, Allah arukna malaikat enekori na poa lemneori, pai aldes saog urobag poa pineo. Aneko poa pineoba, kemelamnoag agha kelabo nhon lebe aroba alibag pukamoa aneko, lebe arobari nongna uwong wamoba imno. Lebe arobari nongag kembano ana, mome aghabog mome toropti Allah san tiliptop yubu momeog mome toroba lebe aroba anekori nongag to'opto wamoba kembano. Lebe aroba aneko eldi usog kembano ana usog saekbare wamoba, eldi pinu yagne sa'obare wamoa imno. 4 Kel enekori enekamo agna, uwong agap, uwong ag agha poptangtop agap agha enekamo. Apna, kamna alikinag uro toroba yogne-yogne wangkamongena, leng-leng aroba emasap, sik wana saog uroba mutiaraap, kirik wana yame-yame upsererop saogneapti elek palak aroba wangkamoa imno. Eldi saeag saelbamoana, mag ma'i leng-leng aroba emas agha sunurop mag ma'i saelbamo. Mag ma'i saelbamonge lomag liroba anekona, popmagha sirik uropneap, sembenga pibongeap to'opto wamonge imno. Ma'i lomag wamongena, kelenekori bobonge senenne agha kamna sembe nengabo ma'aptangtoba ma'i lomag ikto liploa saogne wamoba imno. 5 Eldi haioghag mome toroba kembanongena, el si engeropne lomag tognorop yubu wamlange mome toro piroba eldi haioghag kembano. El si engeropne tognorop yubu mome toropne nenekona,
Babel Nubunge
Ina Yabirop Kelabo Kamna Sembe Nengabori Salerop Kelabo Sikinin
Popmagha Urop Sembenga Mog So'oag Uropne Mangkahirop Kelabo
aro mome toroba kembano.
6 Nari kelenekoag kembanongena, eldi mag yonge tero nenek salerop nimi saog wamori ulamoa imno. El nenek salerop nimi saog nenerop mag yonge nenena, eldi sin Allah Eldamneri weptop mabo sembe sindi Yesusag wana saingnia seneragtop nimi agha, kelenekori sin opsiori, nimi eneng lambom agha mag yonge telamloba, nenek saelbamlo saog ulamoa kembano.
Keleneri undo ulamonge nene kembanori, nari el sembe ngalagto lo'om paibon senori, “Yaghe” sembano. 7 Wene sembanori kembanoba, Allah arukna malaikat anekori nanag yubu lelamori,
“Sa'a sembe keleneag kembi agha lo'om aro ‘Yaghe' senelamlam? Keleneko sembe tognoroba wamlange nene sembe tibin nenero amatkenun. Apna, keleneko lebe aroba alibag pukamlange taneko, lebe aroba nenekoap, lebe aroba usog saekpare wamlangeap, el pinu yagne sa'obare wamlangeap sembe tognoropne neneko nari ambatkenun. 8 Lebe aroba ane samenag wamog aghana, wene an Yohanes wamlam li ko'oag wamla kom. Wene wamla kom aghana, el selenga nimiri we sumbanep kom selengeag agha lamba lepleri yaleri, amik loba neneptanebag pulul. Nimi mog so'oag wamik nimiri lebe aroba neneko ibikti, el sembe ngalagto senelamikti, ‘Yaghe, samenag wamogti, kom tao aghana, nen yal,’ aro lo'om sukang. Sindi lebe aroba sembe lo'om seik nimina, imap so'oap sumbaog sumag agha Imagneri, ‘Ya'ag kamag wamukang,’ aro wepsirop nimi si tohirop mome tobog. Nimi si mome tobog aghana, mome neneag sindi nimi si mome tohirop kom nimiri lebe aroba neneko ibikti, lo'om sukang.
9 Wana hekahinep yubu ane ambatnuahinne ka'ebamundi seneragsut! Usog saekbare wamlange nenena, yim kongten saekbare wamlaba, kongten abeneko alibag kelabo eneko puk-puk yabiamla. Usog saekbare wamlange nene babe, nimi yubu sia lerop nimi saekbare saelba uhiropnang wamang. 10 Sin saekbare aneko agha, lambarena timbaong bana, nhonna anam sekamlari, yubu lelamlaba, nhon anam yingkiamla kom. El anam yingkiamla komne neneko el yaleba babe, Allahri karepto pibogne sunsunum uro sekamlul aghana, ko'o we uro yubu sia lero sekamlul kom. 11 Lebe aroba uwongne el nongag Allah san tiliptop yubu mome toptangtop lebe aroba neneko, el samenag wamog aghana, wene wamla kom. El nenekona yubu sia leropne linne wamlul. El babena, sin yubu sia lerop nang saekbare eneko agha lag talul aghana, loba neneptanebag pilul.
12 Pinu sa'obare wamlaba, iplamne nenekona yubu sia leropnang anam sekamnari yubu sia leamna komnang. Aghana sinag mikipne neneko tatsile tanena, lebe aroba anekoap sin nhon heng ko'o nhon saelba uhiro yubu lelamukang. 13 Sin yubu sia lerop nang sa'obare abenena, sindi wanaag, ‘Uaukap,’ aro ulamiknena, ot ina nhonog. Anena, sindinge mikipneap sindamne imangapti saelba uanepne neneko, nina lebe aroba aneko ‘Nubu talul,’ aro el saeag nembaukang. 14 Sindi wea Pham Domba Me ponekoap, ‘Mal tabukap,’ aro ulamukang. Aghana Pham Domba Me ponekona, mog so'oag nimi saelba uhiropnang Saelba Uhiropne Nubunge wamla. El ponekona, yubu sia lerop nang sembe Yubu Sia Lenne Paliagne wamla. Ane sembe, sindi Elap ‘Mal tabukap,’ aro ulamukangpog, sin oro luknubahilul. Pham Domba Me ponekori oro luknubahile sumeneko, Elap ma'aptangtop nimina, Eldi wepto yopsirop nimi Elag kas mi agha neleptop nimi Elap nikag wamukang,”
“Mag andi iplamne nenena, ina yabiro kamna sembe nengabori salerop kel eleneko puka urobag iplam sunumnana ane. Mag iplamnena, nimi mog so'o tala-tala wamang nimiap, nimi maiknoro longorop nimiap, nimi winiptangto mo sektoba negara a'ero-a'ero urop nimiap, yubu a'ero-a'ero taneko yubu lero urop nimiap, sin alibag puka ulamoba iplam. 16 Lebe aroba anekoap, el pinu yagne yubu sia leropnang sembe likipto sunurop pinu yagne sa'obare abenekoap iplamne abenekori ina yabirop kel eneko sembe, sindi karong sembaikti, haing sek uro kembaukang. Sindi sa'a-sa'a kel enekori saeag wamlea taneko pelepto tobikti, kel eneko kabeog nenero ali nembaukang. Sindi eldi nong sop taneko aukag taro telamukang. 17 Allahri, ‘Nari seneropne agha ulamukang,’ aro sindi wanaag el nembahio. Allahri seneraglamogti, ‘Yubu sia leropnang sa'obare abenekori saekag lebikti, sindi yubu sia len mikiba neneko lebe aroba saeag nembaikpa, hae sesog saelbamsilul,’ sembaog. Allahri wene sembaogpa, ulamikpa, lebe aroba yonge anekori saelba ulamle kekman Allahri samenag salag lero pibogne neneko uro yabilul. 18 Kelabo andi iplam kel enekona, as kaluro sorop as nubunge wamlari, mog so'oag nimi sembe yubu sia lerop nang saelba uhirop kelabo wamlaba, iplam,” aro Allah arukna malaikat anekori lelamoa ka'ebano.